2 CESALONAIKA 3

1Me'u tinia, o i kemuni na veiwekani, ni masulaki keitou, me tete vakatotolo yani kina ka gumatua na vosa ni Turaga me vaka e a sa yaco e na kemuni maliwa, 2ka me keitou vakabulai tale ga kina mai na ligadra na tamata yalo vakatani ka dau caka ca; ka ni ra sega ni vakabauta kece na tamata. 3Ia sa yalo dina na Turaga. E na vakaukauwataki kemuni ka maroroi kemuni ko koya mai vua na vunica. 4Keitou sa yalodei tale ga vua na Turaga e na vukumuni, ni ko ni sa cakava tiko na veika keitou sa dau vakarota vei kemuni. 5Me tubera mada ga na lomamuni na Turaga ki na loloma ni Kalou kei na yalo ni vosota sa dau solia na Karisito. 6Ia oqo keitou sa vakaroti kemuni na veiwekani e na yaca ni noda Turaga ko Jisu Karisito mo ni kakua ni dau tiko vata kei ira na wekada vucesa ka dau vakasavuliga wale voli ga, ni sa sega ni vaka koya na i vakavuvuli ko ni a rogoca mai vei keitou. 7Ni ko ni sa kila vaka i kemuni ni sa kilikili mo ni vakamurimuri keitou, ka ni keitou a sega ni dau vakasavuliga wale voli ga e na kemuni maliwa. 8Keitou a sega ni kana wale vua e dua na tamata. la keitou a cakacaka ga ka oga e na siga kei na bogi me keitou kakua kina ni vakaicolacolataka e dua vei kemuni. 9E sega ni baleta ni sega vei keitou na dodonu me keitou namaka kina na nomuni veiqaravi ia keitou a kitaka ga me i vakaraitaki vei kemuni, mo ni vakamurimuria. 10E na gauna keitou a sa tiko vata kina kei kemuni keitou a sa tauca oti vei kemuni na i vakaro oqo: “Kevaka e sega ni via cakacaka e dua na tamata me kakua ni vakani” 11Ni keitou sa rogoca ni so vei kemuni era vakasavuliga tu ga, ka ra dau vakacacana voli ga na nodra cakacaka na tani. 12Keitou sa vakaroti ira yani ka vakamasuti ira sa vaka koya e na vuku ni Turaga ko Jisu Karisito, me ra qarava ga vakavinaka na nodra dui cakacaka ka kana mai na veika era rawata vaka i ira. 13Kemuni na veiwekani, ni kakua ni vakacauoca e na caka vinaka. 14Ia kevaka e dua e bese ni muria na neitou vosa e na i vola oqo, me kilai vinaka tiko na tamata koya ka me kakua ni dua e kauwaitaki koya, me na madua kina ko koya. 15Ni kakua ga ni okati koya me vaka e dua na meca, ia mo ni vunauci koya ga me vaka ni sa wekamuni. 16Ia me solia tiko ga vei kemuni ko koya na Turaga ni veivakacegui na vakacegu e na gauna kece ga. Me tiko vata kei kemuni kece ga na Turaga! 17Ko i au ko Paula, ka'u sa vola yani na vakanuinui vinaka oqo e na ligaqu dina. Sa i koya oqo na i vakadinadina e na noqu i vola kece; oya na we ni ligaqu. 18Me tiko vata kei kemuni kece sara na loloma ni noda Turaga ko Jisu Karisito.

will be added

X\