2 PITA 2

1Era a tubu cake e na kedra maliwa na tamata e na gauna ko ya na parofita lasu e so, ia e na vaka tale ga kina ni ra na tiko na i vakavuvuli lasu e na kemuni maliwa. Ko ira oqo era na kauta vakavuni mai na veivakavuvuli e dau veivakarusai, ka ra na bau la'ki cakitaka kina na Turaga e a vakabulai ira, ka ra na vakavuna kina na nodra vakarusai vakasauri. 2E na lewe vuqa era na muria na nodra i valavala vakasisila, ka na vosa vakacacataki na i vakavuvuli dina e na vuku ni veika era cakava. 3Ia e na nodra kocokoco, era na qara nodra i yau mai vei kemuni e na i tukuni wale, ia mai liu mai liu sara sa vakarau tu ko koya e na veilewaitaki ira ka sega tale ga ni bau moce ko koya e na vakarusai ira. 4Ni a sega ni vosoti ira na agilosi i valavala ca na Kalou, ia e a la'ki biuti ira ga ki eli ka sogoti ira e na vanua butobuto mai ra me ra vesu tiko kina me yacova na Siga ni Lewa. 5E a sega tale ga ni vosota na vuravura makawa na Kalou, ia a vakavuna ga me yaco na waluvu me luvuci kina na nodra vuravura na tamata i valavala ca. E a qai vakabulai ga ko Noa o koya ka vunautaka tiko na i valavala dodonu, kei na lewe vitu tale na tamata. 6A vakarusai rau na koro ko Sotoma kei Komora na Kalou e na bukawaqa me i vakaraitaki ni ka e na yaco vei ira na tamata ca e na gauna e muri. 7E a vakabulai Lote na yalododonu, o koya ka a rarawa vakalevu na lomana e na vuku ni nodra i vakarau vakasisila na tamata ca. 8Ni a vakararawataki na yalo ni tamata dodonu koya e na nodra i valavala vakasisila e a dau raica ka rogoca e na veisiga e na nona bula maliwai ira tiko. 9Sa kila na Turaga na sala me vakabulai ira kina era doka na Kalou mai na veivakatovolei e vuqa; sa kila tale ga na sala me vakaitotogitaki ira tiko kina na tamata i valavala ca me yacova na Siga ni Lewa, 10ka vakabibi sara vei ira era vakamuria tiko na veigagadre dukadukali vakayago, ka cata na veiliutaki ni Kalou. Era sa tamata yalo kaukauwa ko ira oqo, ka ra sa sega ni rere ni vosa beci ira na veika bula vaka i serau mai cake. 11Ia ko ira sara mada ga na agilosi, e dina ga ni ra kaukauwa cake ka qaqa mai vei ira na i vakavuvuli lasu, era sega ni bau beitaki ira ka vakacacani ira e na mata ni Turaga. 12Ia ko ira na tamata oqo era sa vakataki ira na manumanu sega ni vakayalo ka ra a buli me ra toboki ka vakamatei; era sa dau vosavakacacataka tiko na veika era sega ni kila. Era na vakarusai tale ga me vakataki ira na manumanu, 13ka ra na vakararawataki e na vuku ni veivakararawataki ga era a vakavuna. Era sa dau okata me ka ni lasa na marau vakalialia e na siga levu tutu. Ni ra sa dukadukali ka velavela, era sa dau kana vata kei kemuni ka marautaka tiko ga na nodra i vakarau veivakaisini. 14Sa tu vei ira na mata sa sinai tu ga e na dauveibutakoci, ka sega ni mamau rawa e na ca. Era sa dau vakacalai ira e malumalumu tu na nodra i lakolako. Sa tu vei ira na yalo sa vakatavulici tu e na kocokoco. E na tau vei ira na cudru ni Kalou! 15Era sa lako sese tu ni ra sa biuta na sala dodonu; era sa muria na i vakarau i Pelami, na luve i Piori, o koya ka sa dau domona na i yau e dau rawa mai na caka ca, 16ia e a qai cudruvi e na vuku ni nona talaidredre, ni a vosa e dua na asa e na vosa vakatamata ka tarova na nona cakacaka lialia. 17Ko ira na tamata oqo era sa vaka na mataniwai maca kei na o sa cagina e na cava. Sa maroroya tu na Kalou me nodra na butobuto loaloa titobu sara. 18Era sa dau vosataka tiko na vosa lialia ka viavialevu, ka vakayagataka na gagadre ca vakayago me ra coriti ira kina na tamata era sa qai tekivu sara tiko ga me ra dro tani mai vei ira na tamata i tovo ca. 19Era yalataka vei ira na galala, ia ko ira mada ga vaka i ira era sa bobula tiko ga ki na ca; ka ni sa yaco me bobula na tamata yadua ki na ka sa rawai koya. 20Kevaka era a sa dro bula mada mai na veika dukadukali ni vuravura oqo e na vuku ni nodra kila na noda Turaga ka i Vakabula ko Jisu Karisito, ka ra sa baci tacori tale ka rawai e na veika ca oqo e na qai yaco me ca vakalevu cake na kedra i tinitini mai na kedra i tekitekivu. 21E a uasivi cake vei ira me ra a kakua sara ga ni kila na sala ni valavala dodonu ka ca ni ra sa kila na i vakaro savasava a soli vei ira ka ra qai vakanadakuya. 22Ia na ka e yaco vei ira e vakaraitaka ni dina na i vosavosa koya: “Sa lesu tale na koli ki na nona lua” ka, “Sa qiliraki koya tale e na soso na vuaka sa vakasilimi oti.”

will be added

X\