2 KORINICA 13

1Oqo na i katolu ni noqu lako yani me'u sikovi kemuni. Me vaka e kaya na i Vola Tabu, “Na veibeitaki kece me vakadinadinataki mai vei rau e lewe rua se lewe tolu na i vakadinadina.” 2Au vinakata me'u tukuna vei kemuni ko ni sa cala oti e na noqu tiko mai keri e liu e na i karua ni noqu sikovi kemuni, ka'u tukuna tale ga oqo ni'u sa tiko tani: E na gauna au na lako tale yani kina vei kemuni e na sega tale ni dua me na drotaka na i totogi. 3Ko ni sa via raica e dua na i vakadinadina kece ni sa i Karisito sa vosa tiko e na gusuqu. Sa sega ni malumalumu na i tovo i Karisito vei kemuni, ka sa vakaraitaka na nona kaukauwa e na kemuni maliwa. 4Dina ga ni a mate mai na kauveilatai ko koya e na malumalumu ia sa bula tiko e na kaukauwa ni Kalou. Ko i keitou tale ga keitou sa vakaivotavota e na nona malumalumu, ia keitou sa bula vata kaya e na kaukauwa ni Kalou me keitou cakacaka kina vei kemuni. 5Ni dikevi kemuni mada se ko ni sa vakabauta se sega. Ko ni bau vakila tiko li ni sa tiko vei kemuni ko Jisu? Ke sega ko ni sa na rawai ga. 6Au nuitaka ni ko ni na kila ni keitou sega ni vakadrukai. 7Keitou sa masulaka vua na Kalou mo ni kakua ni cala, sega ni baleta me laurai kina na neitou gumatua, ia mo ni cakava kina na ka dodonu, veitalia ga ni vaka keitou rairai vakadrukai. 8Ni keitou sa sega ni rawa ni cakava e dua na ka me veisaqasaqa kei na dina ni Kalou, ia me keitou totaka ga na ka dina. 9Keitou marau ni keitou malumalumu ka ko ni sa kaukauwa, ia keitou masulaka mo ni yaco mo ni vinaka sara. 10Na vuna au vola yani kina na ka oqo ni'u sa tiko tani me'u na kakua kina ni taurivaka vakasivia ni'u yaco yani na kaukauwa e solia vei au na Turaga me'u veivakatataki cake kina ka sega ni veivakarusai. 11Me'u tinia kemuni na veiwekani ni sa moce mada. Ni vakavinavinakataka na nomuni lakolako, ni muria na noqu vosa, ni lomavata vaka i kemuni ka bula voli e na yalo vakacegu. Me na tiko vata kei kemuni na Kalou ni loloma kei na vakacegu. 12Ni veivakabulataki e na veireguci savasava. Era sa loloma kece tu yani vei kemuni na tamata ni Kalou. 13Me tiko vata kei kemuni kece ga na loloma soliwale ni noda Turaga ko Jisu Karisito kei na loloma ni Kalou vata kei na veitokani ni Yalo Tabu.

will be added

X\