CAKACAKA 10

1E a tiko mai Sisaria e dua na tamata, ka yacana ko Konilio. O koya e dua na kavetani ni mataivalu e vakatokai na “Mataivalu ni Itali.” 2E tamata dau lotu ko koya ka dau doka na Kalou; ko koya kei iratou kece na nona lewenivale. E dau soli ka ni loloma vakalevu vei ira na Jiu vakaloloma ka dau sega ni cegu e na masumasu vua na Kalou. 3E na dua na yakavi siga, ni rauta na tolu na kaloko, e a raica kina ko koya e dua na raivotu. E curu yani e dua na agilosi ni Kalou ka kaya vua, “Konilio!” 4A mai vakaraici koya matua tu yani ko Konilio e na taqaya, ka kaya, “Sa vaka evei, Turaga?” Sa qai kaya vua ko koya, “Sa yaco cake mai vua na Kalou na nomu masu kei na nomu dau solisoli, ka sa nanumi iko kina ko koya. 5Ia raica, mo tala mada e so na tamata ki Jopa me ra lakova e dua na tamata ka yacana ko Saimoni; a yacana tale ka dua ko Pita. 6E tiko oqo ko koya vei Saimoni na daucaka kulinimanumanu; ka tiko na nona vale e matasawa” 7Sa lako tale na agilosi ka sa qai kacivi rau e lewe rua vei ira na nona tamata ko Konilio vata kei na dua na sotia daulotu mai vei ira na sotia ka ra dau qaravi koya. 8Ia ni sa talanoataka oti vei iratou na ka kece ga ka a yaco, sa qai talai iratou ki Jopa. 9E na siga ka tarava, rauta na siga levu tutu, ni ratou sa lako tiko ga e sala ko iratou koya ka ratou sa volekata tiko yani ki na koro, e a cabe cake ki na dela ni vale ko Pita me la'ki masu kina. 10Sa tuburi koya na via kana ka garova me kania e dua na ka. Ia ni sa vakarautaki tiko na kakana, sa qai raica ko koya e dua na raivotu. 11E a raica ni sa tadola na lomalagi, ka sa lako sobu tiko mai e dua na ka me vaka e dua na i tutuvi levu, ka tukuci sobu mai ki vuravura e na tutuna vava. 12E tu e na i tutuvi koya na veimataqali manumanu yava i va kece ga, kei na veimataqali manumanu dau qasi ni vanua, kei na manumanu vuka. 13Sa qai rogo mai e dua na vosa, ka kaya, “Tu cake, Pita; vakamatea ka kania!” 14Sa qai kaya ko Pita, “Me kua sara, Turaga, ni'u sa sega vakadua ni bau kania e dua na ka tawa savasava .” 15Sa qai rogo tale mai vakarua vua na vosa, ka kaya, “Na ka sa vakasavasavataka na Kalou mo kakua ni okata me tawa savasava!” 16E a caka vakatolu na ka koya, ka sa qai kau tale ki lomalagi. 17Ia ni sa vakasamataka tiko ga ko Pita se cava na i balebale ni raivotu oya, e ratou sa kunea rawa sara na vale i Saimoni e na nodratou vakatataro ko iratou ka a talai mai vei Konilio, ka ratou sa tu sara ga e na matamata ni vale e na gauna koya. 18E ratou sa qai kaci ka taroga se tiko kina e dua na vulagi ka yacana ko Saimoni Pita se sega. 19Ia e a sa vakananuma tiko ga na raivotu ko Pita. Sa qai kaya vua na Yalo Tabu, “Raica, e ratou sa tiko oqo e lewe tolu ka ratou vakasaqarai iko tiko mai. 20Tu cake ka lako sobu, ka kakua ni lomalomarua, ni sala vata kei iratou; au a talai iratou mai.” 21Sa mai lako sobu sara yani ko Pita ka kaya vei iratou, “'O i au na tamata ko dou vakasaqara tiko. A cava na i naki ni nomudou lako mai?” 22E ratou sa qai kaya, “E talai keitou tiko mai na Turaganivalu ko Konilio. E tamata dodonu ka dau rerevaka na Kalou ko koya ka vinaka na kena i rogorogo vei ira na Jiu kece ga. E a tukuna vua e dua na agilosi yalo savasava mo ni mai lakovi mo ni lako yani ki na nona vale me rogoca kina na ka ko ni na kaya.” 23Sa qai kacivi iratou ki vale ko Pita, ka ratou a mani moce kina. E na siga ka tarava sa qai lako vata kei iratou ko koya, ka ra sala vata kei iratou e so na lewe ni lotu mai Jopa. 24A yaco yani ko Pita ki Sisaria e na siga ka tarava, ka sa namaki koya toka mai kina ko Konilio, kei ira na wekana dina kei ira na nona i tokani voleka ka a sa sureti ira tu. 25Ni sa curu yani ko Pita, sa tavaki koya sara mai ko Konilio, sa cuva sobu ki yavana ka vakarokoroko vua. 26Ia e a vakaduri koya cake ko Pita ka kaya vua, “Tu cake, au tamata tale ga o i au!” 27E a vosa tiko ga vei Konilio ko Pita ni rau sa curu tiko ki vale. Ia ni rau sa yaco yani ki loma sa raica ni ra sa lewe vuqa e ra soqoni tiko kina. 28Sa qai kaya vei ira ko koya, “Ko ni sa kila vinaka sara ni tabu vua na Jiu me veitokani se lako vua e dua na kai matanitu tani. Ia sa vakaraitaka vakamacala sara vei au na Kalou me'u kakua ni okata e dua me dukadukali se me tawa savasava. 29Oya ga na vuna au a sega tale kina ni lomalomarua ni'u sa lakovi yani. Ia oqo au via taroga ga se cava na vuna ko a talatala yani kina me'u la'ki lako mai” 30Sa qai kaya ko Konilio, “E na va na siga sa oti, e na gauna vata tiko ga oqo, ni'u a masu tiko e ke, e na noqu vale, e na tolu na kaloko e na yakavi, au qai kidacala sa tu e mataqu e dua na tamata ka sa ramase na nona i sulu. 31E a kaya vei au ko koya, ʻI Konilio, sa rogoci na nomu masu ka sa nanumi na nomu cakacaka loloma e na mata ni Kalou. 32Mo talatala mada ki Jopa, me lakovi e dua na tamata na yacana ko Saimoni Pita. E tiko ko koya e na vale i Saimoni na daucaka kuli ni manumanu, ka tiko na vale koya e matasawa.ʼ 33Sa i koya au sa talatala sara yani kina vei kemuni, ka sa vinaka sara ga na nomuni lako mai. Keimami tiko kece sara ga kina oqo e na mata ni Kalou me keimami rogoca na veika kece sa vakarota vei kemuni na Turaga mo ni mai tukuna .” 34Sa qai vosa ko Pita, ka kaya, “Au sa qai kila dina sara oqo ni sega ni dau vakaduiduitaka na tamata na Kalou. 35Ia sa dau vinakati ira kece ga era dau vakarokorokotaki koya ka dau cakava na ka e dodonu, veitalia ga se mataqali kawa tamata cava era lewena. 36Sa I koya oqori na i tukutuku ka a tukuna vei ira na Isireli ko koya, ka vunautaki kina na i tukutuku ni veivinakati e na vuku i Jisu Karisito, o koya na nodra Turaga na tamata kece ga. 37Ko ni sa kila na ka levu ka a yaco e na vanua ko Isireli, ka tekivu mai Kalili ni sa oti na papitaiso ka a vunautaka ko Joni. 38Ko ni sa kila ni sa lumuti Jisu na kai Nasareci na Kalou e na Yalo Tabu kei na kaukauwa. Ko ni sa kila na nona dau lako voli ka dau caka vinaka, kei na nona dau vakabulai ira kece ga e vakalolomataki ira tu na tevoro. Ko ni kila tale ga ni a cakava na veika kece ga koya ko koya ni sa tiko vata kei koya na Kalou. 39Keitou sa i vakadinadina ni veika kece ga ka a cakava ko koya e na nodra vanua na Jiu kei Jerusalemi tale ga. Era a qai vakamatei koya e na nodra vakarubeci koya e na kau. 40Ia e a qai vakaturi koya cake tale na Kalou e na i katolu ni siga, ka me vakatakilai koya votu kina. 41E a sega ni vakatakilai koya na Kalou vei ira na tamata kece ga, ia vei ira ga na i vakadinadina ka a sa digitaka tu mai liu na Kalou, io oya vei keitou ko i keitou ka a kana ka gunu vata kaya ni sa tucake tale mai na mate. 42A sa vakaroti keitou ko koya me keitou vunautaka vei ira na tamata ka vakadinadinataka ni sa i koya ga sa lesia tu na Kalou me na turaganilewa vei ira na bula kei ira na mate. 43Sa i koya oqo ka ra a dau tukuna tiko ko ira kece ga na parofita, ni na bokoci e na vuku ni yacana na nodra i valavala ca na tamata kece ga era na vakabauti koya.” 44Ia ni sa vosa tiko ga ko Pita, sa sobuti ira kece ga era vakarorogo tiko na Yalo Tabu. 45E ratou sa kurabui na Jiu vakabauta ka ratou a lako vata yani kei Pita mai Jopa ni sa sovaraka tale ga na Kalou na nona i solisoli, koya na Yalo Tabu, vei ira na kai veimatanitu tani. 46Ia ni ratou sa rogoca na nodra vosataka na veivosa tani e so kei na nodra vakacaucautaka na Kalou, sa qai kaya ko Pita, 47“Ko ira oqo e sa tiko tale ga vei ira na Yalo Tabu me vakataki keda. E dua li e rawa ni bureitaka na wai ka tarova me ra kakua ni papitaisotaki?” 48Sa qai vakarota ko Pita me ra papitaisotaki e na yaca i Jisu Karisito. Oti koya era sa qai kerei koya me tiko mada ka siga vica tiko kei ira.

will be added

X\