CAKACAKA 19

1E na gauna e tiko kina mai Korinica ko Apolosi e a lakova na veiyasana e na loma ni vanua ko Paula ka mani yaco sara ki Efeso. E a kunea e kea e so na tisaipeli, 2ka kaya vei ira, “E vakaevei, sa curumi kemuni li na Yalo Tabu e na nomuni sa vakabauta se sega?” Era sa qai kaya vua, “Keimami sa sega mada ga ni bau rogoca ni dua tiko na Yalo Tabu .” 3Sa qai kaya vei ira ko Paula, “Ia ko ni a papitaisotaki ga e na papitaiso cava?” Era sa qai kaya, “E na papitaiso i Joni” 4Sa qai kaya ko Paula, “A veipapitaisotaki ko Joni me baleti ira e ra sa veivutuni, ia e a qai dau kaya tiko ko koya vei ira na tamata me ra na vakabauta e dua ka na muri koya tiko yani, ʻo ya ko Jisu .” 5Ia ni ra sa rogoca oya era sa qai papitaisotaki sara e na yaca ni Turaga ko Jisu. 6Ia ni sa tabaki ira e na ligana ko Paula sa sobuti ira sara na Yalo Tabu, ka ra sa vosataka na vosa tani e so, ka vunau. 7E rauta ni ra lewe tinikarua taucoko ko ira koya. 8Sa qai dau curu ki na nodra valenilotu na Jiu ko Paula ka dau vosa kina vakadoudou. A sa kitaka tiko koya ko koya ka tolu na vula. A sa veivakatavulici ka vakauqeti ira na tamata me baleta na matanitu ni Kalou. 9Ia e so ga era sa lomaqa ka bese ni vakabauta, ka vosacataka na Sala ni Turaga e na matadra na lewe vuqa. Sa mani biuti ira tu yani ko Paula ka kauti ira vakatikitiki na tisaipeli. Sa qai dau la'ki veivakavulici tiko e na veisiga e na valenivuli nei Tirano. 10E a vaka tiko oya ka rua na yabaki, ka ra sa rogoca kina na vosa ni Turaga ko ira kece na lewe ni yasana ko Esia, ko ira na Jiu kei ira tale ga na kai veimatanitu tani. 11A sa cakava tiko na Kalou na cakacaka mana ka veivakurabuitaki e so e na liga i Paula. 12Na i tavoi kei na i sulu e so ka sa tara oti na yagona era sa qai dau kauta na tamata ki vei ira na tauvimate, ka sa takali kina vei ira na kedra mate, ka ra lako laivi tale ga kina na tevoro. 13E ratou a tovolea tale ga e so na Jiu dauvakasavi tevoro ka ratou dau veilakoyaki voli me ratou cavuta na yaca ni Turaga ko Jisu vei ira era curumi tevoro tu, ka kaya, “Au sa vakaroti kemuni e na yaca i Jisu, o koya e vunautaka tiko ko Paula.” 14E ratou a dau cakava tiko na ka koya ko iratou na luve i Sikeva tagane e ratou lewe vitu. Ko Sikeva e dua na nodra Bete Levu na Jiu. 15Sa qai sauma na tevoro ka kaya vei iratou, “Ko Jisu au kila, ko Paula tale ga au kila, ia ko cei ko i kemudou?” 16Sa qai rikati iratou na tamata curumi tevoro, ka vakamalumalumutaki iratou sara. E ratou sa qai dro laivi mai na vale koya: a ratou sa luvawale ka mavoa. 17Era a qai rogoca na ka koya ko ira kece ga na Jiu kei ira na kai veimatanitu tani era tiko mai Efeso. A sa tuburi ira kece kina na rere, ka sa tubu cake tiko ga na dokai ni yaca ni Turaga ko Jisu. 18E ra sa qai lako yani e lewe vuqa vei ira na tamata vakabauta ka vakatutusa, ka vakaraitaka e na matana levu na veika era a dau cakava e liu. 19E lewe levu tale ga vei ira era daukilakila, era sa kumuna vata na nodra i vola ka la'ki vakama e na matadra kece ga. Era a cakacakataka na i sau ni veika kece koya ka kunea ni rauta e limasagavulu na udolu na i lavo siliva. 20A sa tete tiko ga yani na vosa ni Turaga ka sega ni tarovi rawa. 21Ni sa oti na veika oya, sa qai nakita e yalona ko Paula me sa lakovi rau mada na yasana ko Masitonia kei Akaia ka me oti koya me qai gole sara ki Jerusalemi. A kaya, tale ga, “Ni sa oti oya, me'u sa na la'ki raici Roma tale ga.” 22Sa mani mai talai rau sara yani e lewe rua vei ira na nona i vukevuke, ko Timoci kei Erasito, me rau lako ki Masitonia, ka ni se tiko vakalailai tale mada ko koya mai Esia. 23Sa qai tubu e na gauna koya e dua na leqa levu e na vuku ni Sala ni Turaga. 24E tiko kina e dua na tamata, a yacana ko Timitirio, e matai ni kaukamea ka dau caka i vakatakarakara siliva ni burekalou ni nodra kalou yalewa ko Atemisa, ka dau levu sara kina na i lavo era rawata na tamata cakacaka. 25Sa qai tu ko Timitirio ka kacivi ira vata na tamata cakacaka kei ira na tamata e mataqali vata kei koya na nodra cakacaka ni liga, ka kaya, “Kemuni na noda, ko ni sa kila ni sa cakacaka ga oqo eda sa rawata vakalevu sara tiko kina na noda i yau. 26Ia ko ni sa raica tiko ka rogoca na ka sa cakava tiko na tamata oqo ko Paula. E kaya tiko ni kalou e cakava na tamata e sega ni kalou dina. Sa vuqa sara na tamata e rawai, e Efeso ka vaka kina e na yasana taucoko ko Esia. 27Na ka e taqayataki, e sega wale ga ni kena sa na rawa ni beci kina na noda cakacaka, ia sa na rawa ni vakawaletaki tale ga kina na valenisoro ni marama kalou levu ko Atemisa, ka me lutu kina mai na nona i tutu lagilagi, ko koya era sa lotu vua ko ira kece e Esia kei na vo ni vuravura” 28Ni ra sa rogoca oya, sa dua tani na nodra cudru, ka ra sa tekivu qoqolou, ka kaya, “Sa cecere duadua ga ko Atemisa na kalou ni Efeso!” 29A sa maue na koro taucoko. Era sa qai tauri Keio vakaukauwa kei Arisitako, ko i rau na kai Masitonia ka salavata voli mai kei Paula, ka ra cici vakaukauwa vata kece ki na nodra vale levu ni soqo. 30A via lako ko Paula me la'ki sota sara kei ira na tamata oya, ia era a qai tarovi koya na lewe ni lotu. 31Era a talatala tale ga vua ko ira e so na vakaitavi lelevu ni Esia, ka ra nona i tokani, ka masuti koya me kakua ni douvaka me lako ki na vale ni soqo. 32Ia sa levu na veilecayaki e na vanua ni soqo; era a qolouvaka e dua na ka ko ira e so, ka dua tale na ka ko ira e so, ka lewe vuqa vei ira era sega ni kila se cava era a soqoni vata yani kina. 33Era sa mani nanuma e so ni a vakavuna na soqo ko Alekisada ka ni ra a kauti koya na Jiu me la'ki tu mai liu. Sa qai vakatabataba ko Alekisada, ka via tauca e dua na vosa me taqomaki koya kina. 34Ia ni ra sa kila ni dua na Jiu ko koya, sa qai tubu vata mai vakadua na domodra ka ra qolou vata tiko me rauta e rua na aua, ka kaya, “Sa cecere duadua ga ko Atemisa na kalou ni Efeso!” 35Ia e a qai mani rawata na vunivola ni koro me vakamalumutaka na lomadra na tamata. E a kaya vei ira, “O i kemuni na kai Efeso, ʻo cei beka na tamata e sa sega tiko ga ni kila ni sa i vakatawa ni valenisoro ni kalou levu ko Atemisa, kei na vatu tabu ka a lutu mai lomalagi na noda koro ko Efeso? 36Me vaka ni sega ni rawa ni dua e vakalasuya na veika oqo sa dodonu kina mo ni tiko vakamalua, ka kakua ni cakava vakaveitalia e dua na ka. 37Ko ni sa kauti ira mai ki ke na tamata oqo, ia era sega ni butakoca e dua na ka mai na valenisoro se ra vosa vakacacataka na noda yalewa kalou. 38O koya gona oya kevaka era vinakata ko Timitirio kei ira na nona matamatai me ra beitaka e dua na tamata, sa tu na mataveilewai, kei ira na turaganilewa; ka me ra la'ki veibeitaki ga kina. 39Ia kevaka ga e tiko e dua tani tale na ka ko ni via taroga, e na qai dau macala ga e na dua na soqoni vakalawa ka dau vakayacori. 40Ni da sa toka sara ga oqo e na dua na i tokatoka ca, ka sa rawa ni da la'ki vaqaqai e na vuku ni mamaue ka yaco e daidai. E sega sara ga ni dua na kena i ulubale, ka na dredre me da vakamacalataka e dua na vuna vinaka.” 41Ia ni sa vosa oti vaka oya, sa qai vakasukai ira yani.

will be added

X\