CAKACAKA 21

1Keitou sa qai vakamoce vei ira; sa qai vakarewa na neitou laca ka keitou mai soko vakadodonu sara yani ki na yanuyanu ko Kosa; mai kea ki na koro ko Roti e na siga ka tarava; mai Roti keitou gole sara ki na koro ko Patara. 2E kea keitou mani raica kina e dua na waqa e vakarau soko tiko ki na yasana ko Finisia; keitou sa mani soko sara kina. 3Keimami soko tiko ka yacova sara yani e dua na vanua e rawa ni raici kina na yanuyanu ko Saipurusi. Keimami sa qai biuti Saipurusi toka e na i mawi ka gole sobu ki na ceva ki Siria, keimami a la'ki kele sara ki na koro ko Taia, ni la'ki sobu kina na i usana ni waqa. 4E kea keitou sota kina kei ira e so na vakabauta, ka keitou mani macawa dua vata tiko kei ira. E na veivakauqeti ni Yalo Tabu, era a cikevi Paula kina me kakua ni lako sara ki Jerusalemi. 5Ia ni sa oti na gauna koya, keitou sa qai cavu tu me keitou sa lako. Era sa qai lako kece yani ki na i bili ni koro me ra la'ki talaci keitou, ko ira kece kei ira na watidra, kei ira na luvedra. Keimami sa qai tekiduru e matasawa, ka masu, 6ka keimami veivakamocetaki. Keitou sa la'ki vodo ki waqa, ka ra sa suka tale ko ira ki na nodra veivale. 7Ni biu ko Taia keimami sa soko sara ki na koro ko Toleme. E kea keitou veikidavaki kina kei ira na vakabauta, ka tiko siga dua vata kei ira. 8E na mataka cake keimami sa qai biuta ka yaco sara yani ki Sisaria. Keitou a la'ki curu sara ki na vale i Filipi, na dauveivakalotutaki, ka keitou sa mani vakaicili toka kina. Ko Filipi oqo e dua vei iratou na lewe vitu ka a digitaki mai Jerusalemi. 9E va tiko na luvena goneyalewa ka ratou sa dauvunau kece. 10Ni sa oti e vica na siga na neitou tiko e kea, sa qai lako sobu mai Jutia e dua na parofita, a yacana ko Akapo. 11A lako sara yani vei keitou ka taura na i vaunisulu nei Paula ka vesuka kina na ligana kei na yavana, ka kaya, “Oqo na ka e kaya na Yalo Tabu, ʻEra na vesuki koya vaka oqo na i taukei ni vau oqo ko ira na Jiu mai Jerusalemi, ka soli koya ki na ligadra na kai veimatanitu tani.ʼ “ 12Ni keitou sa rogoca na veika oya, keitou sa qai vakamasuti koya vata kei ira na i taukei, me kakua ni lako cake ki Jerusalemi. 13Sa qai sauma ko Paula, ka kaya, “A cava ʻo ni tagicaka? 'O ni via vakadatuvutaka na lomaqu? 'O i au, au sa vakarau tu, me sega wale ga ni'u la'ki vesu ki Jerusalemi, ia me'u mate tale ga kina, e na vuku ni yaca ni Turaga ko Jisu!” 14Ia me vaka ni sa sega ni rawa me veisautaka na lomana, keimami sa mani laiva ga, ka kaya, “Me yaco ga na loma ni Turaga” 15Ni sa oti e vica na siga e kea, keitou sa qai vakasosolo tale ka lako cake sara ki Jerusalemi. 16Era lako vata tale ga kei keitou e so na tisaipeli mai Sisaria. Era sa qai kauti keitou sara vua e dua na kai Sipurusi me keitou la'ki tiko vua. A yaca ni tamata koya ko Nasoni, ka sa tisaipeli dede sara toka ko koya. 17Ia ni keitou sa yaco yani ki Jerusalemi, era sa tavaki keitou mai na vakabauta e na marau. 18E na kena mataka ka tarava, keitou sa qai lako vata kei Paula ka sikovi Jemesa, ka ra a tiko kece tale ga kina na qase ni lotu. 19Ia ni sa kidavaki ira oti ko Paula, sa qai tukuna yadudua na verka kece sara ka cakava na Kalou e na kedra maliwa na kai veimatanitu tani e na ligana. 20Ia ni ra sa rogoca oti na nona i tukutuku, era sa vakalagilagia na Kalou. Era sa qai kaya vua, “Paula, na weka i keimami, ko sa raica na kedra i wiliwili vakaitamera na Jiu era sa vakabauta kei na nodra dau gumatuataka na muria na Lawa i Mosese. 21Sa mai tukuni vei ira ni ko sa vakatavulici ira na Jiu e na kedra maliwa na kai veimatanitu tani me ra sa biuta na lawa i Mosese, ka tukuna tiko vei ira me ra sa kakua ni cilivi ira na luvedra se maroroya na i valavala vaka-Jiu. 22Era na rogoca tale dina ga ni ko sa yaco mai. A cava beka me na caka? 23Ia e vakaoqo na ka keitou vinakata mo cakava. E ratou tiko oqo e lewe va na tamata e ratou a cakava e dua na bubului. 24Mo kauti iratou, mo dou la'ki vakasavasavataki vata. Mo sauma na i sau ni kena tasivori na uludratou, me ra na kila kece kina ni a sega ni dina na veika a tukuni vei ira me baleti iko, ka ni ko sa dau muria tale ga na Lawa ko iko e na nomu i valavala. 25Ia e na vukudra na kai veimatanitu tani era sa vakabauta, keimami a sa vola oti vei ira na neimami lewa, oya me ra vakatabui ira ga mai na kakana sa vakacabori oti vei ira na kalou matakau, mai na dra tale ga, kei na ka sa kuna, kei na veibutakoci” 26Sa qai kauti iratou na tamata koya ko Paula e na mataka, ka vakasavasavataki koya vata kei iratou. Sa qai curu ki na Valenisoro ka la'ki tukuna kina na siga e na oti kina na veivakasavasavataki, ka me sa na qai vakacabori kina na i madrali me dui baleti iratou yadua. 27Ia ni sa vovoleka sara tiko ga ni cava na siga vitu, era sa qai raici koya e na Valenisoro e so na Jiu mai Esia. Era sa qai vakauqeti ira kece na lewe vuqa, ka vesuki Paula. 28A ra sa qoqolou ka kaya, “O i kemuni na Isireli, ni veivuke mai! Oqo na tamata sa vakatavulici ira tiko na tamata kece ga e na veivanua kece ga, me ra cati ira na noda; me ra cata na Lawa i Mosese kei na Valenisoro oqo. Ia sa yaco sara oqo me la'ki kauti ira mai e so na kai matanitu tani ki Valenisoro me mai vakadukadukalitaka kina na vanua tabu oqo!” 29Era kaya oya me baleta ni ra a raici rau vata kei Tirofimo na kai Efeso e na loma ni koro, ka ra nanuma ni a kauti koya tale ga ko Paula ki na Valenisoro. 30A maue na koro taucoko ka ra sa cici vata yani na tamata, ka tauri Paula, ka yarataki koya ki na tautuba ni Valenisoro; ka sa sogo sara na katuba. 31Ni ra sa vakasaga tiko ga me ra vakamatei koya, sa yaco na i tukutuku vua na turaganivalu liu ni matasotia, ni sa maue tiko ko Jerusalemi taucoko. 32A sega tale ni wawa ko koya, ka a kauta sara e so na sotia kei na so na turaganivalu ka ra cici sobu vei ira na tamata. Ia ni ra sa raici ira na sotia kei na turaganivalu liu ko ira na tamata, sa mudu sara na nodra vaculaki Paula. 33Sa qai lako sara yani na turaganivalu liu ka tauri koya, ka vakarota me vesu e na rua na sinucodo. Sa qai taroga vei ira na tu e kea, “O cei na tamata oqo? A cava e cakava?” 34Era sa qai kacivaka yani e so e dua na ka, ka so e dua tale na ka. Ia ni sa sega ga ni kila ko koya na kena dina e na vuku ni levu ni veilecayaki, sa mani vakarota me kau ko Paula ki na nodra i tikotiko na sotia. 35Ni sa yaco ko Paula ki na i kabakaba, era sa qai colati koya na sotia e na vuku ni nodra i valavala kaukauwa na tamata oya: 36ka ni ra muri tiko yani e dua na i lala levu, ka qolouvaka tiko, “Vakamatea!” 37Ia ni sa vakarau me curuma yani ko Paula na i tikotiko ni valu, sa qai kaya vua na turaganivalu liu e ua vosa Vakirisi, “E rawa beka ni'u tukuna vei kemuni e dua na ka?” Sa qai kaya na turaganivalu, “'O kila na vosa Vakirisi? 38E sega li ni ʻo iko na kai Ijipita ko a se tani mai na matanitu e na dua na gauna sa oti, ka liutaki ira kina ki na loma ni vanua e lewe va na udolu na lewe ni lala daulaba, na Sikari?” 39Sa qai sauma ko Paula ka kaya, “O i au e dua na Jiu, au a sucu mai na koro ko Tarisu, ka'u lewe ni dua na koro dokai e na yasana ko Silisia. Au sa kerei kemuni mo ni laivi au mada me'u vosa vei ira oqo .” 40Sa mani vakadonuya na turaganivalu me vosa ko Paula. Sa qai tu ko koya e na i kabakaba, ka vakatabataba vei ira na tamata. Ni ra sa tiko lo kece sara, sa qai vosa vei ira e na vosa vaka-Iperiu.

will be added

X\