CAKACAKA 12

1E na gauna ka tukuni tiko oqo e a qai tekivu kina me vakacacana e so na lewe ni lotu ko Eroti. 2E a vakamatei Jemesa na tuaka i Joni e na i seleiwau. 3Ia ni sa raica ni ra vinakata na Jiu na ka koya, sa qai vesuki Pita tale ga. (E donuya tiko ʻo ya na gauna ni Solevu ni Madrai Sega ni Vakaleveni.) 4Ni ra sa vesuki koya, e ra sa qai biuti koya ki na valeniveivesu, ka soli koya ki vei ira e va na matayadra, lewe i yava na sotia, me ra yadravi koya. A nakita ko Eroti me qai la'ki veilewaitaki koya e na matana levu ni sa oti na Solevu ni Lakosivia. 5Ia sa mani biu ko Pita ki na valeniveivesu, ia ko ira na i soqosoqo lewe ni lotu era a sega ni cegu na masulaki koya vagumatua tiko vua na Kalou. 6E na bogi me kena mataka cake me sa kauti Pita kina ko Eroti vei ira na lewenivanua, e a moce koto ko Pita e na kedrau maliwa e rua na sotia. E a vesu tu ko koya e na rua na sinucodo ka ra yadra tale tiko ga eso e na matamata ni valeniveivesu. 7Sa qai tu vakasauri e tikina e dua na agilosi ni Turaga, ka sa cila e dua na rarama e na loma ni valeniveivesu. Sa qai tavia na agilosi na taba i Pita ka vakaduria cake, ka kaya, “Tu cake! Vakatotolo!” A sa lutu sara vakasauri mai ligana na sinucodo. 8Sa qai kaya vua na agilosi, “Vakadreta na i vau ni tolomu, ka daramaka na nomu i vava.” A sa cakava vaka kina ko koya. Sa qai kaya vua na agilosi, “Dara na nomu kote balavu, ka muri au mai.” 9Sa mai curu yani ki tautuba ko Pita ka muri koya, ka sega ni kila sara tiko se sa ka dina na ka e cakava tiko oya na agilosi se sega. E nanuma tiko ga ni raica tiko e dua na raivotu. 10E rau sa siviti iratou sara na i matai ni matayadra, kei na kena i karua. E rau sa mani yaco sara yani ki na matamata kaukamea ka gole ki na koro. E a tadola vaka i koya ga vei rau na matamata, ka rau sa curu sara yani ki tautuba. E rau a lakova sara yani e dua na gaunisala, ka sa qai la'ki laivi koya kina vakasauri na agilosi. 11la ni sa vakilai koya tale ko Pita, sa qai kaya, “Au sa qai kila kina sara ga oqo ni a tala mai na nona agilosi na Turaga, ka sa vakabulai au mai na liga i Eroti kei na nodra i naki kece tale ga na Jiu.” 12la ni sa vakasamataka na veika kece oya ko Pita, sa qai lako ki na vale nei Meri, na tina i Joni Marika, na vanua era soqoni ka masu vata tiko kina e lewe vuqa. 13Ia ni sa tukituki tiko ko Pita e na katuba ni curucuru ki na vale koya, sa lako sara yani ko Rota, e dua na goneyalewa veiqaravi me la'ki rogoca. 14A sa kila sara ko koya na domo i Pita. Ia e na levu ni nona marau e a sega mada ni dolava na katuba sa cici mada ga ki loma ka la'ki tukuna vei ira ni sa tu e tuba ko Pita. 15Era sa qai kaya vua, “Ko sa lialia?” Ia e a dre matua tiko ga ko koya ni sa tiko e kea ko Pita. Era sa qai kaya tale, “Oqori na nona agilosi!” 16Ia e a tukituki tiko ga ko Pita. Ia ni ra sa dolava na katuba, era sa raici koya, sa dua tani na levu ni nodra kurabui. 17Sa qai vakatabataba vei ira ko koya me ra tiko lo, ka sa tukuna vei ira na nona a kauti koya tani mai na Turaga mai valeniveivesu. Sa qai kaya tale ga, “Ni qai la'ki tukuna na ka oqo vei Jemesa kei ira na kena vo ni vakabauta.” Sa qai lako ko koya ki na dua tani tale na vanua. 18Ia ni sa kida na mataka, sa ka levu na nodra kidroa na sotia -a cava beka e sa yaco vei Pita? 19A sa vakarota ko Eroti me ra vakasaqarai koya, ia ni ra sa sega ni kunea, sa qai vaqaqai ira na yadra ka vakarota me ra vakamatei. Oti koya sa qai biuti Jutia ko Eroti ka la'ki tiko vakalailai mai Sisaria. 20Ia e a cudruvi ira vakalevu na lewe ni koro e rua ko Taia kei Saitoni ko Eroti. Era sa mani lako vata me ra la'ki raici koya. E ra a tekivu mada vei Pilasito, na matanivanua e vale nei Eroti. Ni ra sa rawai koya oti era sa qai la'ki soro vei Eroti ka kerei koya me ra kakua ni cudruvi, ka ni dau kau tiko mai na kedra kakana mai na nona vanua na tui. 21Ia e na siga sa lokuci tu sa qai daramaka ko Eroti na nona i sulu vakatui, ka la'ki dabe e na nona i tikotiko vakaturaga, ka tauca e dua na nona vosa vei ira. 22Era sa qai qolou vata yani na tamata, ka kaya, “Sa domo ga ni Kalou oqo, sega ni domo ni tamata!” 23Sa qai samuti Eroti vakasauri e dua na agilosi ni Turaga ka ni a sega ni vakarokorokotaka na Kalou ko koya. A sa kanilaka na yagona na baca ka mani mate sara kina. 24Ia sa tubu ka tete tiko ga na vosa ni Kalou. 25E rau sa qai lesu tale ki Jerusalemi ko Panapasa kei Saula, ni rau sa vakayacora oti na nodrau i tavi, ka rau sa kauti Joni Marika tale tiko ga.

will be added

X\