2 JONI 1

1Oqo na i vola mai vua na Qase ki vua na Marama digitaki ni Kalou kei ira na luvena, ko ira ka'u sa dau lomani ira kina sara; io e sega ni ko i au duadua ga, ko ira kece tale ga era sa kila na dina; 2ni sa tu dei tiko vei keda na dina ka na tiko ga vei keda ka sega ni mudu. 3Me noda mada ga na loloma, na yalololoma kei na vakacegu mai vua na Kalou na Tamada kei na Turaga ko Jisu Karisito na Luve i Tamada; me sa noda mada ga na veika oqo e na dina kei na loloma! 4Au sa reki vakalevu dina ni'u raica ni ra sa muria tiko na dina e so na nomuni gone me vaka sara ga e a vakaroti keda kina ko Tamada. 5Ia oqo, au sa kerei kemuni na Marama, e sega ni vaka ni'u sa qai vola tiko yani e dua na i vakaro vou, ia na kena ga e a sa soli tu vei keda mai na i vakatekivu, ko ya me da veilomani. 6Ia sa i koya oqo na loloma; me da muria na nona i vakaro. Sa i koya oqo na i vakaro, me vaka ko ni a sa rogoca mai na i vakatekivu: ni tiko veilomani. 7Ni sa lewe vuqa na dauveivakacalai era sa veilakoyaki tiko e vuravura, na tamata ka ra sega ni via vakatusa ni a mai yaco me tamata ko Jisu Karisito; na tamata vaka ko ya sa dau veivakacalai ka sa i koya na meca i Karisito. 8Ni qarauni kemuni vinaka me kakua ni yali vei kemuni na veika eda a sa kitaka rawa, ia mo ni taura kece ga na kemuni i sau dodonu. 9Ko koya sa lako sivita na i vakavuvuli i Karisito, ka sega ni tiko ga e na i vakavuvuli ko ya, sa sega ni tiko vua na Kalou; ia ko koya sa muria dei tiko na i vakavuvuli ko ya e rau sa tiko ruarua vua na Tamana kei na Luvena. 10Kevaka e lako yani vei kemuni e dua na tamata ka sega ni vakatavuvulitaka na i vakavuvuli oqo, ni kakua ni vakacurumi koya ki vale se vosa vakalougatataki koya; 11ni sa veitokani vata kei koya e na nona cakacaka ca na tamata e vosa vakalougatataki koya. 12E dina ga ni sa levu tu na veika me'u na vola yani vei kemuni, au vinakata cake me'u kakua ni vakayagataka na pepa kei na wai ni volavola, ia au nuitaka ga me'u na la'ki raici kemuni yani ka veivosaki sara kei kemuni e na matanavotu, ka me qai ka taucoko sara kina na noda reki. 13Era sa loloma yani vei kemuni ko ira na luve i koya na Marama digitaki ni Kalou, na tacimuni.

will be added

X\