CAKACAKA 18

1Ni oti oya, sa qai biuti Aceni ko Paula ka lako sara ki na koro ko Korinica. 2E kea e a sota kina ko koya kei na dua na Jiu; ka yacana ko Akuila. E a sucu mai na vanua ko Ponito ko koya, ka rau sa qai lako wale ga yani oya mai Itali kei na watina ko Pirisila ni sa vakarota na tui ko Kilotiu me ra vagalala tani mai Roma ko ira kece na Jiu. Sa mai lako yani vei rau ko Paula, 3ka la'ki tiko vata kei rau, ka ni ratou mataqali cakacaka vata, e ratou dau caka vale laca. 4Ia e na Veisiga ni Vakacecegu sa dau vunau ko koya e na nodra veivalenilotu na Jiu ka saga me rawai ira kina na Jiu kei ira na kai Kirisi. 5Ia ni rau sa yaco yani ko Sailasa kei Timoci e na nodrau i lakolako mai Masitonia, sa qai solia vakatabakidua na nona gauna ko Paula me vunau kina, ka tusanaka tiko vei ira na Jiu ni sa Karisito dina ga ko Jisu. 6Ia ni ra sa saqati koya ka vosacataki koya, sa qai kuretaka na kuvu ni qele mai na nona i sulu ka kaya vei ira, “Ke ko ni rusa sa na bale ga vei kemuni, sa sega ni bale vei au. Sa tekivu oqo me'u sa na golevi ira na kai veimatanitu tani” 7Sa mai lako sara ko Paula ka la'ki curu ki na vale ni dua na kai matanitu tam, a yacana ko Taito Jasitu, e dua ka dau lotu vua na Kalou, ka toka tarava na nodra valenilotu na Jiu na nona vale. 8Sa mani vakabauta tale ga na Turaga ko Kirisipo, na i liuliu ni valenilotu, kei iratou kece na nona lewe ni vale. Era sa vakabauta ka papitaisotaki tale ga e lewe vuqa na kai Korinica era sa rogoca na i Tukutuku Vinaka. 9Sa qai kaya vei Paula na Turaga e na dua na raivotu e na bogi, “Kakua ni rere! Mo vosa tiko ga, ka kakua ni galu: 10ni'u sa tiko vata kei iko, ka na sega ni dua e na rawa ni tarai iko; ni ra lewe vuqa tiko e na koro oqo era noqu tamata” 11Sa mani tiko e kea ko Paula me dua veimama na yabaki, ka vakatavulici ira tiko e na vosa ni Kalou. 12Ia e na gauna e kovana tiko kina mai na yasana ko Akaia ko Kalio, era a qai soqoni vata na Jiu ka tauri Paula vakaukauwa ka kauta ki na mataveilewai, ka la'ki kaya kina, 13“Na tamata oqo e vakasagai ira tiko na tamata me ra lotu vua na Kalou e na dua na i vakarau ka sega ni dodonu vakalawa” 14Ia ni sa vakarau me vosa ko Paula, sa qai kaya vei ira na Jiu ko Kalio, “O i kemuni na Jiu, kevaka e baleta e dua na caka cala se dua na vakacaca levu na ka oqo, ke a dodonu me'u kauwaitaki kemuni kina. 15Ia kevaka e baleta ga na vosa se yaca e so kei na nomuni lawa, o kemuni ga mo ni vakatulewa kina. Au sega ni vinakata me'u turaganilewa ni veika vakaoqo” 16Oti oya sa qai vakasavi ira tani mai na vanua ni veilewai. 17Era sa qai tauri Sosiceni, na i liuliu ni valenilotu, ka vaculaki koya e na mata ni vale ni veilewai; ia e a sega sara ni bau kauwai e na ka oya ko Kalio. 18E a tiko voli e kea ko Paula e na vica tale na siga, ka sa qai tatau vei ira na vakabauta ka soko ki na nodra vanua na kai Siria, ka rau soko vata kei koya ko Akuila kei Pirisila. Ia ni bera ni ratou biuti Kenikiria e a tasivoritaki na ulu i Paula e na vuku ni dua na bubului ka a cakava e kea ko koya. 19Ni ratou sa yaco ki na koro ko Efeso, sa mani la'ki biuti rau ko Akuila kei Pirisila ko koya ka curu sara ki na nodra valenilotu na Jiu ka vakatavulici ira. 20Era a kerei Paula me tiko vakalailai tale mada kei ira, ia e a mani sega ni vakadonuya, 21ka kaya ga ni sa tatau me lako, “Au na lesu tale mai vei kemuni, kevaka e na vaka kina na loma ni Kalou .” Oti koya sa mai biu sara yani ko Efeso. 22Ia ni sa yaco yani ki Sisaria sa lako cake sara ki na vanua ko Jerusalemi me veikidavaki kei ira na i soqosoqo lewe ni lotu. Oti koya sa qai lako sobu tale ki baravi ki na koro ko Anitioki. 23Ni oti ga e vica na gauna na nona tiko e kea, sa biuta tale ka lakova na veikoro e na yasayasa vaka-Kalatia kei Firijia, ka vakayaloqaqataki ira kece era sa lotu. 24E na gauna koya e a qai yaco yani kina ki Efeso e dua na Jiu ka yacana ko Apolosi: e a sucu mai na koro ko Alekisadria ko koya. E tamata matai e na vosa ko koya ka buta vinaka tale ga e na i Vola Tabu. 25E a sa tuberi oti ko koya e na Sala ni Turaga, ka sa dau qacoya ni vosa se vakatavuvulitaka vakadodonu na veika e baleti Jisu, ia e sa kila wale tiko ga ko koya na papitaiso i Joni. 26A sa tekivu me vosa vakadoudou e na valenilotu. Ia ni rau sa rogoci koya ko Pirisila kei Akuila e rau sa qai vakamatataka sara vua na Sala ni Kalou. 27Oti koya sa qai via lako ki Akaia ko Apolosi; e ra sa qai volavola vei ira na vakabauta mai Akaia ko ira mai Efeso ka tataunaki koya vakabibi vei ira. Ia ni sa yaco yani kina sa vukei ira vakalevu sara na tamata era sa yaco me ra vakabauta e na vuku ni loloma soli wale ni Kalou. 28Sa gumatua sara ko koya ni rawai ira na Jiu e na veileti e matana levu e na nona vakadinadinataka mai na i Vola Tabu ni sa Karisito dina ga ko Jisu.

will be added

X\