CAKACAKA 13

1Era tiko vei ira na i soqosoqo lewe ni lotu mai Anitioki e so na parofita kei na so na qasenivuli: ko Panapasa, ko Simione (ka vakatokai Na Driloa), ko Lusiu na kai Kirini, ko Manaeni (o koya ka rau a susugi vata kei Eroti na kovana), kei Saula. 2Ni ra sa qarava tiko na Turaga, ka lolo tiko, sa qai kaya vei ira na Yalo Tabu, “Ni wasei rau tani mada mai vei au ko Panapasa kei Saula ki na cakacaka au sa kacivi rau kina.” 3Ni sa oti na nodra lolo kei na masu, era sa qai tabaki rau ena ligadra ka talai rau yani. 4Me vaka na veitalai ni Yalo Tabu e rau sa qai lako sobu ko Panapasa kei Saula ki na koro ko Selusia. Mai kea e rau sa qai soko ki Saipurusi. 5Ni rau yaco ki na koro ko Salamisa, e rau sa vunautaka na vosa ni Kalou e na nodra veivalenilotu na Jiu, ka a veivuke kina vei rau ko Joni Marika. 6E rau a lakova na yanuyanu taucoko ka yaco sara ki na koro ko Pafo. E kea e rau a sota kina kei na dua na daucakaisausau, e dua na Jiu, ka parofita lasu, ka yacana ko Pa-Jisu. 7E rau a tiko vata ko Pa-Jisu kei na kovana, ko Serikiu Paula; e dua na turaga vuku ko koya na kovana. E a kacivi rau ko Panapasa kei Saula ko koya ni via rogoca na vosa ni Kalou. 8Ia e a qai saqati rau ko Elima, na daucakaisausau (oya na yacana e na vosa Vakirisi), ka saga me vagolea tani na kovana mai na vakabauta. 9Ia ni sa vakasinaiti e na Yalo Tabu ko Saula, (o koya sa vakatokai tale ga me yacana ko Paula), sa vakawanonovi koya matua, 10ka kaya, “'O iko na luve ni Tevoro! 'O sa sinai e na veivakaisini, kei na ka ca kece ga! O iko na meca ni veika kece ga e dodonu! O na qai tinia e naica na nomu sa dau tovolea tiko ga mo dau via vakatanitaka tiko ga na veika dodonu ni Turaga! 11Raica, sa na bikai iko na cudru ni Turaga; ko sa na mataboko, ka na sega ni raica na matanisiga e na vica na siga.” Sa qai lutu vakasauri vua na kabukabu kei na butobuto; ka sa vakayayamo voli ni vaqara e dua me tuberi koya. 12Ia ni sa raica na kovana na ka sa yaco koya, sa vakabauta sara, ka sa dua tani tale ga na nona qoroya tiko na i vakavuvuli me baleta na Turaga. 13E ratou sa qai soko yani ko Paula kei rau na nona i tokani mai Pafo ka yaco ki na koro ko Perika mai Pamifilia. Ia mai kea sa mani biuti rau kina ko Joni Marika ka lesu tale ki Jerusalemi. 14E rau sa qai biuti Perika ko i rau ka lako ki Anitioki mai Pisitia. E rau a mani lako sara ki na nodra valenilotu na lotu vaka-Jiu e na Siga ni Vakacecegu ka la'ki dabe kina. 15Ia ni sa wiliki oti na i vola ni Lawa kei na nodra i vola na parofita, era sa qai kaya vei rau ko ira na vakaitavi e na valenilotu, “Kemudrau na weka i keimami, kevaka e tiko vei kemudrau e dua na vosa ni veivakadreti vei ira na i vavakoso, drau vosa sara mada e na gauna oqo” 16Sa qai tu cake ko Paula, ka vakatabataba ka kaya, “O i kemuni na Isireli, kei kemuni na lewe ni veimatanitu tani ko ni sa dau qarava na Kalou; ni vakarorogo mada! 17Na nodra Kalou na Isireli e a digitaki ira na noda qase, ka qisi ira me ra yaco me ra matanitu levu e na gauna ni nodra tiko vaka vulagi e na vanua ko Ijipita. E a qai kauti ira tani mai kea ko koya e na ligana kaukauwa. 18E a maroroi ira me rauta e vasagavulu na yabaki e na loma ni vanua lala. 19E a qai vakawabokotaka e vitu na matanitu e na vanua ko Kenani, ka solia na nodra vanua vei ira na Isireli, me ra taukena 20me va na drau limasagavulu na yabaki. “Oti koya, sa qai lesia vei ira e so na dauveilewai me yacova na gauna i Samuela na parofita. 21E a tarava oya na nodra a vinakata me dua na nodra tui, ka mani soli Saula kina vei ira na Kalou. Ko Saula, na luve i Kisi, e dua na tamata mai na yavusa i Penijamini. E a yabaki vasagavulu na nona veiliutaki. 22Ia ni sa biuti koya tani na Kalou, sa qai vakatuburi Tevita cake me nodra tui. Sa i koya oqo na ka e kaya na Kalou baleti Tevita, ʻAu sa kunei Tevita, na luve i Jese, ni tamata e vinaka e lomaqu, ka na cakava na ka kece ga au vinakata.ʼ 23Mai na kawa ni tamata oqo, me vaka e a sa yalataka oti tu na Kalou sa vakatubura mai kina ko koya ki vei ira na Isireli e dua na i Vakabula, oya ko Jisu. 24Ni sa bera ni lako mai, a sa vunautaka oti ko Joni, vei ira na Isireli me ra veivutunitaka na nodra i valavala ca ka me ra papitaisotaki. 25Ni sa vakarau vakaotia na nona i tavi ko Joni, e a qai kaya, ʻO cei o ni nanuma ni ʻo i au? E sega ni ʻo i au ko koya ko ni waraka tiko. E sega, ia e muri e tiko mai e dua, ka sega mada ga ni rauti au me'u sereka na nona i vava.ʼ 26“O i kemuni na wekaqu, na kawa i Eparaama, kei kemuni na kai matanitu tani ko ni dau qarava na Kalou, sa kau mai oqo ki vei keda na vosa ni veivakabulai oqo! 27Ni ra a sega ni kila ko ira era tiko mai Jerusalemi kei ira na nodra i liuliu ni sa i Jisu ga na i Vakabula. Era a sega tale ga ni kila ni ra sa vakayacora tiko na nodra vosa na parofita ka dau wili e na Veisiga ni Vakacecegu, e na nodra a lewa me mate. 28E dina ga ni ra a sega ni kunea e dua na ka e dodonu me mate kina ko koya, ia era a kerei Pailato me vakamatei ga. 29Ni ra sa vakayacora oti na veika kece ga ka a volai tu e na i Vola Tabu me baleti koya, era sa qai kauti koya sobu mai na kau ka vakotora e na dua na i bulubulu. 30Ia e a vakaturi koya cake tale mai na mate na Kalou. 31Ka a dau rairai vei ira era a lako vata kaya mai Kalili ki Jerusalemi e na loma ni vica vata na siga; a ra sa dau tukuni koya tiko ko ira oya vei ira na tamata. 32Keirau sa kauta gona mai kina vei kemuni na i Tukutuku Vinaka ni yalayala ka a caka vei ira na noda qase, 33ni sa vakayacora dina na Kalou vei keda na luvedra, e na nona vakaturi Jisu cake tale mai na mate, me vaka e volai tu e na i karua ni Same: ʻO iko na Luvequ; au sa yaco me'u Tamamu e daidai.ʼ 34Ka sa i koya oqo na ka e a kaya na Kalou e na nona vakaturi koya cake tale mai na mate, me kakua sara ni vuca rawa: ʻAu na solia vei iko na veivakalougatataki tabu ka sega ni yavalati rawa, ka a yalataki vei Tevita.ʼ 35E a kaya tale ga kina ko koya e na dua tale na Same, ʻKo ni na sega ni laiva na nomuni Le Dua Yalosavasava me luca mai.ʼ 36Ia ko Tevita, ni sa qarava oti na i naki ni Kalou e na nona i tabatamata, sa qai takali yani, ka sa bulu vata kei ira na nona qase, ka sa luca kina na yagona. 37Ia e a sega ni yaco na ka koya vei koya ka a vakatura cake tale na Kalou. 38O koya gona, mo ni kila kina na veiwekani ni sa mai vunautaki vei kemuni na bokoci ni valavala ca e na vukuna. 39E na vukuna tale ga era sa vakadonui kina ko ira kece era sa vakabauta; era sa vakadonui mai na veika kece ga ko ni sega ni dau sereki kina ko i kemuni mai na Lawa i Mosese. 40O koya gona, mo ni qai qarauna, me kua ni yaco vei kemuni na ka era a tukuna na parofita: 41ʻRaica, kemuni na dauveibeci! Mo ni kidroa, ka rusa! Ni'u sa cakava tiko e dua na cakacaka e na nomuni gauna, a cakacaka ko ni na sega ni vakabauta, veitalia sara mada ga, ke la'ki vakamacalataka yani e dua vei kemuni.ʼ “ E Rau sa Vakayaloqaqataki ira na tamata ko Paula kei Panapasa 42Ni rau sa curu tiko ki tautuba ko Paula kei Panapasa, era sa qai kerea me la'ki vunautaki tale vei ira na vosa oya e na Siga ni Vakacecegu ka tarava. 43Ia ni ra sa dui suka na i vavakoso, era sa qai muri rau e lewe vuqa vei ira na Jiu kei ira na kai matanitu tani era sa vuki ki na lotu vaka-Jiu. E rau sa qai vosa vei ira, ka vakadreta me ra tu dei tiko e na loloma ni Kalou. 44E na Siga ni Vakacecegu ka tarava, e voleka ni lewe ni koro kece era soqoni vata yani me ra rogoca na vosa ni Turaga. 45Ia ni ra sa raica na Jiu na kedra lewe levu na tamata, era sa sinai e na vuvu, ka ra vosavosa ca, ka ra vakalasuya tiko yani na veika e tukuna tiko ko Paula, ka vakalialiai koya. 46E rau sa qai vosa vakadoudou ga ko Paula kei Panapasa, ka kaya, “Sa dodonu ga me vunautaki mada e liu vei kemuni na vosa ni Kalou. Ia ni ko ni sa biliga tani mai, ko ni sa lewa kina vaka i kemuni ni sega ni rauti kemuni me soli vei kemuni na bula tawa mudu, o koya gona oya, keirau sa na gole kina vei ira na kai veimatanitu tani; 47ni a vakaoqo na i vakaro ni Turaga: ʻAu sa vakaduri iko mo nodra rarama na kai veimatanitu tani, mo sala ni veivakabulai ki na vuravura kece ga.ʼ “ 48Ni ra sa rogoca oya ko ira na kai veimatanitu tani, era sa reki, ka vakacaucautaka na vosa ni Kalou, ka ra sa vuki me ra vakabauta ko ira e ra a sa vakarautaki tu ki na bula tawa mudu. 49A sa tete yani ki na loma ni yasana kece koya na vosa ni Turaga. 50Ia era sa qai vakauqeti ira na marama lelevu lewe ni veimatanitu tani ka ra lotu vaka-Jiu kei ira na turaga dokai e na koro koya ko ira na Jiu. E ra a vakatubura na veivakacacani ka caka vei rau ko Paula kei Panapasa, ka vakasavi rau mai na nodra vanua. 51Ia e rau sa qai kuretaka laivi na kuvu ni qele mai na yavadrau ka lako sara ki na koro ko Ikoniumi. 52A ra sa vakasinaiti e na reki kei na Yalo Tabu ko ira na tisaipeli mai Anitioki.

will be added

X\