CAKACAKA 22

1“O i kemuni na wekaqu kei kemuni na qase, ni rogoca mada na veika dina au via tusanaka me baleti au.” 2Ia ni ra sa rogoca ni vosa vei ira ko koya e na vosa vaka-Iperiu, era sa tiko lo sara. Sa qai vosa ko Paula ka kaya, 3“'O i au e dua na Jiu, au a sucu mai Tarisu mai Silisia, ia au a susugi ga e na koro oqo, ka'u vuli ka vei Kamelieli me baleta na kena muri vakadodonu sara na nodra Lawa na noda qase. Au a dau qarava vagumatua na Kalou me vakataki kemuni kece ga ko ni tiko e ke e daidai. 4Au a dau vakacacani ira sara vakaukauwa era muria na Sala oqo, ka ra la'ki mate sara kina e so. Au a vesuki ira na tagane kei na yalewa ka biuti ira ki valeniveivesu. 5E rawa sara ga ni ra vakadinadinataki au kina na Bete Levu kei ira kece na lewe ni Bose. Ni'u a taura mai vei ira na nodra i vola vei ira na Jiu mai Tamasiko, ka'u a lako sara me'u la'ki kauti ira mai vakavesu na tamata koya ki Jerusalemi me ra mai totogitaki kina” 6“Ia ni'u sa lako tiko ka'u sa voleka sara yani ki Tamasiko, e na sigalevu tutu, e a qai cila vakavolivoliti au vakasauri e dua na rarama levu mai lomalagi. 7Au sa qai bale sobu ki na qele ka'u qai rogoca e dua na vosa ni kaya mai vei au, ʻI Saula! I Saula! A cava ko vakacacani au tiko kina?ʼ 8Au a qai sauma, ka kaya, ʻ'O cei ʻo kemuni, Turaga?ʼ Sa qai kaya mai vei au ko koya, 'O i au ko Jisu na kai Nasareci, o koya ko sa vakacacana tiko.ʼ 9E ratou a raica na rarama oya ko iratou ka tiko vata kei au, ia e ratou a sega ga ni rogoca na domo i koya ka vosa vei au. 10Au sa qai kaya tale, ʻKemuni na Turaga, a cava me'u cakava.ʼ Sa qai kaya vei au na Turaga, ʻTucake, lako ki Tamasiko, ka na tukuni vei iko na ka kece ga sa lesi tu vei iko mo cakava.ʼ 11Ia me vaka ni'u a sega sara ga ni rai rawa e na vuku ni kena ramase na rarama koya, e ratou sa mani tuberi au ga kina ko iratou ka tiko vata kei au ka yaco sara ki Tamasiko. 12“E tiko e kea e dua na tamata na yaca na ko Ananaiasa, e tamata daulotu me vaka na ka e tu e na Lawa, ka vinaka na kena i rogorogo vei ira kece ga na Jiu era tiko kina. 13E a lako mai vei au ka mai tu e tikiqu ka kaya, ʻI na wekaqu Saula, mo rai tale!' E na tiki ni gauna vata ga koya au sa rai vinaka tale kina ka'u raici koya sara. 14E a qai kaya vei au ko koya, ʻSa lesi iko na nodra Kalou na noda qase mo kila na lomana, mo kilai Koya na nona Dauveiqaravi Yalododonu, ka mo rogoca sara ga na vosa mai na gusuna. 15Ni ko na dau tukuna vei ira kece ga na tamata, na veika ko sa raica ka rogoca. 16Ia oqo, a cava tale mo waraka? Tu cake, mo papitaisotaki, me vui laivi na nomu i valavala ca, ni ko sa masuta tiko na yacana.ʼ “ 17“Ia ni'u sa lesu tale mai ki Jerusalemi, au a mani la'ki masu tiko e na Valenisoro. Au a qai raica e dua na raivotu. 18Au a raica na Turaga ni kaya tiko vei au, ʻVakatotolo ka biuti Jerusalemi sara, ni ra na sega ni vakabauta na nomu i tukutuku baleti au.ʼ 19Au a qai kaya vua, ʻTuraga, era sa kila vinaka sara tiko ga ni'u a dau curuma na veivalenilotu ka vesuki ira ka vakanakuitataki ira era sa vakabauti kemuni. 20E na gauna a vakamatei kina na nomuni tamata ko Sitiveni, au a tu sara ga kina ka vakadonuya tu na kena caka ka'u a maroroya tiko na nodra i sulu na tamata era a vakamatei koya.ʼ 21Sa qai kaya ga vei au ko koya, ʻMo lako ga, ni'u sa na talai iko vakayawa ki vei ira na kai veimatanitu tani.ʼ “ 22Era a vakarogoci koya vakavinaka tiko me yacova ni sa cavuta na vosa oya. Era sa qai tabalaka cake mai na domodra, ka kaya, “Me kau tani e vuravura na tamata vaka oqo! Sa sega ni dodonu me bula tiko!” 23Ia ni ra sa qoqolou tiko ga, ka cebuceburaka na nodra i sulu, ka kaburaka ki macawa na kuvu ni qele, 24sa qai vakarota na turaganivalu liu me kau ki na i tikotiko ni valu ko Paula. A sa kaya tale ga me vakanakuitataki ka vakatarogi, me kilai kina na vu ni nodra qolouvaki koya na Jiu. 25Ia ni ra sa vesuki koya tu me sa kanakuita, sa qai kaya ko Paula ki vua na turaganivalu ka tu e tikina, “E tara li vei kemuni mo ni vakananakuitataka e dua na kai Roma ni sa sega mada ni lewai?” 26Ni sa rogoca na turaganivalu na ka oya, sa lako sara ka tukuna vua na turaganivalu liu, “Ni qarauna vinaka na ka ko vakarau cakava. Na tamata oqo e kai Roma” 27Sa mani lako na turaganivalu liu, ka kaya vei Paula, “Tukuna mada vei au, ʻo iko, ʻo kai Roma se sega?” Sa qai kaya ko koya, “Io!” 28A sauma na turaganivalu liu ka kaya, “O i au, au a sauma e dua na i lavo levu me'u yaco kina me'u kai Roma .” Sa qai kaya ko Paula, “Ia ʻo i au, au kai Roma e na noqu sucu.” 29E ratou sa mai lako tani sara ko iratou ka ratou a sa vakarau la'ki vakatarogi Paula tiko. A sa rere tale ga na turaganivalu liu ni sa qai kila ni kai Roma ko koya, kei na nona a sa vesuki koya tale ga. 30E na mataka ka tarava, ni sa via kila na turaganivalu liu na dina ni ka era beitaki Paula tiko kina ko ira na Jiu, sa mani sereki koya ka vakarota me ra soqoni vata yani ko ira na bete levu kei ira na lewe ni matabose e cake. Sa qai mai kauti Paula sobu yani ko koya ka la'ki vakaturi koya e matadra.

will be added

X\