CAKACAKA 15

1Era a lako sobu mai Jutia ki Anitioki e so na tamata, ka vakatekivu vakatavulica vei ira na vakabauta ni ra na sega ni vakabulai kevaka era sega ni cili me vaka na ka e kaya na Lawa i Mosese. 2E rau a veileti vakalevu ka veiba kina kei ira ko Paula kei Panapasa. Era sa mani lesi Paula kina kei Panapasa kei iratou tale e so mai vei ira mai Anitioki me ratou lako cake ki Jerusalemi ki vei iratou na i apositolo kei ira na qase ni lotu e na vuku ni ka koya. 3Era sa qai talaci iratou ko ira na i soqosoqo lewe ni lotu, ka ratou sa lakovi Finisia kei Samaria ka talanoataka yarayara na nodra sa gole na kai veimatanitu tani vua na Kalou. E ra sa marau vakalevu na vakabauta e na i tukutuku koya. 4Ni ratou sa yaco yani ki Jerusalemi, e ra sa kidavaki iratou sara mai na i vavakoso lotu kei iratou na i apositolo kei ira na qase, ka ratou sa qai tukuna na veika kece ga ka sa cakava vata kei iratou na Kalou. 5Ia era sa qai tu cake e so na nodra i lawalawa na Farisi ka ra sa vakabauta, ka kaya, “Sa dodonu me ra cilivi ko ira oqori, ka me ra vakaroti tale ga me ra muria na Lawa i Mosese” 6Era sa qai soqoni vata ko iratou na i apositolo kei ira na qase me ra bosea na ka koya. 7Ia ni sa oti e dua na veileti balavu, sa qai tu cake ko Pita ka kaya, “O i kemuni na veiwekani, ko ni sa kila ni sa dede toka na gauna ka a digitaki au kina na Kalou mai na keda maliwa me'u vunautaka na i Tukutuku Vinaka vei ira na kai veimatanitu tani me rawa ni ra rogoca ka vakabauta. 8E a sa vakadinadinataka na ka oqo vei ira na Kalou, o koya sa kila na loma ni tamata kece ga, e na nona solia vei ira na Yalo Tabu me vaka ga na nona a solia vei keda. 9E a sega ni vakaduiduitaki keda mai vei ira, ni sa bokoca na nodra i valavala ca ko koya e na vakabauta. 10A cava na vuna ko ni qai via vakatovolea kina na Kalou mo ni vakataqara e na domodra na tisaipeli na i colacola ka da a sega mada ga ni colata rawa ko i keda se ko ira na noda qase? 11Ia e na loloma ni noda Turaga ko Jisu e da sa vakabulai kina ni da sa vakabauti; sa vaka tale ga koya vei ira” 12Era sa qai tiko vakanomodi na lewe ni bose taucoko, ka vakarogoci Panapasa kei Paula ni rau sa talanoataka na veicakacaka mana kece ga kei na veika veivakurabuitaki ka a cakava na Kalou e na ligadrau e na kedra maliwa na kai veimatanitu tani. 13Ni rau sa tukutuku oti, sa qai vosa cake ko Jemesa ka kaya, “Kemuni na veiwekani, ni rogoci au mada! 14Sa qai tukuna oti ga oqo ko Saimoni na i matai ni gauna me kauta mai kina e so na kai veimatanitu tani na Kalou, me ra nona. 15Koya e duavata kei na nodra vosa na parofita, me vaka sa volai tu e na i Vola Tabu: 16ʻNi sa oti oya au na lesu mai; sa kaya na Turaga, ka'u na tara cake tale na i tikotiko i Tevita sa bale tu. Au na tara tale na kena e caca, ka vakakaukauwataka. 17E ra sa na qai lako mai kina vei au ko ira na kena vo ni tamata kei ira na veimatanitu tani kece ko ira au sa vakatoka me ra noqu. 18Sa i koya oya na ka e kaya na Turaga, o koya ka a sa vakatakila tu na veika oqo mai na gauna makawa sara.ʼ 19O koya gona, sa noqu lewa kina me da kakua ni vakadredretaka na veika oqo vei ira mai na veimatanitu tani era sa saumaki vua na Kalou; 20ia me da volavola ga vei ira me ra kakua ni kania na kakana dukadukali ni ra sa vakacabori oti vei ira na kalou matakau; me ra kakua ni veibutakoci, se kania e dua na manumanu e vakamatei ni kuna se modroki na domona; ka me ra kakua talega ni gunuva se kania na dra. 21Ni sa dau wiliki na Lawa i Mosese e na nodra veivalenilotu na Jiu e na dua na gauna balavu sara e na Veisiga ni Vakacecegu, ka sa dau vunautaki na nona vosa e na veikoro kece ga.” 22E ratou sa qai lewa na i apositolo kei ira na qase, kei ira na i vavakoso lotu taucoko me ra digitaka e so na tamata mai na kedra maliwa, ka talai ira me ra lako vata kei rau ko Paula kei Panapasa ki Anitioki. Era sa qai digitaki Jutasa, ka yacana tale ga ko Parisapa, kei Sailasa; e rau tamata dokai vakalevu vei ira na vakabauta ko i rau oqo. 23Sa qai vakaoqo na vosa ni vola era vakauta: “Mai vei keitou na i apositolo kei ira na qase, na wekamuni, keimami vakabula yani vei kemuni na weka na lewe ni veimatanitu tani ko ni tiko mai Anitioki kei Siria kei Silisia. 24Keimami sa mai rogoca ni so e ra a cavutu yani eke era sa la'ki vakaleqai kemuni tiko e na ka era kaya, ka sa veilecayaki kina na nomuni vakasama. Ia keimami a sega ni solia yani e dua na i vakaro vei ira. 25Keimami sa mani lomavata kece sara kina ka digitaka e lewe rua vei keimami me rau talai yani vei kemuni, me rau lako vata yani kei rau na noda i tokani ko Panapasa kei Paula, 26ko i rau ka rau sa solia tu na nodrau bula ki na yaca ni Turaga ko Jisu Karisito. 27Sa i koya oya keimami sa talai Jutasa yani kina kei Sailasa, ka rau na tukuna tale ga e na gusudrau na veika keimami sa vola tiko yani oqo. 28Keimami sa duavata kei na Yalo Tabu me sa kakua ni dua tale na i colacola e soli vei kemuni me i kuri ni veika bibi ga e so ka sa koto oqo: 29Oya mo ni kakua ni kania e dua na ka sa vakacabori oti ki vei ira na kalou matakau; ni kakua ni gunuva se kania na dra, se kania na manumanu ka vakamatei ni modroki na domona; ka kakua tale ga ni veibutakoci. Kevaka ko ni sa qarauni kemuni mai na veika oqori, sa na daumaka sara. Ni sa moce” 30Sa mani yaco na veitalatala ka ratou sa lako sobu sara ki Anitioki. Ni ratou sa yaco yani, e ratou sa qai vakasoqoni ira vata kece na vakabauta ka solia vei ira na i vola. 31Ia ni ra sa wilika na i vola, era sa sinai e na marau e na vuku ni vosa ni veivakayaloqaqataki e koto kina. 32E rau sa qai vosa vakabalavu ko Jutasa kei Sailasa, ka ni rau parofita tale ga ko i rau. E rau vakauqeti ira na vakabauta ka vakataudeitaki ira tale ga. 33Ni oti e vica na siga na nodratou tiko e kea, era sa qai vakasukai rau tale e na vakacegu ko ira na veiwekani ki vei ira ka a talai rau yani. 34[Ia e a mani loma i Sailasa me sa tiko ga e kea.] 35E rau sa mani tiko voli ga ko Paula kei Panapasa mai Anitioki, ka rau vakatavuvulitaka ka vunautaka na vosa ni Turaga, vata kei ira e lewe vuqa. 36Ni oti e vica na siga, sa qai kaya ko Paula vei Panapasa, “Me daru lako tale mada ka talevi ira na veiwekani e na veikoro e daru a vunautaka kina na vosa ni Turaga, se ra sa vaka tiko evei.” 37A mani vinakata ko Panapasa me rau kauti Joni Marika. 38Ia e a nanuma ko Paula ni sega ni dodonu me rau kauti koya, ka ni a sega ni vakaotia ko koya na i lakolako e ratou a lako kina e liu. E a biuti rau ko koya mai Pamifilia. 39A yaco kina e dua na veileti katakata, ka rau sa mani tawase kina ko Paula kei Panapasa. Sa mani kauti Marika ko Panapasa ka rau soko sara ki Saipurusi. 40Ia e a digitaki Sailasa ko Paula ka rau mai lako sara yani, ni sa oti na nodra tataunaki rau ki na loloma ni Kalou ko ira na veiwekani. 41E a lakova na lomai Siria kei Silisia ko Paula ka vakakaukauwataki ira na veisoqosoqo lewenilotu e kea.

will be added

X\