CAKACAKA 17

1Ia ni ratou sa biuti rau na koro ko Amifipoli kei Apolonia e na nodratou i lakolako e ratou sa yaco sara yani ki na koro ko Cesalonaika. E tiko e kea e dua na nodra valenilotu na Jiu. 2Me vaka ga na i vakarau i Paula e a la'ki curu sara ko koya ki na nodra valenilotu. E na tolu na Siga ni Vakececegu e tiko kina e kea, a vakamacala vei ira mai na i Vola Tabu. 3E a serelaka vei ira na lewena ka vakadinadinataka mai kina ni a sa dodonu ga me vakararawataki, na Karisito ka me qai vakaturi cake tale mai na mate. E a kaya tale ga, “Ko Jisu ka'u kaya tiko oqo vei kemuni, sa i koya sara ga na Karisito!” 4Era a mani vakabauta e so, ka ra sa gole sara me ra veitokani kei rau ko Paula kei Sailasa; e vaka tale ga kina e lewe levu toka na marama dokai kei na dua na i wase levu ni kai Kirisi lotu vaka-Jiu. 5Ia era sa qai vuvu kina na Jiu. Era sa qai vakasoqoni ira e so na tamata ca ka ra yavoki wale tu ga e na makete ka vakatubura e dua na vakasausa levu e na loma ni koro taucoko. Era sa qai curuma vakaukauwa na vale i Jesoni ka vakasaqarai iratou kina me ra kauti iratou ki na soqoni vakoro. 6Ia ni ra sa sega ni kunei iratou rawa, era sa qai yarataki Jesoni yani kei iratou e so na vakabauta ki na matadra na turaganilewa ka i liuliu ni koro, ka kacivaka vei iratou, “Ko iratou ka ratou tiko oqo e ratou sa vakatubu leqa e na veivanua kece ga! Ia oqo e ratou sa lako sara mai ki na noda koro, 7ka qai mai maroroi iratou ko Jesoni. Era veisaqasaqa tiko ko ira kece oqo kei na lewa ni Sisa, ni ra kaya voli ni sa tiko tale e dua na tui ka yacana ko Jisu!” 8E na vosa koya era sa vakayavalati vakalevu sara kina na lewe vuqa kei iratou na veiliutaki. 9E ratou sa qai lewa na veiliutaki me sauma ko Jesoni e dua na i lavo me rawa ni ratou sereki kina kei iratou na vesu vata tiko. Ia ni sa sauma oti era sa qai laivi iratou me ratou lako. 10Ni sa buto mai na vanua era sa qai vakauti rau sara ko Paula kei Sailasa ki na koro ko Peria ko ira na vakabauta. Ni rau sa yaco kina e rau sa lako sara ki na nodra valenilotu na Jiu. 11Ia ko ira e kea era tamata yalo vakaturaga cake mai vei ira mai Cesalonaika. Era taleitaka vakalevu na vakarogoca na vosa, ka ra sa dau vakasaqaqara e na i Vola Tabu e na veisiga me ra raica kina se sa dina na veika era rogoca se sega. 12A sa yaco kina me ra vakabauta e lewe vuqa vei ira, ka vuqa tale ga vei ira na marama dokai ni Kirisi, kei ira na turaga. 13Ia ni ra sa kila na Jiu mai Cesalonaika ni sa la'ki vunautaka tale ga na vosa ni Kalou mai Peria ko Paula, era sa qai lako tale ga kina, ka la'ki vakayavalati ira na lewe vuqa. 14A ra sa vakatotolo sara na veiwekani ka ra vakauti Paula sobu vaka ki matasawa; ia e rau a tiko laivi tiko ga e kea ko Sailasa kei Timoci. 15E ratou a kauti Paula sara ki na koro ko Aceni ko iratou ka a veikau. E ratou sa qai lesu tale ki Peria vata kei na i vakaro i Paula me rau lako vakatotolo yani vua ko Sailasa kei Timoci. 16Ni waraki rau tiko mai Aceni ko Paula, e a katakata vakalevu na lomana e na nona raica na sinai ni koro e na veimatakau. 17A veileti kina ko koya kei ira na Jiu e na valenilotu, kei ira na kai matanitu tani lotu vaka-Jiu, ka vaka kina vei ira era dau lako yani vaka ki na makete e na veisiga. 18E a veileti tale ga kina ko koya kei ira e so na tamata era vakabauta na i vakavuvuli vaka-Epikuro kei na so na qasenivuli ni vakavuvuli vaka-Sitoike. Era kaya e so, “A cava mada e via kaya tiko na tamata dau vosa oqo?” E so tale e ra kaya, “'O koya e vaka e vunautaka tiko e dua na kalou vou,” ka ni vunautaka voli ko koya na i Tukutuku Vinaka kei Jisu kei na tu cake tale mai na mate. 19Era sa qai tauri koya ka kauta ki na nodra matabose e cake ka yacana ko Areopakasi, ka kaya vua, “Keimami via kila se i vakavuvuli vou cava ko sa mai tukuna tiko oqo. 20Ko sa kauta mai e so na ka veivakurabuitaki ki na daliga i keimami. Keimami via kila gona na kedra i balebale” 21E sega tale ni dua na ka era dau vakaogai ira tu kina na kai Aceni kei ira na vulagi era tiko kina, na nodra veitukunitaka ga ka vakarogoca na veivakasama vou e dau basika yani kina. 22Sa qai tu cake ko Paula e na matadra na lewe ni bose, ka kaya, “O i kemuni na turaga e Aceni, au sa raica rawa ni ko ni sa vanua dau qaravi kalou. 23E na noqu lako voli, ka vakaraica na veika ko ni dau so-kalou kina, au a raica tale ga e dua na i cabocabo ni soro ni volai tu kina, ʻKi vua na Kalou e Tawa Kilaiʼ. Ia na Kalou ko ni dau qarava tiko oqo ka sega ni kila, sa i koya na Kalou au sa mai tukuna tiko oqo vei kemuni. 24Sa i koya na Kalou ka a buli vuravura kei na veika kece ga e tu kina. Sa i koya na Turaga ni lomalagi kei vuravura, ka sega ni tiko e na veivalenisoro e caka e na liga. 25E sega tale ga ni leqa e na dua na ka me rawa ni da vukei koya kina e na ka e cakava na liga ni tamata, ka ni sa i koya ga ka solia tiko vei keda kece na bula, na i cegu kei na veika kece ga. 26E a bulia ko koya na veimatatamata kece ga mai na dua ga na tamata, me ra tiko e na veiyasa i vuravura kece ga. E a sa lesia taumada tu ko koya na nodra gauna kei na i yalayala ni veivanua me ra tiko kina. 27E a cakava oya ko koya me ra qai vakasaqarai koya kina na tamata, ka nuitaka e na nodra vakayayamo voli ni ra na kunei koya. la e sega tale ga ni yawa mai vei keda yadudua na Kalou; 28me vaka sa tukuni, ʻSa i koya ga e da sa cegu tiko ka yavala, ka bula voli kina.ʼ Me vaka tale ga era a kaya e so na nomuni daunivucu, ʻEda sa luvena tale ga ko i keda.ʼ 29“Ia me vaka gona ni da sa luve ni Kalou, sa sega kina ni dodonu me da nanuma ni sa tautauvata na Kalou kei na koula, se na siliva, se na vatu, ka a ceuti e na maqosa kei na vuku ni tamata. 30Sa vakanadakuya na Kalou na gauna ni lecaika, ia oqo sa vakarota vei keda kece na tamata, e na veivanua kece ga, me da veivutuni. 31Ni sa lokuca tu ko koya e dua na siga me na lewai vuravura kina e na lewa dodonu, e na liga ni tamata sa lesia oti tu ko koya. A sa vakadinadinataka na Kalou na ka oqo vei ira na tamata kece ga e na nona vakatura cake tale mai na mate na tamata koya.” 32Ia ni ra sa rogoca na tu cake tale mai na mate, era sa vakalialiai Paula kina e so; ia e so tale era kaya, “Keimami na rogoci iko tale e na vuku ni ka oqo.” 33Sa qai biuti ira ko Paula. 34Ia era a muri koya tiko ga e so vei ira ka mani yaco sara me ra vakabauta. E dua vei ira na lewe ni matabose ko Taionisio, kei na dua na yalewa, ka yacana ko Tamarisi, kei na so tale.

will be added

X\