CAKACAKA 25

1Ni sa oti e tolu na siga mai na gauna ka yaco yani kina ko Vesito, sa qai cavutu mai Sisaria ko koya ka lako cake ki Jerusalemi. 2E kea era sa qai beitaki Paula vua ko ira na bete levu kei ira na nodra i liuliu na Jiu, ka masuti koya 3me bau lomani ira ka me talatala me lako yani ki Jerusalemi ko Paula, ka ni ra a sa bukia tiko na kena vere oya me ra na vakamatei koya e gaunisala. 4Sa qai kaya ko Vesito, “E se vesu tiko ga mai Sisaria ko Paula, ka'u sa na vakarau lesu tale tiko ga kina oqo ko i au. 5Me ra lako mai na nomuni i liuliu me keimami mai lako vata sobu, ka me ra na beitaki koya, kevaka e tu na ka me beitaki kina” 6Ia ni sa oti e walu se tini na siga na nona tiko vei ira, sa qai lako sobu ki Sisaria. E na siga ka tarava sa la'ki dabe sara e na i tikotiko ni veilewai, ka vakarota me kau yani ko Paula. 7Ni sa yaco yani ko Paula era sa qai tu vakavolivoliti koya ko ira na Jiu ka ra lako mai Jerusalemi, ka beitaki koya e na vuqa na cala lelevu, ia era a sega ga ni vakadinadinataka rawa. 8Ia sa qai sauma na veibeitaki koya ko Paula, ka kaya, “E sega ni bau dua na ka ca au a cakava ki na nodra Lawa na Jiu, se ki na Valenisoro, se ki vua na Sisa.” 9Ia ni sa via vakayalovinakataki ira ga na Jiu ko Vesito, sa qai kaya kina vei Paula, “Ko na makutu mo lako cake ki Jerusalemi mo la'ki lewai kina vei au e na veika oqo?” 10Sa qai kaya ko Paula, “Au sa tu sara tu ga oqo e na mata ni tikotiko ni veilewai e nona na Sisa, ka sa dodonu me'u lewai kina. Au a sega ni vakayacora e dua na cala vei ira na Jiu, me vaka ko ni sa kila. 11Kevaka au sa tamata i valavala ca, se'u a kitaka e dua na ka sa dodonu me'u vakamatei kina, au sega ni via kerea me'u vakabulai mai kina. Ia ke sega ni dina na ka era beitaki au tiko kina, e sega ni dua e na soli au rawa vei ira. Au sa kerea gona kina me la'ki rogoci na noqu kisi vua na Sisa!” 12Ia ni ratou sa vakasamataka oti ko Vesito kei iratou na nona dauvakasala, sa qai kaya vua ko Vesito, “Ko sa vinakata mo la'ki rogoci vua na Sisa, ia ko sa na lako vua na Sisa” 13Ni oti tale e vica na siga, e rau sa qai lako yani na tui ko Akariva kei Verenaisi me rau la'ki veikidavaki kei Vesito. 14Ia ni sa oti e vica na siga na nodrau tiko e kea, a mani tukuna na veika e baleti Paula ko Vesito vua na tui, ka kaya, “E tiko oqo e dua na tamata ka a biuti koya tu mai vakavesu ko Vilikesa. 15E na noqu a lako ki Jerusalemi, era a qai mai tukuni koya vei au ko ira ua bete levu kei ira na nodra qase na Jiu, ka kerei au me'u vakatauca vua na lewa ni se cala e na lawa. 16Au a qai kaya vei ira ni sega ni noda i vakarau na kai Roma me da solia e dua na tamata me la'ki vakamatei ni se bera mada ni ra mai veiraimata kei ira na beitaki koya e na mataveilewai, ka vakamacala tale ga e na ka e beitaki kina. 17Era sa mani lako vata mai ki ke, ka'u a sega tale ni lokuyara, ni'u sa cakava sara na kena veilewai e na siga ka tarava, ka vakarota me la'ki kau mai na tamata oqo. 18Ia ni ra sa tu cake ko ira ka beitaki koya, era a sega ni beitaki koya e na dua na ka ca au a nanuma ni ra na beitaki koya kina. 19Na leqa wale ga e tiko oya na nodra veileti me baleta na veika e so ni nodra lotu, kei na ka e baleta e dua na tamata sa mate, oya ko Jisu. Ia e kaya tiko ko Paula ni sa bula tiko ga ko koya. 20A leqa na lomaqu ni'u sega ni kila se me'u na vaqaqa vakacava na veika oqo, ka'u sa mani tarogi Paula kina se na via lako cake ki Jerusalemi me la'ki lewai kina se sega. 21Ia ni sa mani kerea ko Paula me sa tu vaka wawa mada ga na nona kisi me na qai vakataulewa kina na Sisa ko Akusito, au sa mani vakarota me sa tiko vakavesu tiko mada ga me yacova ni'u sa na vakauti koya rawa vua na Sisa.” 22Sa mani kaya vei Vesito ko Akariva, “Au via rogoca sara ga vaka i au na tamata 'qo.” Sa qai kaya ko Vesito, “'O ni na rogoci koya ni mataka.” Ko Paula e na Matadrau ko Akariva kei Verenaisi 23E na siga ka tarava, e rau sa ukucavu mai ko Akariva kei Verenaisi, ka la'ki curu ki na vale ni soqo kei ira na turaganivalu lelevu kei ira na turaga dokai e na koro koya. Sa qai vakarota ko Vesito me kau yani ko Paula. 24Sa qai kaya ko Vesito, “Kemuni Akariva, na tui, kei kemuni kece ga ka da soqoni vata tiko oqo, ko ni sa raica na tamata oqo, sa i koya era sa cikevi au kina ko ira kece ga na Jiu mai Jerusalemi, ka vaka kina e ke, ka ra kaya ni sa sega ni dodonu me bula tiko ko koya. 25Ia ni'u a sega ni kunea e dua na cala e cakava ka dodonu me tau kina vua na i totogi mate, ka ni sa kerea tale ga me la'ki lewai koya ko Akusito, au sa lewa kina me'u sa na vakauti koya vua. 26Ia e sega ni tiko e dua na ka me'u vola vua na tui me baleti koya. Sa i koya ga oqo au sa kauti koya mai kina e ke, ka vakabibi e matamuni Akariva na tui, mo ni mai vaqaqa, ka me rawa ni dua kina na ka me'u vola vua na Sisa. 27Ni sa dua na ka lialia me'u vakauta tu e dua na kaivesu ka sega ni lako vata kei na dua na i vakamacala matata ni veika e beitaki kina”

will be added

X\