CAKACAKA 16

1A mani toso tiko na i lakolako i Paula ka yaco sara yani ki Tapi kei Lisitira. E tiko mai Lisitira e dua na tisaipeli ka yacana ko Timoci, e luve ni dua na marama Jiu ka sa vakabauta, ia e kai Kirisi ko tamana. 2E tamata rogo vinaka ko koya vei ira na vakabauta mai Lisitira kei Ikoniumi. 3Sa mani vinakata ko Paula me rau lako vata kaya, ka mani kauti koya ka la'ki ciliva. E a cakava oya ko Paula baleti ira na Jiu ka ra tiko e na yasayasa koya ka ni ra kila kece tu ni kai Kirisi ko tamana. 4Ia ni ratou sa vakalakova tiko na veikoro e kea, e ratou sa vakadewataka yarayara tale tiko ga na veivakaro era sa lewa na i apositolo kei ira na qase mai Jerusalemi, ka kaya vei ira me ra muria. 5Era sa mani tubu me ra kaukauwa e na vakabauta ko ira na veisoqosoqo lewenilotu, ka sa tubu tale tiko ga na kedra i wiliwili e na veisiga. 6E ratou a lakova na yasana taucoko ko Firijia kei na vanua ko Kalatia. Ia e a tarovi ratou na Yalo Tabu me ratou kakua ni vunautaka na vosa mai Esia. 7Ni ratou sa yaco ki na i yalayala ni yasana ko Misia e ratou sa qai tovolea me ratou lako ki na yasana ko Picinia, ia e a sega ni vakadonuya vei iratou na Yalo i Jisu. 8E ratou sa mani lako siviti Misia ka lako sobu sara ki na koro ko Tiroa. 9E na bogi ni siga koya e a qai raica e dua na raivotu ko Paula: e a raica ni tu cake tu e dua na kai Masitonia ka vakamasuti koya tiko ka kaya, “Lako mai ki Masitonia ka vukei keimami!” 10Ni oti ga na nona raica na raivotu koya, keitou sasaga sara me keitou lako ki na vanua ko Masitonia, ni keitou sa vakadinata ni sa kacivi keitou na Kalou me keitou la'ki vunautaka na i Tukutuku Vinaka vei ira mai kea. 11Keitou sa soko sara mai Tiroa ka mua vakadodonu yani ki na yanuyanu ko Samoceresa, ka ia sara ki na koro ko Niapili e na siga ka tarava. 12Mai kea keitou sa qai la'ki muri e vanua ka yaco sara yani ki na koro levu ko Filipai e na yasayasa vaka-Masitonia koya, ka koloni vaka-Roma. Keitou tiko e na koro koya ka vica vata na siga. 13E na Siga ni Vakacecegu keitou sa qai lako ki na taudaku ni koro, ki na bati ni uciwai e na vanua keitou nanuma ni dau caka kina na masumasu. Keitou sa mani la'ki dabe ka vosa vei ira na marama era soqoni vata yani kina. 14E a vakarorogo tiko e dua na marama ni koro ko Ceataira, ka yacana ko Litia. 'O koya e dua na dau volitaki i sulu lokaloka, ka dau qarava na Kalou. E a dolava na lomana na Turaga ka sa mani vakabauta kina na veika sa tukuna ko Paula. 15Ia ni sa papitaisotaki oti ko koya kei ira na lewe ni nona vale, sa qai kerei keitou, ka kaya, “Kevaka dou sa vakadinata ni'u sa vakabauta dina na Turaga, dou lako mai ka tiko mada e na noqu vale.” A sa cikevi keitou matua sara ko koya me keitou lako kina. 16E na dua na siga ni keitou sa lako tiko ki na vanua ka dau caka kina na masumasu, keitou sa qai sota kei na dua na goneyalewa bobula ka tiko vua e dua na yalo daurairai, ka rawa kina ni dau tukuna na veika e sa bera ni yaco. Sa dau vakavutuniyautaki iratou na nona turaga e na nona dau tukuna na ka vuni. 17Sa qai muri keitou mai ka qolouvaka tiko, “Ko iratou oqo na tamata ni Kalou Cecere Sara. E ratou sa vakaraitaka tiko vei kemuni na sala mo ni bula kina!” 18A cakava tiko vaka koya ko koya ka vica vata na siga. Sa mani rarawa vakalevu na loma i Paula, ka sa qai vuki vua ka kaya vua na yalo, "Au sa vakarota vei iko e na yaca i Jisu Karisito mo lako tani mai vua!” A sa lako tani sara na yalo e na tiki ni gauna ga koya. 19Ia ni ratou sa raica na nona turaga ni sa takali na ka e ratou a dau rawa i lavo tiko mai kina, e ratou sa qai tauri Paula kei Sailasa ka yarataki rau ki na makete vei ira na i liuliu. 20Ni ratou sa kauti rau yani vei iratou na turaganilewa, e ratou sa qai kaya, “Ko i rau na tamata oqo e rau Jiu ka rau sa mai vakatubu leqa vakalevu tiko e na koro oqo. 21E rau sa mai vakatavuvulitaka tiko na i valavala e so e sega ni dodonu vei keda me da taura se muria, ko i keda na kai Roma” 22Era sa qai tu vata kece mai na lewe vuqa me ra buturaki rau; e ratou sa qai luvata na nodrau i sulu ko iratou na turaganilewa ka vakarota me rau vakanakuitataki. 23Ia ni ra sa kanakuitataki rau oti vakalevu, era sa qai biuti rau ki na valeniveivesu, ka vakarota vua na i vakatawa ni valeniveivesu me yadravi rau matua. 24Ni sa taura oti ga na i vakaro koya ko koya, sa qai biliraki rau yani ki na tiki ni valeniveivesu e loma sara ka vesuka matua sara na yavadrau e na i vesu kau bibi. 25Ia e na lomaloma ni bogi, e rau sa qai masu ka laga sere vua na Kalou ko Paula kei Sailasa, ka ra a vakarogoci rau tiko ko ira na kena vo ni kaivesu. 26Sa qai yaco vakasauri e dua na uneune levu, ka kuretaka sara ga na yavu ni valeniveivesu. Era sa qai tatadoladola vata kece vakadua na i sogo ni katuba, ka sa tataseresere na kedra i vesu kece ga. 27Sa qai yadra mai e na moce na i vakatawa, ia ni sa raica ni sa tadola tu na katuba ni valeniveivesu, sa qai ucuna na nona i seleiwau, ka sa vakarau sara me vakamatei koya, ni nanuma ni ra sa dro na kaivesu. 28Sa qai kaci e na domo levu ko Paula, ka kaya, “Kakua ni vakacacani iko! Keimami sa tiko kece ga oqo!” 29Sa qai kaci na i vakatawa ni valeniveivesu me kau yani e dua na cina, ka mai cici sara yani ki loma. A sa sautaninini na yagona, ka cuva sobu vakatoboicu vei rau ko Paula kei Sailasa. 30Sa qai kauti rau ki tautuba ka kaya, “O i kemudrau na turaga, a cava me'u cakava me'u bula kina?” 31E rau sa qai kaya, “Vakabauta na Turaga ko Jisu, ko na bula kina, ko iko kei ira kece na nomu lewe ni vale!” 32E rau sa qai vunautaka vua na vosa ni Kalou, kei ira kece tale ga era tiko e na nona vale. 33Sa mani kauti rau sara yani ko koya e na tiki ni bogi ga koya, ka la'ki savata na we ni nodrau mavoa. A sa papitaisotaki sara ko koya kei ira kece na nona lewe ni vale. 34Oti koya sa qai kauti rau ki na nona vale, ka la'ki cakava e dua na kedrau kakana; a ratou sa reki vakalevu, kei iratou na nona lewe ni vale ni sa yaco me ratou vakabauta na Kalou. 35Ia ni sa siga mai na vanua, e ratou sa qai tala e so na ovisa ko iratou na turaganilewa, ka kaya, “Dou la'ki sereki rau mai na tamata oya.” 36Sa mani kaya sara na i vakatawa ni valeniveivesu vei rau ko Paula kei Sailasa, “E ratou sa vakarota mai na turaganilewa mo drau sa sereki. Mo drau sa lako sara, ka mo drau lako e na vakacegu!” 37Ia e a qai kaya vei iratou ko Paula, “O i keirau, keirau lewe ni matanitu ko Roma! e ratou a vakanakuitataki keirau e na matana levu ko iratou na turaganilewa, ka ratou biuti keirau ki na valeniveivesu, ni a sa sega mada ni vakadinadinataki ni keirau cala. Ia oqo e ratou sa qai mai via sereki keirau tani vakavuni? Sega ni rawa! Me ratou lako sara ga mai na turaganilewa ka mai kauti keirau tani e ke!” 38E ratou sa qai la'ki tukuna na vosa koya na ovisa vei iratou na turaganilewa. A ratou sa rere sara ni ratou sa rogoca ni rau kai Roma. 39E ratou sa qai lako yani, ka vakamasuti rau, ka ratou sa qai kauti rau ki tautuba; e ratou sa qai kerea vei rau me rau sa biuta mada ga na koro. 40E rau sa mani biuta na valeniveivesu ka lako ki na vale nei Litia. Ia ni sa oti na nodrau raici ira ka vakayaloqaqataki ira na vakabauta, e rau sa qai lako sara.

will be added

X\