2 PITA 3

1O i kemuni na wekaqu daulomani, sa i koya oqo na i karua ni vola au vola yani vei kemuni. Ia e na i vola ruarua oqo au tovolea meʼu vakauqet^ kina na vakanananu savasava e na nomuni vakasama e na noqu tukuna tale na veika oqo. 2Au vinakata mo ni nanuma na veika era a kaya ni na yaco ko ira na parofita yalosavasava kei na veivakaro ni Turaga ka i Vakabula keitou a vakadewataka yani vei kemuni na nomuni apositolo. 3Ia e dodonu mo ni kila taumada ni ra na lako mai e so na tamata e ra daumuria na gagadre ca ni yagodra e na gauna e muri. Era na vakalialiai kemuni, 4ka ra kaya tiko, “Sa evei na vosa ni yalayala me baleta na nona lako mai? Me tekivu sara mai na gauna era a bale yani kina na qase era sa yaco tiko ga na veika kece me vaka era a yaco tiko mai na i vakatekivu kei vuravura” 5Era sa nakita sara ga vaka i ira me ra vakanadakuya na ka dina oqo, ko ya ni vosa ga ni Kalou a bulia na lomalagi e na gauna makawa sara, ka a buli kina e dua na vuravura mai na wai. Ia e na wai tale ga 6e a luvuci ka vakarusai kina na vuravura ka a tu e na gauna ko ya. 7Ia e na vosa ni Kalou vata ga ko ya sa maroroi tiko kina me na vakamai na lomalagi kei na vuravura sa tu edaidai, sa maroroi tu me yacova na siga era na lewai ka vakarusai kina na tamata era sega ni doka na Kalou. 8Kemuni na wekaqu lomani, ni kakua ni vakalecalecava na ka dina oqo, ni sa tautauvata vua na Turaga e dua na udolu na yabaki kei na dua na siga ka tauvata na dua na siga kei na dua na udolu na yabaki. 9Sa sega ni berabera na Turaga ni vakayacora na nona vosa ni yalayala me vaka era nanuma e so ni sa berabera, ia sa vosoti kemuni ga vakadede ni sa sega ni vinakata ko koya me rusa e dua, ia me yacova ga na veivutuni na tamata yadua. 10Ia e na yaco mai na Siga ni Turaga me vaka na daubutako; ka sa na qai takali tani na lomalagi e na rorogo tatamosamosa; ka sa na qai vakawaiealataki e na bukawaqa na veika era ciri tu e na maliwa lala, ka sa na qai vakamai na vuravura kei na veika kece ga sa tu kina. 11Ia ni ra sa na vakawaicalataki vaka ko ya na veika kece oqo, a mataqali i vakarau ni bula cava e kilikili kei kemuni? E dodonu me savasava sara ka vakacabori me nona na Kalou na nomuni bula, 12e na nomuni waraka tiko ka vakusakusataka tiko na yaco mai ni Siga ni Kalou, na siga e na vakamai ka vakawaicalataki kina na lomalagi, ka na vakawaicalataki kina e na bukawaqa na veika era ciri tu e na maliwa lala. 13Ia me vaka na vosa ni yalayala ni Kalou eda sa waraka tiko na lomalagi vou kei na vuravura vou, na vanua era na vakaitikotiko kina na i valavala dodonu. 14O koya gona, kemuni na wekaqu, me vaka ni ko ni sa waraka tiko na veika oqo, ni gumatua me kunei kemuni ko koya ni sega ni tu vei kemuni na duka se na ca, ka mo ni tiko veiyaloni kaya tiko ga. 15Ni okata na yalovosota ni noda Turaga me ka ni veivakabulai. Me vaka tale ga e a sa vola yani vei kemuni na noda i tokani lomani ko Paula, me vaka na vuku sa soli vua. 16Ni sa i koya oqo na ka sa vola e na nona i vola kece ga. E tu e na nona i vola e so na ka e dredre na kila, na veika era sa qai dau vakatanitaka ko ira na tamata lecaika ka sega ni tu dei na nodra vakabauta, me vaka era sa dau kitaka ki na veitiki ni Vola Tabu tale e so. E na ka oqo era sa na vakavuna tiko ga kina na nodra vakarusai ira vaka i ira. 17Ia ko i kemuni na wekaqu, ni ko ni sa kila rawa tiko na ka oqo, ni qarauna de ko ni qai rawai e na nodra veivakacalai na tamata era sega ni via talairawarawa vakaoqo, ka bale kina mai na nomuni yavu dei. 18Ia mo ni tubu cake ga e na loloma kei na nomuni veikilai kei na noda Turaga ka i Vakabula ko Jisu Karisito. Me nona mada ga na lagilagi e na gauna oqo ka tawa mudu! Emeni.

will be added

X\