CAKACAKA 2

1Ia ni sa yaco mai na siga ni Penitiko, era sa soqoni vata tiko e na dua na vanua ko ira na vakabauta. 2Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, ka vakasinaita na vale taucoko era tiko kina. 3Sa qai rairai vei ira na ka e vaka na yameyame ni buka waqa, sa veisebayaki, ka la'ki toka e na buradela ni tamata yadua. 4A ra sa vakasinaiti kece ga e na Yalo Tabu, ka sa vakatekivu me ra vosataka na veivosa tani e so, me vaka sa solia vei ira na Yalo Tabu. 5Era a tiko e Jerusalemi e so na Jiu, era tamata lotu, ka ra lako mai na veivanua kece ga e na ruku i lomalagi. 6Ia ni sa rogo yani na rorogo oya, era sa qai soqoni vata kina na lewe vuqa; ka ra sa kurabui ni ra rogoci ira era sa vakabauti Jisu ni ra vosa tiko e na nodra dui vosa na tamata yadua. 7Era sa kurabui kece ga ka qoroqoro, ka kaya vaka i ira, “Raica, e sega li ni ra kai Kalili kece ko ira ka vosa tiko oqo? 8Ia e qai rawa vakacava me ra vosataka na noda dui vosa me vaka e da sa rogoca tiko oqo? 9Raica mada na vanua e da dui lako mai kina, Paricia, Mitia, kei Ilama, kei ira ka tiko mai Mesopotemia; kei Jutia, kei Kapatosia, mai Ponito kei Esia, 10mai Firijia, kei Pamifilia, mai Ijipita, kei na yasayasa vaka Lipia e voleka ki Kirini; kei ira na vulagi mai Roma, ko ira na kai Jutia, kei ira na vuki mai ki na lotu vaka-Jiu; 11ko ira na kai Kiriti kei Arapea. Eda sa rogoca kece ni ra vosataka e na noda dui vosa na cakacaka veivakurabuitaki ni Kalou.” 12Era sa kurabui kece ga ka taqaya, ka veikayaka vakai ira, “A cava na i balebale ni ka oqo?” 13Ia e so era vakalialiai ira era vakabauti Jisu, ka kaya, “Era sa mateni e na waini vou” 14Sa qai tucake ko Pita kei iratou na lewe tinikadua, ka tabalaka cake na domona, ka kaya vei ira, “O i kemuni na Jiu, kei kemuni kece ga ka tiko oqo e Jerusalemi! Ni rogoci au mada ka vakatudaliga ki na noqu vosa. 15E ratou sega ni mateni ko iratou oqo, me vaka ko ni nanuma, ka ni sa qai ciwa ga oqo na kaloko e na mataka. 16Ia sa i koya oqo na ka a sa kaya oti tu ko Joeli na parofita: 17ʻSa kaya na Kalou, “Sa i koya oqo na ka au na cakava e na gauna mai muri. Au na sovaraka na Yaloqu vei ira na tamata kece ga; era na parofisai ko ira na luvemuni tagane kei ira na luvemuni yalewa, ka ra na raica e so na raivotu ko ira na nomuni cauravou, ka ra na tadra na tadra e so ko ira na nomuni qase. 18Io, vei ira tale ga na noqu bobula, na tagane kei na yalewa, Au na sovaraka vei ira na Yaloqu e na gauna koya ka ra na parofisai kina. 19Ka'u na cakava tale ga na veika e veivakurabuitaki e na lomalagi e cake kei na veivakatakilakila e so e na vuravura e ra; na dra, kei na bukawaqa, kei na o kubou. 20E na vuki na matanisiga me butobuto, ka na damu na vula me vaka na dra ni bera ni yaco mai na Siga ni Turaga, na siga lagilagi ka rogo. 21E na qai yaco ni na qai vakabulai ga ko koya e masuta na yaca ni Turaga.ʼ “ 22“O i kemuni na Isireli, ni rogoca mada na veika oqo! Ko Jisu na kai Nasareci, e dua ka sa vakadinadinataki koya oti na Kalou vei kemuni e na cakacaka mana, na veika veivakurabuitaki, kei na i vakatakilakila e so, ka a solia na Kalou vei koya me cakava e na kemuni maliwa, me vaka ko ni sa kila. 23E a soli yani ko Jisu vei kemuni me vaka ga sa nakita ka kila e liu na Kalou. Ko ni a qai tauri koya ka vakota ki na kauveilatai, ka vakamatea e na ligadra na tamata ca. 24Ia sa qai vakaturi koya cake tale na Kalou ni sa sereki koya mai na i vau ni mate, ni sega ni rawa me vauci tiko ga kina. 25Ni a sa kaya tu ko Tevita me baleti koya, ʻAu a sa raica rawa tiko ni na dau tiko vata ga kei au na Turaga; ni sa tu ko koya e na yasaqu i matau, me'u kakua kina ni yavalati. 26O koya gona sa reki kina na lomaqu, ka marau na yamequ; ka na vakacegu tale ga na yagoqu e na vuku ni veika sa nuitaki tiko. 27Ni ko ni na sega ni biuta tu na yaloqu mai Etesi, se laiva na nomuni Le Dua Yalo Savasava me luca mai. 28Ko ni sa vakatakila vei au na sala ni bula; ko ni na vakasinaiti au e na marau e na nomuni tiko vata kei au.ʼ 29“O i kemuni na veiwekani, ni vosota me'u tei tukuni Tevita vakadodonu mada vei kemuni. E a sa mate ko koya, ka bulu, ka se tu ga oqo vei keda na kena i bulubulu me yacova na siga e daidai. 30Ia me vaka ni a dua tale ga na parofita ko koya, sa kila tiko ni a sa bubului oti vua na Kalou ni na vakatubura e dua mai vei ira na nona kawa me na sosomitaki koya e na nona i tutu vakatui. 31Sa raica rawa kina ko Tevita ka vosataka tale ga na tu cake tale mai na mate i Karisito, ka ni na sega ni biu tu mai Etesi, se me na luca na yagona. 32Sa i koya sara ga na Jisu oqo ka a vakatura cake tale mai na mate na Kalou, ka keitou sa kena i vakadinadina kece ko i keitou oqo. 33Ni sa kau cake ki na liga i matau ni Kalou ko koya, sa solia kina vua na Tamada na Yalo Tabu ka a yalataka, sa qai sovaraka mai kina oqo ko koya na ka ko ni sa raica ka rogoca. 34Ni a sega ni lako cake ki lomalagi ko Tevita; ia sa i koya ga ka a kaya, ʻSa kaya na Turaga vua na noqu Turaga, Mai dabe e na yasaqu i matau, 35me yacova ni'u sa biuti ira na nomu meca, me ra i tutu ni yavamu.ʼ 36“O koya oqo mo ni kila kece sara kina na Isireli, ni ko Jisu oqo, o koya ko ni a vakota ki na kauveilatai, sa i koya ka sa lesia na Kalou me Turaga, ka Karisito tale ga” 37Ia ni ra sa rogoca na tamata na vosa koya sa laucoka na lomadra, ka ra sa kaya vei Pita kei iratou na vo ni apositolo, “O i kemudou na weka i keimami, a cava me keimami cakava?” 38Sa qai kaya vei ira ko Pita, “O i kemuni yadua mo ni veivutuni ka papitaisotaki e na yaca i Jisu Karisito, me bokoci kina na nomuni i valavala ca, ka na qai soli vei kemuni na i loloma ni Kalou, koya na Yalo Tabu. 39Ni a caka na vosa ni yalayala ni Kalou, vei kemuni kei ira tale ga na nomuni gone, kei ira kece ga era tiko vakayawa, io vei ira kece ga e na kacivi ira ki vua na Turaga na noda Kalou.” 40E a tusanaka e vuqa tale na ka ko koya, ka vakauqeti ira kina, ka kaya, “Ni vakabulai kemuni mai na i tabatamata takelo oqo.” 41Era sa mani papitaisotaki ko ira era vakabauta na nona vosa; ka rauta e 3,000 na tamata e vakaikuritaki kina na kedra i wiliwili na vakabauta e na siga koya. 42A ra sa soli ira vakatabakidua ki na nodratou veivakatavulici na i apositolo, na tiko vakaveitokani, na dovi madrai kei na masumasu. 43A yacovi ira kece ga na tamata na rere e na levu ni cakacaka mana kei na veika veivakurabuitaki e ratou cakava na i apositolo. 44Era sa la'ki tiko vata tiko ga ko ira kece sa vakabauta, ka ra dui solia na nodra i yau me ra taukena vata. 45Era volitaka na nodra vanua kei na nodra i yau, ka vota na kena i lavo ki vei ira kece, me vaka na ka e ganita na tamata yadua. 46Era dau tiko e na lomavata e na Valenisoro e na veisiga, ka dovi madrai e na nodra veivale, ka kania na kedra e na marau kei na loma vinaka. 47A ra sa vakavinavinaka tiko vua na Kalou, ka ra sa taleitaki mai vei ira na tamata kece ga. Ia e na veisiga kece sa vakuria tiko ga na Turaga ki na nodra i soqosoqo na tamata era sa vakabulai tiko mai.

will be added

X\