2 PITA 1

1Oqo na i vola i Saimoni Pita, na bobula ka i apositolo i Jisu Karisito. Ki vei ira sa soli vei ira na vakabauta talei sa tautauvata kei na neitou e na yalododonu ni noda Kalou ka noda i vakabula ko Jisu Karisito: 2Me vakalevutaki mada ga vei kemuni na loloma kei na vakacegu e na nomuni sa kila na Kalou kei na noda Turaga ko Jisu! 3Sa solia vei keda ko koya e na nona kaukauwa va-Kalou na veika kece e ganiti keda me rawa ni vaka kina na i tovo ni Kalou na noda bula e na noda kilai koya sa kacivi keda me da vaka i votavota e na nona lagilagi kei na nona vinaka. 4E na veika gona ko ya sa solia kina ko koya vei keda na nona veivosa ni yalayala lelevu ka talei sara e vuqa me rawa kina vei kemuni mo ni dro tani mai na veigagadre ca e veivakarusai e tu e vuravura ka mo ni vakaivotavota e na i tovo ni bula va-Kalou. 5E na vuku ni ka sara ga oqo ni gumatua sara kina mo ni vakaikuritaka na nomuni vakabauta e na i valavala vinaka ka vakaikuritaka na nomuni i valavala vinaka e na kila ka, 6ni vakaikuritaka na kila ka e na lewai koya vinaka, ka vakaikuritaka na lewai koya vinaka e na dauvosota, ka vakaikuritaka na dauvosota e na i vakarau va-Kalou, 7ka vakaikuritaka na i vakarau va-Kalou e na veilomani ni veitacini, ka vakaikuritaka na veilomani ni veitacini e na loloma. 8Sa i koya oqo na veika e yaga vei kemuni, ia kevaka sa tu vakalevu vei kemuni e na yaco mo ni gugumatua ka yaga sara e na nomuni kila na noda Turaga ko Jisu Karisito. 9Ni ko koya yadua e sega vua na veika oqo sa lekaleka na nona rai, mataboko ka sa guilecava ni a sa vakasavasavataki oti mai na nona i valavala ca kece sa cakava oti. 10O koya gona, kemuni na wekaqu, ni gumatua cake kina mo ni vakadinadinataka na nomuni kacivi kei na nomuni digitaki. Kevaka ko ni kitaka oqo ko ni na sega sara ni bale. 11E na ka oqo sa na qai soli kina vei kemuni na dodonu taucoko sara mo ni curu kina ki na matanitu tawa mudu ni noda Turaga ka i Vakabula ko Jisu Karisito. 12O koya gona oqo au sa dau nakita voli ga kina me'u vakauqeti kemuni mo ni dau nanuma na veika oqo, e dina ga ni ko ni sa kilai ira tu ka ko ni sa vakataudeitaki tu e na i vakavuvuli dina sa tu vei kemuni. 13Au nanuma ni sa dodonu, e na gauna kece ga au sa tiko voli ga kina e na yago oqo, me'u vakauqeti kemuni mo ni dau nanuma na veika oqo; 14ni'u sa kila ni sa voleka mai na gauna me'u na luvata tani kina na yagoqu qele oqo me vaka sa vakaraitaka vakamatata vei au na noda Turaga ko Jisu Karisito. 15Ia au na cakava na veika kece me rawa ni ko ni dau nanuma tiko ga kina na veika oqo ni'u sa takali oti yani. Eratou a Raica e na Matadratou na i Serau i Karisito 16Keitou a sega ni vakararavi ki na i tukuni buli wale ga e na neitou vakatakila vei kemuni na kaukauwa kei na lako mai ni noda Turaga ko Jisu Karisito, ia keitou a vakadinadinataka sara ga e na mata i keitou na nona cecere. 17Keitou a tiko e kea e na gauna e a vakacerecerei ka vakalagilagi koya kina na Kalou na Tamana ni a rogo kina vua e dua na domo mai na i Serau Lagilagi ka vaka, “Oqo na noqu Gone ni Toko, ko koya ka'u sa dau vinakata vakalevu!” 18A rogo na domo oqo mai lomalagi, ka keitou a rogoca ni keitou a tiko vata kaya e na ulunivanua tabu. 19A ka oqo keitou sa qai vakabauta vakalevu cake sara kina na nodra i tukutuku na parofita. E na lako vinaka sara vei kemuni ke ko ni vakasamataka na i tukutuku ko ya, ni sa vaka e dua na cina sa caudre tiko e na dua na vanua butobuto, ka yacova ni sa kida na mataka, ka sa cabe mai na kalokalo i volasiga e na yalomuni. 20Ia e dodonu mo ni kila taumada oqo, ni sega ni dua na parofisai e tu e na i Vola Tabu e rawa ni vakamacalataka vaka i koya ga e dua na tamata, 21me vaka ni a sega ni bau dua na parofisai e yaco mai e na gauna e liu e na lewa ga ni tamata, ia era a vosataka ga na tamata na vosa ni Kalou me vaka sa vakauti ira kina na Yalo Tabu.

will be added

X\