CAKACAKA 24

1Ni oti e lima na siga, sa qai lako sobu ko Ananaiasa na Bete Levu kei ira na qase ni Isireli kei na dua na loya ko Teritulu. Era sa la'ki tu e na mata ni Kovana ka ra sa qai beitaki Paula vua. 2Sa qai kacivi yani ki loma ko Paula, ka sa vakatekivu me beitaki koya ko Teritulu ka kaya, “Kemuni na Turaga na Kovana! E na nomuni veiliutaki vinaka keimami sa kune vakacegu tiko kina e na dua na gauna balavu, ka sa yaco tale ga dina e levu na veisau vinaka e na loma ni vanua oqo. 3Keimami sa rekitaka dina na veika oqo e na veivanua kece ga kei na veigauna kece ga, ka keimami sa vakavinavinaka kina vakalevu vei kemuni Vilikesa, na neimami turaga dokai. 4Ia au sega ni vinakata me'u vakaotia wale ga na nomuni gauna, o koya gona au sa masuti kemuni mo ni yalo vinaka mo ni rogoci keimami mada vakalailai. 5Keimami sa kunea ni sa dua na tamata dauveivakacalai na tamata oqo; sa dau vakatubu ca vei ira na Jiu e na veiyasa i vuravura kece ga, ka sa dua sara ga ko koya na nodra i liuliu na i lawalawa ni kai Nasareci. 6E a tovolea tale ga ko koya me vakadukadukalitaka na Valenisoro ka keimami a mani vesuki koya, [ka via veilewaitaki koya me vaka na neimami Lawa. 7Ia e a qai lako yani ko Laisiasa, na turaganivalu liu, ka kaliraki koya vakaukauwa mai na liga i keimami. 8A qai vakarota vei ira ka beitaki koya me ra lako mai vei kemuni.] Ni ko ni sa na vaqaqai koya ko ni sa na qai kila rawa ga mai vua na veika keimami beitaki koya kina.” 9Era a tokona na Jiu na veibeitaki oya ka ra kaya ni sa dina kece sara. 10Sa qai deguvacu na kovana vei Paula me vosa, ka sa qai kaya ko koya, “E na noqu kila ni sa balavu na gauna ko ni turaganilewa tu kina e na vanua oqo, sa ka ni marau kina vei au me'u vakamacalataki au vei kemuni, ka sauma na veika au beitaki tiko kina. 11Sa rawa ni ko ni vakadinadinataka ni sa qai sivia wale ga oqo e tinikarua na siga na noqu a lako cake kina ki Jerusalemi me'u la'ki lotu kina. 12Era a sega ni kunei au na Jiu ni keirau veileti tiko kei na dua na tamata, se ni'u vakatubu ca tiko vei ira na lewe vuqa e na Valenisoro, se e na veivalenilotu, se e na loma ni koro. 13Era sega ni vakadinadinataka rawa vei kemuni na veika era beitaki au tiko kina oqo. 14Ia na ka ga au via tusanaka vei kemuni me baleti au sa i koya oqo: au qarava dina tiko na nodra Kalou na neimami qase e na noqu muria tiko na kena Sala, ka ra kaya tiko ko ira oqo ni cala. Au vakabauta na veika kece ga e volai tu e na Lawa i Mosese kei na ka era vola na parofita. 15Sa tu na noqu vakanuinui vua na Kalou, me vaka tale ga era vakabauta ko ira oqo, ni ra na tu cake tale mai na mate ko ira na yalododonu kei ira na sega ni yalododonu. 16O koya gona oya, au sa dau saga kina e na veigauna kece ga e na noqu i gu taucoko me kakua ni dua na ka e cala kina na lewa ni lomaqu vua na Kalou ka vaka kina vei ira na tamata. 17“Sa oti oqo e vica na yabaki, au sa qai lesu mai ka kauta mai na i solisoli vei ira na dravudravua e na noqu vanua, ka me'u mai vakacabo i madrali tale ga. 18Ia ni'u se la'ki qarava tiko na i tavi oya, era sa mani kunei au e na Valenisoro ni sa oti na cakacaka ni noqu vakasavasavataki. A sega ni dua na i binibini tamata me keimami tiko vata ka sega tale ga ni dua na maue. 19Ia e so ga na Jiu mai Esia era a tiko kina; e dodonu ga me ra a lako mai e liu ki ke, e matamuni, ko ira ka mai veibeitaki, kevaka e tu na ka me ra beitaki au kina. 20Se me ra tukuna ko ira oqo na cala era a raica vei au e na noqu a tu e matadra na lewe ni Bose, 21vakavo ga na noqu a kailavaka ni'u sa tu e na kedra maliwa, ʻKo ni sa veilewaitaki au tiko e daidai ni'u sa vakabauta ni ra na vakaturi cake tale na mate.ʼ “ 22Ia ko Vilikesa, ni sa rui buta vinaka tu e na ka e baleta na Sala ni Turaga, sa vakasukai ira, ka kaya, “Ni sa na lako sobu mai ko Laisiasa, na turaganivalu liu, au sa na qai vakataulewa e na ka oqo” 23Sa qai vakarota na turaganivalu me vakatawai tiko ko Paula, ka me solia tale ga vua e so na galala ka me kakua ni tarova e dua vei ira na wekana e via sikovi koya. 24Ni sa oti e vica na siga, e rau sa qai lako yani ko Vilikesa kei na watina ko Tarusila, e dua na marama ni Jutia. A talatala ko Vilikesa me lako yani vua ko Paula, ka sa vakarogoci koya e na nona i vakamacala me baleta na noda vakabauti Karisito Jisu. 25Ia ni sa la'ki yaco na i vakamacala i Paula me baleta na dodonu, na noda lewai keda rawa vakavinaka na tamata, kei na veilewai sa bera tiko mai, sa domobula ko Vilikesa, ka kaya, “Mo sa tei lako tale mada; ke na mani dua tale na gauna e galala, au na qai kacivi iko tale mai.” 26E na gauna vata oya e a nuitaka tiko kina ko Vilikesa ni na soli i lavo vua ko Paula. oya na vuna e a dau talatala vakawasoma sara kina vua ko koya ka veitalanoa kaya. 27Ni sa oti e rua na yabaki, sa qai la'ki sosomitaki Vilikesa ko Porisiu Vesito. Ia na nona via vakayalovinakataki ira na Jiu ko Vilikesa, e a mani biuti Paula tu ga kina e na valeniveivesu.

will be added

X\