2 KORINICA 7

1Kemuni na wekaqu, na veivosa ni yalayala oqo sa caka vei keda. Sa i koya oqo me da vakasavasavataki keda kina mai na dukadukali kece ni yago kei na yalo ka bula e na bula savasava sara e na noda rerevaka na Kalou. 2Ni dolava na yalomuni vei keitou. Keitou a sa sega mada ni bau vakacala e dua na tamata; keitou sega ni bau vakacacana e dua na tamata, se via rawata na neitou ka mai vua e dua na tamata. 3Au sega ni tukuna na ka oqo me'u vakacacani kemuni kina; me vaka au a kaya e liu, ko ni sa kauwaitaki tiko ga e na yalo i keitou me da mate vata ka bula vata. 4Au sa nuidei e na vukumuni; ka'u dau sakitaki kemuni vakalevu. Au sa vakasinaiti e na vakacegu kei na reki, veitalia ga na veika ni leqa kece ga keitou sota kaya. 5E na neitou yaco sara mada ga yani ki Masitonia, e sega ni bau vakacegu na yago i keitou, ia keitou sa vakararawataki e na veiyasana kece ga. E sau na veivala, ia e loma na rere. 6Ia na Kalou o koya sa dau vakaukauwataki ira na yalolailai sa vakacegui keitou e na yaco mai nei Taito, 7sega wale ga e na nona yaco mai, e na vuku tale ga ni veivakaukauwataki sa rawata mai vei kemuni. Sa mai tukuna na levu ni nomuni via raici au, na nomuni rarawataka na veika sa oti, nomuni yalodina kei na nomuni loloma vei au. Sa i koya oqo na ka sa vakamarautaki au. 8Dina ga au sa vakararawataki kemuni e na i vola, au sega ni veivutuni kina; dina ni'u a veivutunitaka ni'u raica ni a vakararawataki kemuni na i vola, ia e a lekaleka wale ga. 9Ia oqo, au sa marau, sega me baleta na nomuni vakararawataki, e na vuku ga ni nomuni rarawa ka yaco kina na nomuni veivutuni. Ko ni sa vosota na nomuni rarawa me vaka e nakita na Kalou, ia keitou sa sega ni cakava e dua na ka mo ni vakacacani kina. 10Na rarawa sa vaka na loma ni Kalou sa vakavuna na veivutuni sa yaco kina na vakabulai, sa sega ni veivutunitaki tale, ia na rarawa vakavuravura sa vakavuna na mate. 11Ni raica mada na ka sa cakava na Kalou e na nomuni rarawa; na nomuni yaco mo ni yalo gu kei na nomuni saga mo ni tawa cala. Sa kune vei kemuni na cudruvaka na ka dodonu, gadreva na veika vinaka ka vakarau tu mo ni totogitaki na tamata cala. Ko ni sa vakaraitaki kemuni ni ko ni sa tawa cala e na ka kece oqo. 12E dina ni'u a volavola yani vei kemuni, au sega ni volavola yani e na vukuna sa kitaka na ka ca, ka sega e na vuku i koya sa vakacacani, ia me'u vakaraitaka ga kina vei kemuni e na mata ni Kalou na nomuni dau nanumi keitou. 13Sa i koya oqo keitou sa vakayaloqaqataki kina. Ia me i kuri ni neitou vakayaloqaqataki, keitou sa marau vakalevu sara e na vuku ni marau nei Taito ni sa vakacegui na yalona e na vukumuni. 14Kevaka au sa vakacaucautaki kemuni vua e na veika e so, e na sega ni'u madua kina. Ia me vaka ga ni dina na veika kece keitou a tukuna vei kemuni sa dina tale ga vaka kina na neitou vakacaucautaki kemuni vei Taito. 15Sa tubu cake tiko ga na nona loloma vei kemuni na dau vakananuma na nomuni talairawarawa kece sara, kei na nomuni ciqomi koya e na rere kei na sautanini. 16Au sa marau ni sa dei sara na yaloqu vei kemuni.

will be added

X\