CAKACAKA 1

1I Ceofilo, e na i matai ni vola, au a sa vola kina na veika kece ga e a vakatekivu cakava ka vakatavuvulitaka ko Jisu, 2me yacova na siga ka a kau cake kina, ni sa tauca oti e na Yalo Tabu na nona i vakaro vei iratou na i apositolo ka a digitaka ko koya. 3E a vakaraitaki koya tale ga vei iratou ni sa bula tale tiko ka ni sa oti na nona mate. E a kitaka koya ko koya e na vuqa na kena i vakadinadina; ka ni a dau rairai voli vei iratou e na vasagavulu na siga, ka tukuna na veika ni Matanitu ni Kalou. 4Ia ni ratou sa soqoni vata, sa qai vakarota vei iratou ko koya, “Dou kakua ni biuti Jerusalemi, ia dou waraka tiko mada ga na ka e a yalataka ko Tamaqu, me vaka au a sa tukuna oti vei kemudou. 5E a dau veipapitaisotaki e na wai ko Joni; ia ni oti ga ʻqo e vica na siga dou sa na qai papitaisotaki e na Yalo Tabu.” 6Ia ni ratou sa soqoni vata yani, e ratou sa tarogi Jisu, ka kaya, “Turaga, ko ni na vakayacora me dua tale na matanitu ko Isireli e na gauna oqo se sega?” 7Sa qai kaya vei iratou ko koya, “E sega ni nomudou i tavi mo dou la'ki kila na kena gauna se kena vula, ni sa lesia tu koya ko Tamaqu e na nona lewa ga vaka i koya. 8Ia dou na curumi e na kaukauwa e na gauna sa na sobuti kemudou kina na Yalo Tabu. Dou na qai dau tukuni au e Jerusalemi, kei Jutia taucoko, kei Samaria, ka yacova yani na i yalayala kei vuravura.” 9Ni sa tukuna oti na veika koya ko koya, sa qai kau cake sara ki lomalagi, ni ratou se vakaraici koya tu ga yani. Sa qai lako mai e dua na o ka tabonaki koya mai na matadratou. 10Ia ni ratou se vakararai matua tiko ga vaka koya ki lomalagi e na gauna sa lako cake tiko kina ko koya, e ratou qai kidacala e rau sa tu e yasadratou e lewe rua na tamata vakaisulu vulavula. 11E rau sa qai kaya, “Oi kemudou na kai Kalili, a cava ko dou sa tu ka vakararai kina ki lomalagi? Ko Jisu ka sa kau cake oqo ki lomalagi, e na lako tale mai e na sala vata ga dou sa raica sa lako kina ki lomalagi.” 12E ratou sa mani lesu tale na i apositolo ki Jerusalemi mai na ulunivanua sa vakayacani ki na Veiolive. E voleka ki Jerusalemi na ulunivanua koya, ka rauta ga e dua na kilomita na kena yawa. 13Ni ratou sa yaco yani, e ratou sa cabe sara ki na i taba loma ni vale e cake ka ratou dau tiko kina: koya ko Pita kei Joni kei Jemesa kei Adriu, ko Filipi kei Tomasi, ko Pacolomiu kei Maciu, ko Jemesa na luve i Alifio, kei Saimoni na Gumatua, kei Jutasa na luve i Jemesa. 14Ko iratou oqo e ratou sa ia tiko ga e na loma vata na masumasu, vata kei iratou tale ga na yalewa, kei Meri na tina i Jisu, kei iratou na tacina. 15Ni oti e vica na siga, sa qai vakayacori e dua na nodra soqoni na vakabauta ka rauta e dua na drau ruasagavulu, na kedra lewe levu. Sa qai tu cake e na kedra maliwa ko Pita ka kaya, 16“O i kemuni na veiwekani, sa dodonu me vakayacori sara na ka e kaya na i Vola Tabu, na ka a vosataka e liu na Yalo Tabu, e na gusu i Tevita ka baleti Jutasa o koya ka a la'ki vakatakilai Jisu vei ira ka a vesuki koya. 17Ko Jutasa e a dua tale ga vei keda, ka a digitaki me vakaitavi tale ga e na noda cakacaka” 18(E a volia ko Jutasa e dua na tiki ni qele e na i lavo, ka i sau ni nona cakacaka ca. E a qai lutu ko koya e na qele koya ka mani mate sara kina. A kacabote na boto ni ketena, ka lutu kece mai ki tuba na nona gacagaca. 19A rogo na ka oqo vei ira kece ga era tiko e Jerusalemi, ka mani vakatokai kina na vanua koya e na nodra vosa, me ko Akeletama, na kena i balebale, “Na Vanua ni Dra.” ) 20“Ni sa volai tu e na i Vola ni Same, ʻMe lala didi sara na nona vale, ka me kakua ni dua e tawana.ʼ Sa volai tale tu ga, ʻMe dua tani tale e taura na nona i tutu.ʼ 21“O koya gona sa dodonu kina me lesi mada e dua vei ira ka ra dau sala vata tiko kei kedatou na i apositolo e na gauna taucoko ka tiko kina kei keda na Turaga ko Jisu, 22me vakatekivu mai na veipapitaisotaki i Joni, ka yacova na siga ka a kau cake tani kina mai na keda maliwa, me lesi me i vakadinadina vata kei kedatou e na nona tucake tale mai na mate na Turaga” 23E ra sa qai vakatura mai e lewe rua: ko Josefa e vakatokai ko Parisapa, ka yacana tale ga ko Jusitu, ka kena i karua ko Mataiasi. 24E ratou sa qai masu ka kaya, “O i kemuni na Turaga, kemuni ko ni sa kila na yalo ni tamata kece ga, mo ni vakatakila mada mai se ko cei vei rau oqo ko ni sa digitaka, 25me taura na i tutu vaka i apositolo ka sa sivo mai kina ko Jutasa me lako ki na vanua e dodonu me lako kina.” 26E ratou sa qai vakawirimadigitaki rau ka sa mani golevi Mataiasi na madigi; ka sa mani wili ko koya me i apositolo vata kei iratou na le tinikadua.

will be added

X\