2 KORINICA 3

1Sa tekivu beka me keitou tukuni keitou vei kemuni? Sa na yaga beka na i vola me tukuni keitou vei kemuni se na i vola mai vei kemuni? 2Sa i kemuni sara ga na neitou i vola keitou gadreva, na i vola e volai e na yalo i keitou, sa wiliki ka kilai mai vei ira na tamata kece ga. 3Sa macala tu ni sa i kemuni ga e dua na i vola mai vei Karisito, sa soli vei keitou me keitou mai solia; e sega ni volai e na wainivolavola e na pepa se ceuti e na dua na vatu, ia sa vola ga na Yalo ni Kalou bula e na yalo ni tamata. 4Sa vaka tu oqo na neitou nuidei vua na Kalou e na vuku i Karisito. 5E sega ni baleta ni tu vei keitou na kaukauwa me keitou kaya rawa kina ni sa vu vei keitou e dua na ka. Sa vu na neitou kaukauwa mai vua na Kalou, 6o koya sa solia vei keitou na kaukauwa me keitou i talatala ni veiyalayalati vou, e sega ni volai e na lawa, ia e na cakacaka ni Yalo Tabu. Ni sa kauta mai na mate na lawa, ia sa kauta mai na bula na Yalo Tabu. 7Kevaka e vakaiserau na kena a soli mai na lawa sa ceuti tu e na vatu sa kauta mai na mate, ka sa sega kina ni rawa vei ira na Isireli me ra raica matua na mata i Mosese e na kena i serau sa rawa ni seyavu, 8e na qai vakaevei na levu ni serau ni ka e kauta mai na Yalo Tabu. 9Kevaka sa vakaiserau na kena soli mai na ka e kauta mai na cudruvi sa na qai vakaevei na levu ni serau ni ka e kauta mai na veivakadonui. 10Sa mani seyavu yani kina na i serau ni ka e liu, e na kena levu ni serau ni ka sa uasivi cake. 11Ia kevaka e vakaiserau na ka sa rawa ni talai, sa na vakaevei na levu ni kena i serau na ka sa tudei. 12Ia ni sa tu vei keitou na i nuinui oqo keitou sa yalodei kina. 13Keitou sa sega ni vakataki Mosese, o koya sa ubia na matana e na i pulou me ra kakua kina ni raica na Isireli na seyavu kei na takali ni serau. 14Ia sa vakaukauwataki na lomadra; me yacova mai edaidai, ni ra wilika na veiyalayalati makawa, e sa kaukauwa tu ga na lomadra, ia sa kau tani rawa wale ga na kaukauwa ni lomadra e na vuku i Karisito. 15E daidai, e na gauna kece e wiliki kina na Lawa i Mosese, e sa kaukauwa tu ga na lomadra. 16Ia kevaka e dua na tamata e gole vua na Turaga, sa na kau tani sara na i pulou, me vaka e kaya na i Vola Tabu. 17“Na Turaga” sa i koya ga na Yalo Tabu, na vanua e kune kina na Yalo ni Turaga sa kune kina na galala. 18Ia ko i keda kece sa cereki na matada sa laurai vei keda na i serau ni Turaga, e da na vukici tiko me vakataki koya e na i serau sa serau cake tiko ga. Sa i koya oqo na cakacaka ni Turaga na Yalo Tabu.

will be added

X\