CAKACAKA 20

1Ni sa oti na leqa oya, sa qai kacivi ira na vakabauta ko Paula, ka tauca vei ira e dua na vosa ni vakadre, ka sa qai biuta me lako ki Masitonia. 2A lakova na veiyasana kece koya ko koya, ka vakaukauwataki ira na lewena e na vuqa na vosa, ka mani yaco sara yani ki na vanua ko Akaia. 3E a tiko e kea ka vula tolu. Ia ni sa vakarau me gole ki Siria, sa qai kunea ni ra nakicataki koya tiko na Jiu. Sa mani lewa kina me sa na muri tale ki Masitonia ni sa lesu. 4E ratou a salavata kaya ko iratou ko Sopate, na luve i Pairasi mai Piria; ko rau ko Arisitako kei Sekudu mai Cesalonaika; ko Keio mai Tapi, ko Timoci, kei rau ko Tikrko kei Tirofimo mai Esia. 5E ratou a liu tu ko iratou oya ka ratou la'ki waraki keitou mai Tiroa. 6Ia ni sa oti na Solevu ni Madrai Sega ni Vakaleveni keitou sa qai soko mai Filipai ka yaco vei iratou ki Tiroa ni sa oti e lima na siga, ka keitou macawa dua e kea. 7Ia e na i matai ni siga ni macawa, ni keimami sa soqoni vata me caka na dovi madrai, sa qai vunau vei ira ko Paula. E a vosa tiko ko koya ka yacova sara yani na lomaloma ni bogi ka ni sa na lako tiko e na kena mataka cake. 8E a ka levu sara na cina e na i taba vale e cake, e na vanua keimami soqo vata tiko kina. 9Ia e dua na cauravou, a yacana ko Autiko, e a dabe toka e na dua na katuba leka ka mani sosovu sara, ni sa balavu tiko na vosa i Paula. Ia ni sa biti koya vakalevu na moce sa qai lutu ki ra mai na i katolu ni taba vale e cake. Ni ra qai keveti koya cake, sa mate tu. 10Sa qai lako sobu ko Paula ka la'ki davoci koya ka mokota. Ia ni sa duri cake tale sa kaya, “Ni kakua ni taqaya, e se bula tiko ko koya!” 11Sa qai lako cake tale ko Paula ka la'ki dovi madrai ka kana ka ra sa qai mai veivosaki tiko yani vakadede ka yacova ni sa kida na mataka; oti koya sa qai biuti Ira sara ka lako. 12Sa mani bula na cauravou ka ra sa mani kauta ki na nona vale; a ra sa vakacegui vakalevu sara kina. 13Keitou sa mani liu ki waqa ka soko sara ki na koro ko Aso, na vanua me keitou na qai la'ki vakavodoki Paula kina ka ni a tukuna vei keitou ko koya me keitou cakava, oya ni via muri e vanua ko koya. 14Ia ni keitou sa sota mai Aso, keitou sa qai vakavodoki koya, ka gole sara ki na koro ko Mitilini. 15Keitou soko tale mai kea ka soko ravita na yanuyanu ko Klo e na siga ka tarava. Keitou yaco yani ki na yanuyanu ko Samo e na siga ka tarava, ia e na siga tale ka dua keitou sa yaco sara ki na koro ko Milito. 16E a sa lewa tu ko Paula me kakua ni la'ki sobu ki Efeso ka me na kakua kina ni tiko vakadede tale mai Esia. E a vakatotolo tiko, ka nuitaka, kevaka e mani rawa, me na fiko ma Jerusalemi e na siga ni Penitiko. 17Ia e a mani talatala ga ko Paula mai Milito ki Efeso ka kerea me ra lako mada yani vua na qase ni lotu mai kea. 18Ni ra sa yaco yani vua, sa qai vosa vei ira ko koya, ka kaya, “Ko ni sa kila na i tovo ni noqu tiko voli vei kemuni e na veisiga kece ga, me vakatekivu mai na i matai ni siga au a yaco yani kina ki Esia. 19Au a qarava na Turaga e na yalomalumalumu sara kei na wai ni mataqu e na gauna dredre au sota kaya e na nodra a nakicataki au na Jiu. 20Ko ni kila ni'u a sega ni vunia vei kemuni e dua na ka e na yaga vei kemuni, e na noqu vakatavulici kemuni e na veisoqoni ka caka e na matana levu kei na veivale. 21E vaka tale ga kina vei ira na Jiu kei ira na kai Kirisi, au a vakarota vei ira me ra veivutuni mai na nodra i valavala ca ka vakabauta na noda Turaga ko Jisu Karisito. 22Ia oqo au sa lako tiko ki Jerusalemi e na veituberi ni Yalo Tabu, ka'u sega ni kila se cava e na yaco vei au mai kea. 23Na ka ga sa vakatakila tiko vei au na Yalo Tabu e na veikoro kece ga, ni sa waraki au tu mai na valeniveivesu kei na veika rarawa. 24Ia sa sega tu ni'u okata me dua na ka na noqu bula; na ka ga au gadreva oya me'u na vakaotia vakavinaka na noqu i lakolako, kei na i tavi sa solia vei au na Turaga ko Jisu, oya me'u vunautaka na i Tukutuku Vinaka ni loloma soli wale ni Kalou. 25“Ia oqo au sa kila ni sa na sega ni raica tale na mataqu e dua vei kemuni; o i kemuni ka'u a dau lako voli e na kemuni maliwa, ka vunautaka kina na Matanitu ni Kalou. 26O koya gona, au sa tukuna vakadodonu kina vei kemuni e daidai ni sa na sega ni noqu cala kevaka e na mani cudruvi e dua vei kemuni. 27Ka ni'u a sa vakamacalataka vakavinaka sara vei kemuni na i naki ni Kalou, ka sega ni vunia e dua na tikina. 28O koya gona, mo ni qai qarauni kemuni vinaka kei ira kece ga na qele ni sipi sa lesi kemuni kina na Yalo Tabu mo ni kedra i vakatawa. Ni vakania na i soqosoqo lewenilotu ni Kalou, na lotu ka a volia ko koya e na nona dra. 29Au kila ni'u sa na lako tani e ke, era na curu mai e na kemuni maliwa e so na wolifa daukata, ka ra na sega ni via laiva me dro bula e dua vei ira na qele ni sipi. 30Era na tubu tale ga mai e so vei kemuni, ka ra na mai vakatanitaka na i vakavuvuli dina me ra vakayarayarataki ira kina na vakabauta ki vei ira. 31O koya gona mo ni qai yadra tiko, ka kakua ni guilecava na noqu a sega ni cegu, e na siga kei na bogi, e na loma ni tolu na yabaki, ni vakasalataki kemuni tiko ka tagicaki kemuni. 32“Ia oqo au sa tataunaki kemuni vua na Kalou kei na i tukutuku ni nona loloma, na loloma ka sa rawata me vakatuburi kemuni cake; me solia tale ga me nomuni na i votavota sa maroroya tu me nodra na nona tamata. 33Au a sega ni domona na nona siliva, se koula, se i sulu e dua na tamata. 34Ko i kemuni vaka i kemuni ko ni kila ni a dau cakacaka ga na ligaqu oqo me baleta na ka e yaga vei au kei iratou tale ga e ratou tiko vata kei au. 35Au a sa vakaraitaka vei kemuni na veika kece sara; au a vakaraitaka ni sa dodonu e na noda cakacaka vakaukauwa me da dau vukei ira na malumalumu, ka nanuma tiko na vosa ni Turaga ko Jisu, e na nona a kaya, ʻSa kalougata vakalevu cake me da solia na ka, ka sega soti na noda dau ciqoma na ka.ʼ “ 36Ni sa vosa oti vaka oya ko koya, era sa qai tekiduru vata kece ka masu. 37E sega ni dua vei ira me sega ni tagi, ka ra sa mokoti koya ka reguca. 38Sa rarawa vakalevu sara na lomadra e na nona a kaya ni ra sa na sega tale ni raica na matana. Oti koya era sa qai mai kauti koya sara yani ki waqa.

will be added

X\