2 KORINICA 6

1Ia, e na neitou cakacaka vata kei na Kalou, keitou sa vakamasuti kemuni kina mo ni kakua ni vakamaumautaka na loloma ni Kalou ko ni sa ciqoma, 2ni sa kaya na Kalou, “E na gauna vinaka au a sa rogoci iko; e na siga ni veivakabulai au a vukei iko.” Raica, sa i koya oqo na gauna vinaka, ka sa i koya oqo na siga ni veivakabulai. 3Keitou sega ni via vakatarabetaka e dua na tamata, me kakua kina ni kune e dua na cala e na neitou cakacaka. 4Keitou sa vakaraitaka ni keitou sa i talatala ni Kalou e na veika kece sara keitou cakava. Oqori e na neitou vosota na leqa, na veika dredre kei na veika rarawa. 5Keitou a kanakuita, biu ki na valeniveivesu, sota kei ira na i vavakoso era cudruvi keitou, keitou cakacaka vakaukauwa ka via kana. 6Ia keitou sa vakaraitaki keitou ni keitou i talai ni Kalou e na neitou yalosavasava, e na kila ka, vosota vakadede kei na yalo loloma. Sa vu na veika oqo mai na Yalo Tabu, na loloma dina, 7na neitou vosa dina kei na kaukauwa ni Kalou. Sa neitou i yaragi na yalosavasava me keitou ravuravu kina, ka taqomaki keitou tale ga kina. 8Keitou sa dokai ka beci, vakasewasewani ka vakacaucautaki. Keitou sa okati me dauveivakacalai, ia keitou sa dina tiko ga, 9keitou sa sega ni kauwaitaki, ia era sa kilai keitou na tamata. Sa nanumi ni vaka keitou sa mate, ia keitou sa bula tiko. Keitou sa totogitaki, ia keitou sa sega ni vakamatei sara. 10Keitou sa vakararawataki, ia keitou sa dau marau tiko ga. Keitou sa dravudravua, ia keitou sa vakavutuniyautaki ira e lewe vuqa; sa sega ni tu vei keitou e dua na ka, ia sa vaka sa tu vei keitou na ka kece ga. 11Kemuni na kai Korinica, keitou sa vosa vakasavasava sara ga vei kemuni. Keitou sa dolava tale ga na yalo i keitou vei kemuni. 12Keitou sa sega ni sogota na yalo i keitou vei kemum; ia ko i kemuni ko ni sa sogota ga na yalomuni vei keitou. 13Au sa vosa vei kemuni me vaka ko ni sa luvequ; ni vakaraitaka vei keitou na mataqali loloma keitou sa vakayacora vei kemuni. Ni dolava vakalevu na yalomuni. 14Ni kakua ni cakacaka vata kei ira na tawa vakabauta. A cava na ka e rau veitokani kina na dodonu kei na tawa dodonu? E rau veitokani vakaevei na rarama kei na butobuto? 15E rau na veiyaloni vakaevei ko Karisito kei na tevoro se a cava e rau tauvata kina e dua na tamata vakabauta kei na dua e tawa vakabauta? 16A cava e rau tautauvata kina na Vale ni Kalou kei na veimatakau? Ni sa i keda ga na vale tabu ni Kalou. Me vaka e kaya na Kalou: “Au na tiko e na lomadra ka lako voli kina; au na nodra Kalou ka ra na noqu tamata. 17O koya gona mo ni qai lako tani mai na kedra maliwa na i valavala ea ni lako vakatikitiki mai vei ira, sa kaya na Turaga, kakua ni tara na ka tawasavasava; au na qai ciqomi kemuni. 18Au na qai yaco me'u tamamuni ko ni na qai luvequ tagane ka luvequ yalewa. Sa kaya na Turaga kaukauwa.”

will be added

X\