2 KORINICA 5

1Ia keitou sa kila, kevaka sa rusa na neitou vale vakavuravura, na yago i keitou sa dua na neitou vale mai vua na Kalou, na vale sa sega ni caka e na liga, sa vale sega ni rusa rawa mai lomalagi. 2Ni keitou tiko e na vale oqo keitou sa vutugu ka gadreva me keitou vakayagataka na neitou vale mai lomalagi. 3Ni keitou sa na vakaisulu kina sa na sega ni kune na neitou luvawale. 4Ni keitou tiko e na vale vakavuravura oqo, keitou sa vutugu e na kena tarabi, oqo e sega ni vu mai na neitou cata na vale yago vakavuravura, ia keitou vinakata na kena vakalomalagi; me tiloma kina na ka sa mate rawa, na bula. 5Na kalou ga sa i koya sa vakarautaki keitou ki na ka oqo ka sa solia vei keitou na Yalona me kena i vakadinadina ni veika e na solia mai e muri. 6Sa i koya oqo keitou sa yaloqaqa tiko ga kina, ni keitou kila ni gauna kece ga keitou vakaitikotiko tiko kina e na yago oqo, keitou sa yawa tiko mai na i tikotiko ni Turaga. 7Ia keitou sa bula tiko ga e na vakabauta ka sega e na vuku ni neitou sa raica sara na ka. 8Keitou sa doudou, ka vinakata eake me keitou sa tawase kei na yago oqo ka tiko vata kei na Turaga. 9Keitou tiko e ke, se keitou tiko mai kea, sa neitou i naki me keitou vinaka vua na Turaga. 10Ni da na rairai kece e na mata ni tikotiko ni veilewai i Karisito; me na dui taura na tamata yadua na kena i sau, me vaka na ka sa cakava ki na yagona, se vinaka se ca. 11Keitou sa kila tu, na cava na rerevaka na Kalou, sa i koya keitou sa vakamasuti ira kina na tamata. Ia sa kilai keitou vinaka sara tu na Kalou, ka'u nuitaka ni ko ni sa kilai keitou vinaka tale ga. 12Keitou sa sega ni tukuni keitou tale yani vei kemuni, ia keitou solia ga yani vei kemuni mo ni lewa vaka i kemuni na ka mo ni sakitaki keitou kina. Me bau so kina na ka ko ni kaya vei ira era dau sakitaka ga na i rairai ni tamata e sau ka sega na yalo e loma. 13Kevaka keitou sa lialia sa vaka kina e na vukuna ga na Kalou, ia kevaka sa sega ni lialia, sa vaka kina e na vukumuni. 14Ni sa lewai keitou na loloma i Karisito; keitou sa kila deivaki ni a sa mate oti e dua na tamata e na vuku ni tamata kece ga, sa i koya gona e da sa vakaivotavota kece kina na tamata e na nona mate. 15Sa mate ko koya e na vuku ni tamata kece, me ra kua kina ni bula e na vukudra ga ko ira era bula, ia me ra bula ga e na vuku i koya e a mate ka vakaturi cake tale e na vukudra. 16Ia me tekivu oqo ka lako yani, keitou sa na sega tale ni qai doka e dua na tamata e na vuku ni ka vakayago. E dina ga ni dua na gauna keitou dokai Karisito e na i tovo ni rai vakayago, ia oqo sa sega ni qai vaka kina. 17O koya gona, kevaka sa tu vata kei Karisito e dua na tamata, sa na yaco me buli vou ko koya; sa takali na veika makawa; ka raica sa tekivu e dua na bula vou. 18Sa ca kava na ka kece oqo na Kalou, o koya sa vukici keitou na nona meca me keitou wekana e na vuku i Karisito, ka solia vei keitou na i tavi me keitou kauti ira mai na kena vo ni tamata me ra mai wekana tale ga. 19Na lewe ni neitou i tukutuku oya ni sa qisi ira kece tiko mai na tamata na Kalou me ra mai wekana e na vuku i Karisito. Sa sega ni qai maroroya tale tu na Kalou e dua na i tukutuku ni nodra i valavala ca, ka sa solia vei keitou na cakacaka ni kena vunautaki na i tukutuku ni veivinakati. 20Ia keitou sa matataki Karisito, ka sa vakamamasu tiko na Kalou e na gusu i keitou. Keitou sa vakamasuti kemuni kina e na vuku i Karisito mo ni veivinakati kei na Kalou. 21Sa sega na i valavala ca i Karisito. Ia sa qisi koya na Kalou me votai e na noda i valavala ka me da vakaivotavota kina e na nona vinaka na Kalou.

will be added

X\