2 TIMOCI 1

1Oqo na i vola i Paula o koya sa digitaka na Kalou me dua na i apositolo i Karisito Jisu me vunautaka na bula sa yalataki e na noda bula vata kei Karisito. 2Ki vei Timoei na luvequ lomani:Me solia vei iko na Kalou na Tamada kei Karisito Jisu na noda Turaga, na loloma na yalololoma kei na vakacegu. 3Au sa vakavinavinaka vua na Kalou, o koya au sa qarava e na yalodina me vakataki ira na noqu qase e liu. Au dau vakavinavinaka vua e na gauna au dau nanumi iko kina ka'u dau masulaki iko me vaka na ka au dau cakava e na noqu masu e na bogi kei na siga. 4Au sega ni guilecava na nomu tagi ka'u sa gadreva sara me'u raici iko tale, me vakataucokotaka na noqu marau. 5Sa vakadeitaki tale vei au na vakabauta dina sa tu vei iko. Na vakabauta e tu e liu vei Loi na bumu, ka kune tale ga vei Unaisi na tinamu, ka'u vakadinata ni tu sara tale ga vei iko. 6Sa i koya oqori au tukuna tale yani kina vei iko me'u vakabulabulataka tale na i solisoli vakayalo e a solia vei iko na Kalou ni'u a tabaki iko. 7Ni sa sega ni solia vei keda na yalo ni rere na Kalou, ia sa solia mai na yalo me solia na kaukauwa, na loloma kei na noda lewa i keda vakavinaka. 8Mo kakua ni madua ni vakadinadinataki Karisito, ka kakua ni maduataki au na nona bobula. Vakararavi ki na kaukauwa ni Kalou ka vosota na nomu i votavota ni veika dredre e na vuku ni Tukutuku Vinaka. 9Sa vakabulai keda na Kalou me da nona tamata sega ni baleta ni dua na ka eda a cakava, ia sa vu ga mai na nona i naki kei na nona yalololoma. Ni bera ni tekivu na vuravura sa soli tu vei keda na loloma soli wale e na vuku i Karisito Jisu, 10ia oqo sa qai vakaraitaki mai e na nona rairai na noda i Vakabula ko Jisu Karisito. Sa mai vakaotia na mate ka kauta mai na bula tawa mudu e na i tukutuku vinaka. 11Sa digitaki au na Kalou me'u vunautaka na i Tukutuku Vinaka me'u kena i apositolo ka kena qasenivuli. 12Sa i koya oqo au sa vosota kina na veika dredre au sota kaya tiko. Ia au sa sega ni madua baleta ni'u sa kilai koya au sa vakabauta, ka'u vakadinata ni sa rawa me maroroya na ka e solia vei au me yacova na siga ko ya. 13Maroroya matua me vaka e dua na i vakarau na veivosa vinaka ko a rogoca mai vei au ka bula e na vakabauta kei na loloma sa noda e na noda tu vata kei Karisito Jisu. 14Qarauna vinaka na i solisoli vinaka sa nuitaki vei iko e na kaukauwa ni Yalo Tabu. 15Me vaka ko sa kila era sa biuti au kece mai Esia, Faijelo kei Erimojini. 16Me yalololoma na Turaga ki na vuvale i Onisiforo ni sa dau vakacegui au sara vakavuqa ka sega ni maduataki au e na noqu vesu tu. 17E na gauna ga e yaco yani kina ki Roma sa vaqarai au sara me yacova ni sa raici au. 18Ko sa kila vinaka na levu ni cakacaka sa qarava mai Efeso. Me na solia mada ga vua na Turaga me kune loloma mai vua na Turaga e na siga ko ya.

will be added

X\