2 KORINICA 9

1E sega ni yaga na noqu volavola yani vei kemuni me baleta na i loloma vei ira na tamata ni Kalou mai Jutia. 2Au sa kila na nomuni taleitaka na via veivuke; ka'u sa vakacaucautaki kemuni kina vei ira na kai Masitonia. Au sa tukuna vei ira ni a sa vakarau tu ko Akaia me veivuke mai na yabaki sa oti. A sa vakauqeta e lewe vuqa vei ira na nomuni yalo gu. 3Au sa talai iratou yani kina na wekada, me vakadinadinataki kina na neitou vakacaucautaki kemuni e na ka oqo. Au vinakata mo ni vakarau sara tu ga me vaka na ka au a tukuna me baleti kemuni. 4De ra na mani lako vata mai kei au e so na kai Masitonia, ka ra qai kunea ni ko ni sega tu ni vakarau, keitou na sega ni madua wale ga kina, ko ni na madua tale ga kina ni sa sivia tale na ka keitou nuitaka. 5Sa i koya oqo au nanuma kina ni daumaka caka me'u kerei iratou na wekada me ratou liu yani vei kemuni ka vakarautaka na nomuni i loloma ko ni sa yalataka oti tu. Au vinakata me vakarau tu me vaka e ka ni loloma ka me kua e na vosa kudrukudru. 6Ni nanuma sara toka oqo: O koya sa kaburaka vakalailai e na tamusuka vakalailai; ia ko koya sa kaburaka vakalevu e na tamusuka vakalevu. 7Na tamata yadua me dui solia sara ga na ka e vinakata na lomana, ka me kua e na voraki se ni sa vakaukauwataki. Ni sa dau vinakata na Kalou na tamata e solia ka e na yalomarau. 8Sa rawa tale ga vua na Kalou me vakalevutaka vei kemuni na veika ni loloma kece ga, me bini tu ga kina vei kemuni na i yau kece ga, me levu cake tiko ga kina na ka ko ni solia ki na veicakacaka vinaka kece ga. 9Me vaka sa volai e na i Vola Tabu, “Sa veisoliyaka na tamata kila na Kalou na ka e tu vua vei ira na dravudravua. Sa sega ni mudu rawa na nona yalovinaka” 10Ia na Kalou ko koya sa dausolia na sore ni kau vei Ira na dau kabukaburaki, kei na madrai me laukana, e na solia, ka vakalevutaka na veika kece ga me tu vei kemuni, ka na vakalevutaka na vua ni nomuni cakacaka vinaka. 11E na vakavutuniyautaki kemuni vakalevu sara ko koya mo ni loma soli kina e na veigauna kece ga, ka na lewe vuqa era na vakavinavinaka kina vua na Kalou e na vuku ni nomuni i loloma keitou kauta. 12Ni sa sega wale ga ni qaravi na nodra dravudravua na tamata ni Kalou e na cakacaka oqo, sa tubu cake tale ga kina na levu ni vakavinavinaka vua na Kalou. 13E na vuku ni vakadinadina ni nomuni cakacaka oqo, era lewe vuqa era na vakalagilagia kina na Kalou, e na talairawarawa ki na i tukutuku vinaka kei Karisito kei na nomuni lomasoli ni soli ka ni loloma vei ira kei Ira kece na tamata. 14Era na masulaki kemuni e na nodra lomani kemuni, baleta na loloma tawa yalani ni Kalou sa tu vei kemuni. 15Me ia na vakavinavinaka vua na Kalou e na vuku ni nona i solisoli e sega ni vakamacalataki rawa.

will be added

X\