3 JONI 1

1Oqo na i vola mai vua na Qase ki vei Keio, o koya ka'u sa lomana dina sara. 2Noqu i tokani lomani, au sa masulaka me sa lako vinaka na veika kece e baleti iko, ka mo bula vinaka tale ga; au sa kila ni sa vinaka tu na nomu bula vakayalo. 3Au sa reki vakalevu sara ni ra yaco mai e so na wekada ka ra mai tukuna na dina sa tu vei iko, me vaka ni ko a sa dau muria tiko ga na dina. 4E sega tale ni dua na ka me'u rekitaka vakalevu cake mai na ka oqo: me'u rogoca ni ra sa muria tiko ga na dina ko ira na luvequ. 5Noqu i tokani lomani, ko sa yalo dina sara e na cakacaka ko kitaka e na nomu dau qaravi ira na wekada va-Karisito, e dina ga ni a sega ni sa bau veikilai mada e liu. 6Era sa mai vakadinadinataka na nomu dau loloma ki vei ira na i soqosoqo lewe ni lotu eke. E na uasivi sara ke ko na vukea na nodra i lakolako e na sala sa vinaka vua na Kalou. 7Ka ni ra sa lako tu yani e na vuku i Karisito, ka ra sa sega ni taura e dua na ka mai vei ira na tawa vakabauta. 8Sa dodonu gona kina me da vukei ira na tamata vaka ko ya, me da veitokani sara kina kei ira e na cakacaka dina. 9Au a sa vola yani e so na ka ki na i soqosoqo lewe ni lotu; ia e na sega ni via kauwaitaka na noqu lewa ko Tiotirifi ka ni sa via vakaliuci koya ga vaka i koya. 10Kevaka gona au sa na mani lako yani, au sa na qai kauta cake yani na veika e sa kitaka kei na veitukutuku ca ka lasulasu ka la'ki veikauyaka voli e na vuku i keitou. Ia ni sega ni sa rauta vua ko ya, e a sega tale ga ni via kidavaki ira na wekada va-Karisito ko koya vaka i koya, ka a tarovi ira era via veikidavaki, ka tovolea me biuti ira laivi mai na i soqosoqo lewe ni lotu! 11Noqu i tokani lomani, kakua ni vakadamurimuria na ca, ni vakadamurimuria ga na vinaka. O koya sa caka vinaka sa mai vua na Kalou; ko koya sa caka ca e sa sega ni raica na Kalou. 12Sa rogo vinaka na i tukutuku kei Timitirio mai vei ira kece ga, io mai na dina tale ga vaka i koya. Keitou sa vakadinadinataki koya tale ga, ka ko sa kila ni sa dina na neitou i tukutuku. 13Sa levu na ka me'u vola yani, ia e vinaka cake vei au me'u kakua ni volavola e na peni kei na wai ni volavola. 14Au nuitaka ni'u na raici iko e na dua na gauna wale ga oqo, me daru na qai veivosaki kina e na matanavotu. 15Me tiko mada ga vei iko na vakacegu! Era sa loloma yani na wekada. Au sa loloma tale ga yani vei ira na wekada, vei ira yadudua sara!

will be added

X\