2 CESALONAIKA 2

1Ia me baleta na lako tale mai ni noda Turaga ko Jisu Karisito kei na noda soqoni vata vua me da tavaki koya, keitou sa vakamasuti kemuni kina na veiwekani, 2me kakua ni veilecayaki vakatotolo na nomuni vakasama, se mo ni loma leqa mai na nona parofisai se na nona vunau e dua na tamata se e na dua na i vola e nomuni ni vu mai vei keitou ka tukuni kina ni sa yaco oti mai na Siga ni Turaga. 3Me kakua ni dua e vakacalai kemuni e na dua na ka. E na sega mada ni yaco na Siga koya me yacova ni sa yaco oti na vuki tani mai vua na Kalou ka sa vakaraitaki ko koya na Daucaka Ca ko koya sa nakiti tu me na vakarusai mai eli. 4Sa i koya sa dau veivorati kei ira kece ga era sa vakatokai me ra kalou se me ra dau qaravi vakalou, ka na vakacerecerei koya me cecere vei ira kece ga. E na lako tale ga ko koya ka laki dabe e na Vale Tabu ni Kalou ka na kaya ni sa i koya na Kalou. 5Ko ni sa sega beka ni nanuma ni'u a dau tukuna vei kemuni na veika oqo e na gauna au sa tiko vata kina kei kemuni? 6Ia ko ni sa kila tiko na ka e tarovi koya tiko e na gauna oqo ka me qai vakaraitaki ga mai kina ko koya e na kena gauna. 7Ni sa cakacaka tiko edaidai na kaukauwa vuni ni ca; ia e na sega mada ni yaco na ka sa dodonu me yaco me yacova ni sa kau tani ko koya e se tarova tiko e na gauna oqo. 8E na qai vakaraitaki mai na Daucaka Ca koya, ia e na qai vakamatei koya na Turaga ko Jisu e na i cegu ni gusuna ka vakarusai koya e na i serau ni kena i rairai ni sa lako mai. 9E na qai lako mai na Daucaka Ca e na kaukauwa i Setani ka cakava na veimataqali i vakatakilakila lelevu kece ga kei na veika veivakurabuitaki vakailasu kece ga; 10kei na veivakacalai ca kece ga vei ira na rusa ni ra sega ni via lomana na ka dina me ra bula kina. 11Sa i koya oqo sa tala mai kina na Kalou na veivakacalai kaukauwa vei ira ka ra sa vakabauta kina na ka lasu; 12me ra vakarusai kina ko ira kece ga era sega ni vakabauta na ka dina, ia ka ra sa dau taleitaka ga na ka sa sega ni dodonu. 13Ia sa kilikili me keitou sa dau vakavinavinaka tiko ga vua na Kalou e na vukumuni na veiwekani, ko i kemuni sa dau lomani kemuni na Turaga, ni sa digitaki kemuni na Kalou mai na i vakatekivu mo ni vakabulai, ni ko ni sa vakasavasavataki e na Yalo Tabu ka vakabauta na ka dina. 14Sa kacivi kemuni ki na ka oqo ko koya e na neitou i tukutuku vinaka, mo ni taukena kina na lagilagi ni noda Turaga ko Jisu Karisito. 15Sa i koya oqo mo ni tu dei kina na veiwekani ka taura matua na veivakavuvuli keitou a vakavulici kemuni kina e na vosa se e na i vola. 16Ia me vakaceguya mada ga na lomamuni ka vakataudeitaki kemuni e na vei cakacaka kei na veivosa vinaka kece ga na noda Turaga ko Jisu Karisito vata kei koya na Kalou ko Tamada, o koya ka a lomani keda ka solia vei keda na loloma na vakacegu tawa mudu kei na vakanuinui vinaka!

will be added

X\