CAKACAKA 11

1Era sa mani rogoca na i apositolo kei ira na vakabauta mai Jutia ni ra sa vakabauta tale ga na vosa ni Kalou ko ira na kai veimatanitu tani. 2Ia ni sa yaco cake yani ki Jerusalemi ko Pita, era a qai vakalewai koya ko ira na i lala vakabauta ka ra vinakata me ra cilivi tale ga na lewe ni veimatanitu tani ni ra sa vakabauta. 3E ra kaya vua, “O a la'ki curu e na nodra vale na tawa cili, ka la'ki kana vata sara kei ira!” 4Sa qai vakamacalataka sara vakavinaka vei ira ko Pita, ka kaya, 5“Au a tiko mai na koro ko Jopa, ka'u masu tiko. Au a qai raica e dua na raivotu. A lako sobu mai e dua na ka e vaka na i tutuvi levu, e tukuci sobu mai lomalagi e na tutuna vava, ka yacovi au sara mai. 6Au mani vakaraica matua ka'u vakasamataka. Au raica kina na manumanu yava i va ni vanua, na manumanu kila, na manumanu dau qasi, kei na manumanu vuka ni macawa. 7Au qai rogoca tale ga e dua na domo ni kaya mai vei au, ʻTucake, Pita, vakamatea ka kania!' 8Au sa qai kaya, ʻMe kua sara, Turaga, ni sa sega ni bau curu vakadua ki gusuqu e dua na ka tabu se tawa savasava.ʼ 9Sa qai vosa tale mai vei au na domo mai lomalagi, ka kaya, ʻMo kakua ni vakatoka me tawa savasava na ka sa vakasavasavataka na Kalou! 10E a caka vakatolu na ka oya, ka sa qai kau kece tale ki lomalagi. 11E ratou sa mani yaco sara yani e lewe tolu na tamata e na vale au tiko kina. E ratou a talai yani ki vei au mai Sisaria. 12E a qai kaya vei au na Yalo Tabu me'u lako vata kei iratou, me kakua ni'u lomalomarua tale. E ratou a sala vata kei au e lewe ono vei ira na vakabauta ka keitou la'ki curu sara ki na vale ni tamata koya. 13Sa qai tukuna vei keitou ko koya na nona a raica na agilosi e na nona vale ni wavu tu, ka kaya vua, ʻMo talatala ki Jopa, me lakovi e dua na tamata ka yacana ko Saimoni Pita, 14ka na tukuna vei iko ko koya na vosa ko na bula kina, kei ira kece tale ga na nomu lewe ni vale.ʼ 15Ni sa tekivu me'u vosa, sa sobuti ira sara na Yalo Tabu me vaka ga ka a yaco vei keda e na kena i vakatekivu. 16Au sa qai nanuma na vosa ni Turaga, e na nona a kaya, ʻE a papitaisotaki kemudou ko Joni e na wai, ia dou na papitaisotaki e na Yalo Tabu.ʼ 17Ia kevaka sa solia vei ira na Kalou na i solisoli vata ga ka a solia vei keda e na noda sa vakabauta na Turaga ko Jisu Karisito, ko cei ko i au me'u via tarova na Kalou?” 18Ia ni ra sa rogoca oya, era sa galu ga, ka vakatekivu me ra vakalagilagia na Kalou, ka kaya, “Sa solia tale bagi ga na Kalou vei ira na kai veimatanitu tani na gauna oqo me ra veivutuni ka bula kina.” 19E so vei ira na vakabauta era a veiseyaki e na veivakacacani ka tubu e na vuku i Sitiveni era a yaco sara vaka ki na yasana ko Finisia, na yanuyanu ko Saipurusi kei na koro ko Anitioki. Era a vunautaka voli na i tukutuku vinaka vei ira ga na Jiu, ka sega ni ra tukuna vei ira na veimatanitu tani. 20Ia e so vei ira na vakabauta era kai Saipurusi ka so e kai Kirini. Era a lako ko ira oya ki Anitioki ka vosa tale ga vei ira na kai veimatanitu tani, ka vunautaka kina na Turaga ko Jisu. 21A sa tiko vata kei ira na kaukauwa ni Turaga, ka ra sa lewe vuqa era vakabauta ka saumaki vua na Turaga. 22Sa mani yaco na kena i tukutuku vei ira na i soqosoqo lewe ni lotu mai Jerusalemi, ka ra mani talai Panapasa me lako me yaco sara ki Anitioki. 23Ia ni sa yaco yani ka sa raica na levu ni veivakalougatataki ni Kalou vei ira na tamata, sa marau sara, ka sa vakauqeti ira me ra kabita matua na Turaga e na yalodra taucoko. 24A sa dua na tamata vinaka ko Panapasa, ka sinai e na Yalo Tabu kei na vakabauta. A ra sa lewe vuqa na tamata era sa vuki vua na Turaga. 25Oti koya sa qai lako ko Panapasa ki na koro ko Tarisu me la'ki vakasaqarai Saula kina. 26Ia ni sa kunei koya, sa qai kauti koya ki Anitioki. E na dua na yabaki taucoko e rau a dau soqoni vata kina kei ira na i soqosoqo lewe ni lotu, ka rau vakatavulici ira e lewe vuqa. Mai Anitioki era a vakatokai taumada kina na tisaipeli me ra lotu va-Karisito. 27E na gauna vata oya era a lako sobu kina ki Anitioki e so na parofita mai Jerusalemi. 28A qai tu cake e dua vei ira, a yacana ko Akapo, ka tukuna e na kaukauwa ni Yalo Tabu ni na yaco e dua na dausiga levu e na vuravura raraba. (E a mani yaco na ka oya e na gauna e tui tiko kina ko Kolotiu.) 29Era sa mani lewa vata ko ira na tisaipeli, me ra vakauta, me vaka na ka era dui rawata, na nodra veivuke vei ira na vakabauta mai Jutia. 30Era sa qai cakava vaka kina, ka ra solia na i lavo vei rau ko Panapasa kei Saula me rau kauta vei ira na qase ni lotu mai kea.

will be added

X\