2 TIMOCI 2

1I Timoci na luvequ, mo vakaukauwataki e na loloma soli wale sa noda e na noda tu vata kei Jisu Karisito. 2Ko sa rogoca na noqu i vakavuvuli au a vakatavuvulitaka e na matadra e lewe vuqa na i vakadinadina. Vakadewataka na i vakavuvuli koya vei ira na tamata yalodina e na rawa me ra na vakavulici ira na tani. 3Vosota na ka dredre ko sotava me vaka e dua na sotia yalodina i Jisu Karisito. 4Sa sega na sotia sa lako ki na i valu me vakaogai koya tale ga e na veicakacaka tani tale e so. Sa na saga me vakayalovinakataka na nona turaga ni valu sa liutaki koya. 5E na sega tale ga na dauqito e na rawata e dua na i covi ke sega ni muria na lawa ni qito. 6Na dauteitei sa qarava na cakacaka sa dodonu me votai taumada e na lewe ni were. 7Vakasamataka mada na ka au sa kaya vei iko; e na vukei iko na Turaga mo kila na ka kece sara. 8Nanumi Jisu Karisito, na nona tucake tale mai na mate sa kawa mai vei Tevita, me vaka e tukuni e na i Tukutuku Vinaka au vunautaka. 9E na vuku ni ka oqori au sa vosota kina na veika dredre me vaka e dua na tamata ca ka vesu e na sinucodo. Ia sa sega ni vesuki na vosa ni Kalou. 10Ia e na vukudura na digitaki ni Kalou au sa rawa ni vosota kina na veika oqo me ra rawata kina na lagilagi kei na veivakabulai tawa mudu sa tu vei Karisito Jisu. 11Sa dina na i vosavosa oqo: “Kevaka e da sa mate vata kaya, e da na bula vata kaya tale ga. 12Kevaka e da vosota e da na lewa vata kaya tale ga. Kevaka e da cakitaki koya, e na cakitaki keda tale ga ko koya. 13Kevaka e da na sega ni yalodina, sa yalodina tiko ga ko koya. baleta ni sa sega ni rawa ni cakitaki koya vaka i koya.” 14Tukuna tiko ga vei ira na tamata na ka oqo ka vakaroti ira matua e na mata ni Kalou me ra kua ni veiletitaka na veivosa wale ga. Sa sega na kena yaga, ia sa vakaleqai ira era sa rogoca. 15Tovolea e na nomu i gu taucoko mo vakaraitaki iko e na mata ni Kalou me vaka e dua na tamata cakacaka sa sega ni dua na ka me madua kina; ka dau tukuna vakadodonu sara na ka dina baleta na Kalou. 16Kakua ni vakaitavi e na veitalanoa ca ni sa vakauti ira na tamata ki na veika ca sara. 17Ia na nodra vosa e na kakana tiko me vaka na vidikoso ca. E rau sa tiko e na kedra maliwa ko Imeneo kei Filito; 18e rau sa gole tani mai na ka dina, ni rau sa kaya sa oti na tucake tale mai na mate; e rau sa vakaleqa kina na nodra vakabauta e so. 19Ia na yavu tudei sa virikotora na Kalou sa tudei ga ka sa volai kina na i vakatakilakila oqo: “Sa kilai ira era nona na Turaga,” ka “Me ra gole tani kece mai na ca ko ira yadua era sa nona na Turaga” 20E na loma ni dua na vale levu sa sega wale ga ni tu kina na veibilo koula kei na veibilo siliva, ia sa tu tale ga kina na bilo kau kei na bilo qele, e so me vakayagataki e na veisoqo lelevu ga e so ka so me vakayagataki e na veisoqo lalai ga. 21Kevaka sa vakasavasavataki koya e dua na tamata mai na veika ca au sa tukuna e na qai vaka e dua na bilo talei, sa vakatabui me nona na Kalou, sa yaga vua na nona turaga ka sa vakarau tu kina na veicakacaka vinaka kece ga. 22Vakanadakuya na nomu veigagadre ca vakacauravou ka vaqara na dodonu, na vakabauta, na loloma kei na vakacegu vata kei ira era masuta na Turaga e na yalosavasava me vukei. 23Tarovi iko mai na veileti lialia ka tawa yaga; ko sa kila ni ra sa vakavuna na veivala. 24Sa sega ni dodonu me dauveivala na dauveiqaravi ni Turaga, sa dodonu me yalovinaka vei ira na tamata kece ga, me qasenivuli vinaka, dauvosota, 25ka malumu ni vakadodonutaki ira na nona meca. De na solia vei ira na Kalou me ra veivutuni ka ra kila na ka dina. 26Ia e na qai lesu tale mai na yalodra ka ra na qai dro tani kina mai na dai ni tevoro o koya sa vesuki ira tu me ra cakava na lomana.

will be added

X\