2 CESALONAIKA 1

1Oqo na i vola mai vei iratou ko Paula, Sailasa kei Timoci—Ki na nodra i soqosoqo lewe ni lotu na kai Cesalonaika ko ira era sa nona na Kalou ko Tamada kei na Turaga ko Jisu Karisito. 2Me nomuni mada ga na loloma kei na vakacegu mai vua na Kalou ko Tamada kei na Turaga ko Jisu Karisito. 3Sa kilikili me keitou sa dau vakavinavinaka tiko ga vua na Kalou e na vukumuni na veiwekani. Sa dodonu me keitou kitaka tiko vaka kina baleta ni sa tubu vakalevu sara na nomuni vakabauta ka sa toso cake tiko ga na nomuni veilomani vaka i kemuni. 4Keitou sa dau vakacaucautaki kemuni kina e na veisoqosoqo lewe ni lotu ni Kalou e na vuku ni nomuni lomadei kei na nomuni vakabauta e na veivakacacani kece ga kei na veika rarawa ko ni sota kaya tiko. 5Sa vakaraitaki e na veika oqori na dodonu ni lewa ni Kalou, ka sa kena i naki mo ni vakarautaki kina mo ni curu ki na nona matanitu. Sa i koya na matanitu oqo sa yaco tiko kina vei kemuni e daidai na veivakararawataki. 6Ia e na sauma vakadodonu na Kalou na veika oqo, ka na vakararawataki ira era sa vakararawataki kemuni tiko. 7E na vakacegui kemuni na vakararawataki tiko ko koya, ka na vakacegui keitou tale ga, e na gauna e na vakaraitaki mai kina mai lomalagi na Turaga ko Jisu vata kei ira na nona agilosi kaukauwa. 8E na yameyame ni buka, me totogitaki ira era bese ni kila na Kalou kei ira era sega ni vakabauta nai Tukutuku Vinaka ni noda Turaga ko Jisu. 9Sa nodra i totogi me ra vakarusai ka tawasei tani mai na mata ni Turaga kei na nona kaukauwa vakaiserau ka tawa mudu. 10Ni sa na lako mai ko koya e na siga koya me vakalagilagi kina mai vei ira na nona tamata yalosavasava ka vakacaucautaki mai vei ira kece era sa vakabauta. Ko ni sa na okati tale ga kina ko i kemuni ko ni sa vakabauta na i tukutuku keitou sa tukuna vei kemuni. 11Sa i koya oqo na vuna keitou sa dau masulaki kemuni tiko ga kina, me qisi kemuni na Kalou mo ni veiganiti kei na bula sa kacivi kemuni kina ko koya, ka me vakayacora sara e na nona kaukauwa na nomuni veigagadre vinaka kece ga kei na cakacakataki ni nomuni vakabauta. 12Mo ni vakacaucautaka kina na Turaga ko Jisu ko i kemuni, ka me vakacaucautaki kemuni tale ga kina ko koya, me vaka na loloma ni noda Kalou kei na Turaga ko Jisu Karisito.

will be added

X\