2 KORINICA 12

1Sa na dodonu me'u dokadokai au; dina ga ni sega ni dua na ka e kauta mai. Ia au sa na vakayacora ga me'u tukuna kina na raivotu e so kei na i vakatakila e solia mai vei au na Turaga. 2Au kila e dua na tamata lotu va-Karisito e a kau cake ki na i katolu ni lomalagi e na tinikava na yabaki sa oti. (Au sega ni kila se a yaco dina na ka oqo se a raivotu ga, e kila taudua ga na Kalou.) 3Au kila ni a kau cake na tamata koya ki Parataisi. (Au sega tale ga ni kila se a yaco dina na ka ko ya se a raivotu ga. Sa kila taudua ga na Kalou.) 4E a rogoca mai kea na veika e sega ni rawa ni tukuna e na vosa, na veika e sega ni rawa ni vosataka na tamata. 5Na tamata koya sa i koya au vakalevulevuya, ia au sega ni dokadokai au kina vakavo wale ga na veika e vakaraitaka na noqu malumalumu. 6Kevaka au dokadokai au e sega beka ni baleta ni'u lialia, ia e baleta ga ni'u via tukuna na ka dina. Ia au na sega ni boletaki au baleta ni'u sega ni vinakata me dua e nanuma ni'u vinaka cake mai vua, ka me raica ga na veika au sa cakava ka rogoca na ka au a kaya. 7Ia me tarovi au me'u kakua kina ni vakacerecerei au e na vuku ni veika lagilagi e vuqa au a raica, e a qai soli vei au e dua na mate mosi ka vaka me i talai i Setani me vakararawataki au, ka me tarovi au tiko me'u kakua ni dokadokai au. 8Au masulaka vakatolu na ka oqo vua na Turaga, me kau tani vei au. 9Ia sa qai kaya vei au na Turaga, “Sa rauti iko na noqu loloma; ni sa dau yaco me ka taucoko na noqu kaukauwa e na vanua e tu kina na malumalumu” Sa i koya oqo au na dau boletaka kina e na marau noqu malumalumu me tiko ga kina vei au na kaukauwa i Karisito. 10Sa i koya oqo au marautaka kina na malumalumu, na veivakasewasewani, na veika dredre, na veivakararawataki kei na veika dredre e na vuku i Karisito; ka ni gauna au malumalumu kina au sa na qai kaukauwa. 11Au a yaco me'u vaka na lialia! Ia sa i kemuni ga ko ni vakavuna. Na kena dodonu mo ni tukuni au vakavinaka, ni'u sega ni lolovira mai vei ira na i apositolo lasu ko ya, ia dina ga ni'u sega ni dua na ka. 12Na i vakatakilakila ni apositolo dina au sa vakayacora e na yalovosota e na kemuni maliwa, e na cakacaka mana kei na veika veivakurabuitaki e so. 13A cava na ka ko ni sa lolovira kina mai vei ira na veivavakoso lotu tale e so, ka vaka vo wale ga na noqu sega ni vakaogai kemuni e na dua na ka? Ni vosoti au e na noqu cala! 14Sa i koya oqo na i katolu ni gauna me'u vakarau lako yani kina vei kemuni, ka'u na sega tale ga ni via vakaogai kemuni. Au sega ni vinakata na nomuni lavo, ia au vinakati kemuni ga. E sega ni dodonu me ra maroroi ka na gone me baleti ira nodra i tubutubu, ia e dodonu ga me ra mamaroroi na i tubutubu me baleti ira na luvedra. 15Au taleitaka me'u vakayagataka na veika e tu vei au, ka vakayagataki au tale ga e na vukumuni. Ko ni na lomani au beka vakalailai ke'u lomani kemuni vakalevu? 16Ko ni na vakadinadinataka ni'u sega ni vakaogai kemuni. Ia e so vei kemuni e kaya ni'u veidabui ka coriti kemuni e na veika lasu. 17Au qara li na ka e baleti au mai vei kemuni vei ira au talai ira yani vei kemuni. 18Au vakamasuti Taito me lako yani ka tala vata kaya yani e dua na wekada. Sa la'ki qara beka vei kemuni ko Taito na ka e baleti koya? Sa sega beka ni tauvata na yalo i keirau? Sa sega beka ni tauvata na sala keirau muria? 19Ko ni sa rairai nanuma beka ni keitou tovolea voli ga e na veigauna kece oqo me keitou taqomaki keitou. E sega ni vaka kina. Keitou sa vosa voli e na mata ni Kalou me vaka e vinakata na Karisito. Na veika kece sara tale ga keitou cakava vei kemuni na veiwekani keitou cakava me vukei kemuni. 20Au ririko de'u na yaco yani ki keri au qai kunea ni ko ni sega ni vaka na ka au nanuma ka ko ni na kunei au ni'u sega ni vaka na ka ko ni nanuma. De au na raica beka na veivala, na vuvu, na yalokatakata, na nanumi koya vaka i koya, na veivakasewasewani, vosa veivakacacataki, na viavialevu, kei na kena sega ni tu vakavinaka na veika e so. 21Au ririko de vakamalumalumutaki au na Kalou e matamuni e na gauna au na lako tale yani kina vei kemuni ka'u na qai tagicaki ira na lewe vuqa era sa bale oti ki na ca ka sega ni veivutunitaka na veika dukadukali kei na dauyalewa kei na gagadre ca era cakava tiko.

will be added

X\