2 KORINICA 8

1Keitou vinakata mo ni kila na veiwekani na loloma ni Kalou sa soli ki na veisoqosoqo lewe ni lotu mai Masitonia. 2Era a vakatovolei sara vakaca e na ka rarawa era sota kaya, ia sa vuabale na nodra marau; e dina ga ni ra dravudravua sara, ia sa ka levu na nodra loma soli. 3Au sa vakadinadinataka ni ra sa dau soli me vaka na ka era rawata, era sa dau solia na ka e sivia na ka era rawata. E na nodra loma soli, 4era sa vakamasuti keitou ka cikevi keitou me ra vakaitavi tale ga e na ka ni veivukei vei ira na tamata ni Kalou mai Jutia. 5Na ka oqo sa sivia na ka keitou namaka. Era sa soli ira taumada vua na Turaga, ka soli ira tale ga vei keitou me vaka na loma ni Kalou. 6Keitou sa vakauqeti Taito kina, o koya sa tekivutaka na cakacaka oqo me vakuria tiko mo ni vakaotia kece sara kina na cakacaka loloma oqo. 7Ko ni sa vutuniyau e na ka kece ga e tu vei kemuni; e na vakabauta, e na vosa, e na kila ka, e na nomuni yalo gu, kei na nomuni loloma vei keitou. Keitou vinakata me levu tale ga na nomuni lomasoli e na cakacaka ni loloma oqo. 8Au sega ni tukuna na ka oqo me vaka e i vakaro; au vakaraitaka ga na nodra yalo gu e so me'u kunea kina na dina ni nomuni loloma. 9Ni ko ni sa kila na loloma ni noda Turaga ko Jisu Karisito; e dina ni a vutuniyau, ia sa yaco me dravudravua e na vukumuni, me yaco kina mo ni vutuniyau e na nona dravudravua. 10Sa i koya oqo na noqu vakasama e na ka oqo: e vinaka cake vei kemuni mo ni vakaotia mada na ka ko ni a tekivutaka e na yabaki sa oti. Sa i kemuni na kena i matai, ia ko ni sega ni cakava wale ga, ko ni taleitaka sara ga mo ni cakava. 11Au vinakata mo ni cakava tiko ka vakaotia sara. Ni yalo gu mo ni vakaotia me vaka ko ni a nakita; me caka e na ka ga e tu vei kemuni. 12Kevaka ko ni sa lomasoli mo ni soli ka, sa na ciqomi na ka e tu vei kemuni ko ni solia; ka sega ni ka e sega ni tu vei kemuni. 13Au sega ni via vakamamadataka vei ira e so ka me qai tarabi vei kemuni. 14Me vakatautauvata ga; na ka sa levu ka vuabale tu vei kemuni mo ni solia me nodra sa dravudravua e na gauna oqo; ia me qai nomuni na ka sa levu ka vuabale tu vei ira ni ko ni sa dravudravua ka me veisosomitaki vinaka ga kina. 15Me vaka sa volai e na i Vola Tabu, “Na tamata sa kumuna vakalevu sa sega ni levu na nona, kei na tamata sa kumuna ga vakalailai sa sega ni lailai sara na nona.” 16Me ia na vakavinavinaka vua na Kalou, o koya sa vakatubura e na loma i Taito na yalo gu me dau nanumi kemuni. 17Ni sa sega wale ga ni vakadonuya na neitou vakamamasu, sa taleitaka sara ga vaka i koya, ka nakita me lako yani vei kemuni. 18Ia keitou sa talai koya yani vata kei koya na wekada era sa vakacaucautaka kece ga na veisoqosoqo lewe ni lotu e na nona vakateteya na i tukutuku vinaka. 19E sega ni sa i koya wale ga ko ya, sa digitaki tale ga mai na veisoqosoqo lewe ni lotu me lako vata voli kei keitou e na neitou qarava voli na cakacaka loloma oqo, me lagilagi kina na noda Turaga ka vakaraitaki kina na neitou via veivuke. 20Keitou sa qarauna me kua sara ni dua me vakalewai keitou e na neitou qarava voli na i solisoli vakailoloma oqo. 21Sa neitou i naki me keitou cakava na ka dodonu; sega wale ga e na mata ni Turaga, ia e na matadra sara tale ga na tamata. 22Keitou sa tala tale ga yani na wekada oqori me lako vata yani kei rau. Keitou sa vakatovolei koya e na vuqa na gauna, ia keitou sa raica ni sa yalo gu e na veika e vuqa, ka sa yalo gu sara tiko vakalevu e na gauna oqo e na levu ni nona vakadinati kemuni. 23Ia ko Taito sa noqu i tokani ka cakacaka vata kei au e na vukumuni; ko i rau tale ga na wekada e rau sa lako kaya yani e rau sa matataka na veisoqosoqo lewe ni lotu me vakalagilagi kina na Karisito. 24Ni vakaraitaka na dina ni nomuni loloma vei iratou me ra vakadinadinataka na veisoqosoqo lewe ni lotu ka kila ni dina na neitou sakitaki kemuni.

will be added

X\