CAKACAKA 23

1E a wanonovi ira matua na lewe ni Bose ko Paula ka sa qai kaya, “'O i kemuni na wekaqu, e galala vinaka sara tu ga na lomaqu e na ka e baleta na noqu bula e na mata ni Kalou me yacova na siga oqo.” 2Sa qai vakarota ko Ananaiasa, na Bete Levu, vei ira ka tu volekati Paula me ra sabaka na gusuna. 3Sa qai kaya vua ko Paula, “'O dabe toka 'qori mo veilewaitaki au me vaka na ka e tukuni e na Lawa, ʻo qai voroka tale na Lawa e na nomu vakarota me'u lausaba! 'O iko na i bulubulu boro vulavula, walega! Raica e na sabaki iko tale ga vaka kina na Kalou!” 4E ratou sa qai kaya na tu volekati koya, “Sa rui viavia levu na gusumu vua na Bete Levu ni Kalou!” 5Sa qai kaya ko Paula, “Kemuni na wekaqu, au a sega ni kila ni Bete Levu ko koya. Sa volai tu e na i Vola Tabu, ʻMo kakua ni vosa vakacacataka e dua na nodra i liuliu na kai nomu.ʼ “ 6Ia ni sa raica ko Paula ni dua na i wase era Setoki ka dua na i wase era Farisi, sa qai kaci yani vei ira na lewe ni Bose, ka kaya, “Kemuni na wekaqu, ko i au e dua na Farisi, au luve ni Farisi. Au sa lewai tu oqo me baleta ni'u vakabauta ni ra na tucake tale na mate” 7Ia, ni sa oti na nona kaya oya, sa tubu sara e dua na veileti ena kedra maliwa na Farisi kei ira na Setoki, ka sa tawase rua sara kina na soqoni. 8Ko ira na Setoki era vakabauta ni na sega na tu cake mai na mate, e sega na agilosi ka sega tale ga na yalo; ia era vakabauta na ka tolutolu oya na Farisi. 9A sa tubu me levu sara na qoqolou, ka ra sa tu cake e so na daunilawa era nodra i tokani na Farisi, ka ra veiba vakaukauwa sara, ka kaya, “Keitou sega ni raica e dua na cala vua na tamata oqo. E rairai e a vosa dina ga vua e dua na yalo se agilosi!” 10Ia ni sa tubu me kaukauwa vakalevu na veileti, sa taqayataka na turaganivalu liu de ra na qai basuraki Paula. Sa mani vakaroti ira na sotia me ra lako sobu, ka kaliraki koya tani mai, ka kauta ki na i tikotiko ni valu. 11E na bogi ni siga koya, e a tu e na tiki i Paula na turaga ka kaya vua, “Kakua ni yalo lailai! Me vaka ni ko sa tukuni au e Jerusalemi, ko na laʼki tukuni au tale ga ki Roma!” 12Ni sa siga na vanua era sa qai nakicataki Paula e so na Jiu. Era sa cakava e dua na bubului ka ra yalataka kina me ra kakua ni kana se gunu me yacova sara ni ra sa vakamatei Paula. 13Era lewe vasagavulu vakacaca ko ira ka bukia oya na vere kei Paula. 14Era sa qai lako vei ira na bete levu kei ira na qase, ka kaya, “Keimami sa bubuluitaka me keimami kakua ni kania e dua na ka me yacova ni keimami sa vakamatei Paula. 15Ia ko i kemuni kei ira na lewe ni Bose mo ni qai tukutuku vua na turaganivalu liu me kauti Paula sobu mada mai vei kemuni, me vaka ga ko ni via kila vakavinaka cake na veika e baleti koya. Keimami sa na vakarau toka me keimami vakamatei koya ni bera ni yaco mai ki ke” 16Ia e a rogoca na vere oya na luve i ganei Paula gone tagane ka mani lako sara ki na i tikotiko ni valu, ka la'ki tukuna vei Paula. 17Sa qai kaciva e dua na turaganivalu ko Paula ka kaya, “Kauta mada na cauravou oqo ki vua na turaganivalu liu, e tiko vua e dua na ka me tukuna vei koya.” 18Sa qai kauti koya na turaganivalu koya vua na turaganivalu liu, ka kaya, “E a kacivi au na kaivesu, ko Paula, ka kerea me'u kauta mai vei kemuni na cauravou oqo ni tiko vua e dua na ka me tukuna vei kemuni.” 19Sa taura sara na ligana na turaganivalu liu ka tuberi koya vakatikitiki, ka kaya vua, “A cava ʻo via tukuna vei au?” 20Sa qai kaya ko koya, “Era sa lomavata na Jiu me ra kerei kemuni mo ni kauti Paula sobu vei ira na matabose ni mataka me vaka ga era via kila vakavinaka cake na veika e baleti koya. 21Mo ni kakua sara ni vakarogoca na nodra kerekere, ni sivia e lewe vasagavulu vei ira era sa nakicataki koya tiko. Era sa bubuluitaka tu ni ra na sega ni kana se gunu me yacova ni ra sa vakamatei Paula. Era sa vakarau tu ga oqo, ka ra sa namaka wale tiko ga na nomuni lewa.” 22Sa qai kaya na turaganivalu vua na cauravou, “Kakua ni tukuna tale vua e dua ni ko sa mai tukutuku oti vei au.” Oti koya sa mani mai vakatala sara yani. 23Sa qai kacivi rau e rua na turaganivalu na turaganivalu liu, ka kaya vei rau, “Drau vakarautaka e lewe rua na drau na sotia i valu yava, vata kei na vitusagavulu na sotia i valu ose, ka rua na drau na sotia i valu moto me ra lako ki Sisaria e na ciwa na kaloko e na bogi e daidai. 24Drau vakarautaka tale ga e so na ose me na vodo kina ko Paula, ka kauti koya vei Vilikesa, na kovana” 25Sa qai mai vola yani ko koya e dua na i vola ka vaka oqo na lewena: 26“Mai vei Kilotiu Laisiasa, ki vua na turaga dokai, na kovana, ko Vilikesa. Ni sa bula! 27Na tamata ka kau tiko yani oqori e a sa voleka sara ni ra vakamatei koya na Jiu. Ni'u sa mai kila ni kai Roma ko koya, au sa qai kauti ira kina na sotia ka la'ki vakabulai koya mai. 28Ia ni'u a via kila se cava na ka era a beitaki koya tiko kina, au a mani kauti koya sobu kina ki na nodra Matabose. 29Au a mani kunea ni beitaki tiko ko koya e na dua na ka e baleta na nodra Lawa, ia e a sega ni dua na ka e dodonu me mate kina, se me tiko vakavesu kina. 30Ia ni sa mai tukuni vei au ni ra sa nakicataki koya tiko na Jiu, au sa vakauti koya sara yani kina oqo vei kemuni, ka'u sa vakarota, tale ga vei ira era beitaki koya me ra na qai la'ki tukuna e matamuni na ka sa beitaki kina ko Paula” 31Era sa qai kauti Paula na sotia me vaka na veika sa vakaroti vei ira ka kauti koya sara ki na koro ko Anitipatiri e na bogi. 32Ena mataka ka tarava e ra sa qai lesu tale ki na i tikotiko ni valu na sotia i valu yava ka ra a veikau sara tiko na i valu ose. 33Era sa mani yaco ki Sisaria, ka ra la'ki solia sara na i vola vua na kovana, ka soli Paula tale ga vua. 34Ia ni sa wilika oti na i vola na kovana, sa qai tarogi Paula se ko cei na nona yasana. Ia ni sa kila ni kai Silisia ko koya, 35sa qai kaya, “Au na qai rogoca na ka e baleti iko ni ra sa yaco mai ko ira era beitaki iko” Oti oya sa qai vakarota na kovana me la'ki yadravi tiko ko Paula e na vale ni veilewai i Eroti.

will be added

X\