2 TIMOCI 4

1Au sa vakaroti iko e na mata ni Kalou kei Jisu Karisito o koya e na veilewaitaki ira na bula kei ira na mate, me baleta na nona lako mai kei na nona matanitu. 2Au vakarota mo vunautaka na vosa ni Kalou ka gumatua sara e na gauna kece ga, e na gauna vinaka kei na gauna ca. Vakaraitaka na ka e cala, vakadodonutaki ira na cala, vakayaloqaqataki ira me ra cakava na ka e dodonu ka veivakavulici e na yalo vosota sara. 3E na yaco mai na gauna era na bese kina na tamata ni rogoca na i vakavuvuli vinaka, era sa na muria ga na nodra gagadre. Ia era na tauri ira ga na qasenivuli e na veidonui kei na ka era gadreva. 4E ra na sogota na daligadra ki na i vakavuvuli dina, ka goleva na veitukutuku wale. 5Ia ko iko mo yalomatua e na gauna kece ga, ka vosota na veika dredre. Mo vakayacora na cakacaka vakadauveivakalotutaki ka vakayacora vinaka sara na nomu i tavi me vaka e dua na tamata ni Kalou. 6Ia ko i au, sa voleka mai na gauna me vakacabori kina na noqu bula e na i cabocabo ni soro, ka sa voleka sara na gauna me'u biuta kina vakadua na bula oqo. 7Au sa vala oti e na i valu vinaka, au sa vakacavara vinaka na veitaucici, ka'u sa maroroya na vakabauta. 8Ia sa vo ga me'u taura na i cocovi ni yalosavasava e na solia vei au na Turaga, na turaganilewa dodonu e na siga ko ya. E sega ni ko i au taudua ga; ia vei ira kece era sa namaka na nona lako tale mai. 9Tovolea sara mo lesu totolo mai vei au, 10baleta ni sa biuti au ko Timasa ni sa taleitaka vakalevu na vuravura oqo, ka sa lako yani ki Cesalonaika. Sa lako ko Kirisiki ki Kalatia ka lako ko Taito ki Talimetia. 11E sa tiko taudua voli ga kei au ko Luke. Kauti Marika mo drau lako vata mai vei au. 12Au sa talai Tikiko ki Efeso. 13Ni ko sa lako mai kauta mai na kote au a biuta tu yani vei Karipo mai Tiroa. Kauta mai na veivola e so, vakauasivi na i vola kuli ni sipi. 14Sa vakayacora vei au e vuqa sara na ka ca ko Alekisada na matai ni kaukamea. Me na sauma vua na Turaga na ka sa cakava. 15Qarauni iko vinaka mai vua, baleta ni sa saqata sara vakaukauwa na neitou i tukutuku. 16E na i matai ni noqu veilewai, a sega sara ni dua e bau tokoni au, ia era sa laivi au, kece sara. Au masulaka me ra kua ni beitaki kina. 17Ia sa tu e tikiqu na Turaga ka vakaukauwataki au, me'u vunautaka rawa kina na i tukutuku vinaka vei ira kece na kai matanitu tani me ra rogoca, au sa vakabulai tale ga mai na gusu ni laione. 18E na vakabulai au na Turaga mai na veika ca kece ga ka maroroi au me'u bula yani ki na nona matanitu vakalomalagi. Me ia vua na vakarokoroko ka sega ni mudu. Emeni. 19Au sa loloma yani vei Pirisila kei Akuila, ka vaka kina ki na vuvale i Onisiforo. 20E sa tiko ga mai Korinica ko Erasito, ia au sa biuti Tirofimo tu yani mai Milito ni sa tauvimate. 21Tovolea mo lako mai ni sa bera na vula i batabata. E ratou sa loloma tu yani ko Ufolo, Putena, Laino, Kilotia kei ira kece ga na veiwekani. 22Me tiko vata kei na yalomu na Turaga. Me sobuti kemuni kece na loloma.

will be added

X\