CAKACAKA 14

1E a vaka kina mai Ikoniumi. E rau a lako ki na nodra valenilotu na Jiu ko Paula kei Panapasa. E rau la'ki vosa kina ka yaco me ra vakabauta kina e lewe vuqa na Jiu kei ira na kai veimatanitu tani. 2Ia ko ira na Jiu ka ra sega ni vakabauta era sa qai vakauqeti ira ga na kai veimatanitu tani me ra saqati ira era sa yaco me ra vakabauta. 3E rau sa mani tiko kina vakadede ka vosa vakadodonu tiko e na vuku ni Turaga. A sa vakadeitaka na Turaga ni sa dina na nodrau i tukutuku me baleta na nona loloma, e na kaukauwa sa solia vei rau me rau cakava rawa kina na veicakacaka mana kei na veika veivakurabuitaki. 4E ra sa mani tawase rua na lewe vuqa e na koro koya; e dua na i wase era to vei ira na Jiu, ka dua tale na i wase era to vei rau na i apositolo. 5Ia era sa qai nakita e so na Jiu kei ira e so na kai veimatanitu tani me ra vakacacani rau ka vakaviriki rau e na vatu. 6Ia ni rau sa kila na i apositolo na ka koya e rau sa qai dro ki na koro ko Lisitira, kei Tapi mai Laikaonia kei na veivanua vakavolivolita, 7ka rau vunautaka kina na i Tukutuku Vinaka. 8E a tiko mai Lisitira e dua na tamata lokiloki; e a sa lokiloki sara tu ga mai ni sa qai sucu, ka sega sara ga ni bau lako rawa. 9E a vakarogoci Paula tiko ko koya e na gauna e vosa tiko kina. A sa wanonovi koya matua ko Paula, ka raica ni sa tu vua na vakabauta me vakabulai kina. 10Sa qai kaya e na domo levu ko Paula, “Tu cake vakadodonu e yavamu!” Sa qai lade cake sara ko koya ka tekivu me veilakoyaki. 11Ia ni ra sa raica na lewe vuqa na ka sa cakava ko Paula, era sa qai tabalaka cake na domodra ka kaya e na vosa vaka-Laikaonia, “E ra sa rairai mai vakatamata vei keda na kalou!” 12Era sa vakatokai Panapasa me ko Seusi, kei Paula me ko Eremesi, ni sa i koya ka dau vosa tiko vei rau. 13E vaka tale ga kina na bete i Seusi ka tiko na nona burekalou e na matamata ki na koro. Sa kauta yani ki na matamata ni koro e so na bulumakau kei na so na senikau, ka vinakata me ra vakacaboisoro vata kei ira na lewe vuqa vei rau na i apositolo. 14Ia ni rau sa rogoca ko Panapasa kei Paula, e rau sa qai dresulaka na nodrau i sulu, ka cici yani ki na kedra maliwa na lewe vuqa, 15ka qolouvaka, “O i kemuni na turaga, a cava ko ni cakava kina na veika oqo? Keirau tamata tale ga vakataki kemuni ko i keirau! Ia keirau sa mai vunautaka vei kemuni na i Tukutuku Vinaka mo ni saumaki kina mai na veika macawa oqo ki vua na Kalou bula, o koya ka a buli lomalagi kei vuravura, kei na wasawasa kei na veika kece ga e tu kina. 16E a laivi ira na veimatanitu ko koya e na veitabatamata sa oti yani me ra dui muria ga na nodra sala. 17Ia e a sega ga ni laiva ko koya me sega na nona i vakadinadina, ka ni sa dau caka vinaka tiko ga, ka dau solia mai vei kemuni na uca mai lomalagi kei na vuata e na kena gauna. Sa dau solia vei kemuni na kakana ka sa vakamarautaka na lomamuni” 18Ia ni sa tau oti na vosa oya, e se dredre ga na tarovi ira rawa na lewe vuqa, ni ra sa via vakacaboisoro tiko ga vei rau. 19Ia era sa qai yaco yani kina e so na Jiu mai Anitioki mai Pisitia kei Ikoniumi. Era qai vakauqeti ira na tamata, ka ra mani vakaviriki Paula e na vatu ka yarataka ki na i bili ni koro, ni ra nanuma ni sa mate. 20Ia ni ra sa mai tu vakavolivoliti koya na tisaipeli, sa qai tu cake mai ka lako sara ki na koro. E na siga ka tarava e rau sa lako sara ki Tapi. 21E kea e rau sa vunautaka kina na i Tukutuku Vinaka, ia ni rau sa rawa oti kina e so na tisaipeli, e rau sa qai lesu yani ki Lisitira, kei Ikoniumi kei Anitioki. 22E rau sa vakadeitaka na lomadra na tisaipeli ka vakauqeti ira me ra tu dei e na vakabauta, ka kaya, “Sa dodonu me da na sota kei na vuqa na ka rarawa e na noda curu ki na Matanitu ni Kalou” 23E rau sa qai lesia e so me nodra qase e na veivavakoso lotu. Ni sa oti na nodra masumasu kei na lolo, e rau sa qai tataunaki ira ki vua na Turaga, o koya era sa vakabauta. 24Ni rau sa lakova oti na vanua vaka-Pisitia, e rau sa mani yaco ki Pamifilia. 25E kea e rau sa qai vunautaka kina na i tukutuku vinaka e na koro ko Perika. Oti oya e rau sa gole ki Atalia. 26Mai kea e rau sa qai soko ki Anitioki, mai Siria, na koro e rau a vakacabori taumada kina ki na kaukauwa ni Kalou me baleta na cakacaka e rau sa qai vakaotia mai oya. 27Ia ni rau sa yaco ki Anitioki, e rau sa vakasoqoni ira vata na i vavakoso lotu, ka rau sa qai tukuna na veika kece ga ka sa cakava vata kei rau na Kalou, kei na nona sa dolava na katuba ni vakabauta vei ira na kai veimatanitu tani. 28E rau a tiko e kea vata kei ira era sa lotu e na dua na gauna balavu.

will be added

X\