2 KORINICA 11

1Au kerea mo ni vosoti au me'u tei vosa tiko mada me vaka na lialia. 2Au sa vuvutaki kemuni me vaka na vuvu vakalou. Au sa soli kemuni vei Karisito me vaka na watina savasava e dua na tagane. 3Ia na ka au leqataka sa i koya na nona a vakacalai Ivi na gata e na nona qaseqase; de na qai vakacalai tale ga na lomamuni mai na kena savasava kei na kena yalodina vei Karisito. 4Ni ko ni sa vakadonuya mo ni ciqoma e na marau na lako mai nei koya sa vunautaka e dua tani tale na Jisu mai na kena keitou a vunautaka. Ko ni sa ciqoma tale ga e dua tani tale na i tukutuku vinaka mai na kena ko ni a sa ciqoma. 5Au nanuma ni'u sega ni lailai sobu vei ira na i apositolo lasu oqori. 6E dina beka ni'u sega so ni matai e na vosa, ia sa tu vei au na vuku. Keitou sa vakamatataka na ka oqo vei kemuni e na veigauna kece ga kei na veisala kece ga. 7Au sega ni bau tukuna vei kemuni mo ni saumi au e na noqu vunautaka na i Tukutuku Vinaka vei kemuni. Au vakalolovirataki au mo ni torocake kina. E i valavala ca li ko ya? 8E na gauna au cakacaka tiko kina vei kemuni era colati au tiko na veivavakoso lewe ni lotu tale e so. E sega ni butako ko ya? 9Ia e na gauna au tiko kina kei kemuni au sega ni bau vakaoga e dua e na gauna au leqa kina, baleta ni ra sa kauta mai vei au na ka kece ga ko ira na wekada era lako mai Masitonia. Sa i koya gona au sa sega ni vakaoga e dua; ka'u na sega tale ga kina ni vakaogai kemuni e na dua na ka. 10Me vaka na dina i Karisito sa tu vei au, au na sega sara kina ni galu ni cibitaka na ka oqo e Kirisi taucoko. 11E na vuku ni cava? Ni'u sega beka ni lomani kemuni? Sa kila na Kalou na noqu lomani kemuni. 12Ia au na cakava tiko ga na ka au cakava tiko oqo, me'u tarovi ira kina na i apositolo tale e so me dua na yavu me ra vakalevulevui ira kina me ra kaya ni sa tautauvata na sala era cakacaka kina vata kei keitou. 13Era sa i apositolo vakailasu ko ira era vakaoqo, era sa tamata dauveivakaisini ka lasutaka ni ra i apositolo i Karisito. 14Sa sega ni ka veivakurabuitaki oqo. Ko Setani sara mada ga e rawa me vukici koya me vaka e dua na agilosi ni rarama. 15Sa sega kina ni ka veivakurabuitaki ke ra vukici ira na nona dauveiqaravi me ra vaka na i talatala ni valavala dodonu. Ia e na gauna mai muri era na taura ga na i sau dodonu ni nodra i valavala. 16Au sa baci kaya tale; me kakua ni dua e nanuma ni'u lialia. Kevaka ko ni nanuma ni vaka kina, mo ni okata mada ga me'u sa lialia ka me'u bau dokadokai au kina vakalailai. 17Ia na ka au tukuna tiko oqo, e sega ni ka e vinakata na Turaga me'u kaya, ia au dokadokai au me vaka na lialia. 18E vuqa na tamata era boletaka na veika vakavuravura, ia sa vaka tale ga kina ko i au. 19Ko ni sa vuku, ia ko ni sa vosoti ira tu na lialia e na marau. 20Ko ni vosota ke dua e vakabobulataki kemuni, se vakadravudravuataki kemuni, se coriti kemuni, se beci kemuni, se sabica na balumuni. 21Au kaya e na noqu madua, keitou rerevaka ni cakava na ka ko ya. Ia ke dua na tamata e via boletaka e dua na ka. Au sa baci vosa me vaka na lialia. Au na boletaka tale ga na ka vata ga ko ya. 22Era sa Iperiu li? Au sa Iperiu tale ga. Era sa luve i Isireli li? Au sa luve i Isireli tale ga. Era sa kawa li nei Eparaama? Au sa kawa tale ga nei Eparaama. 23Era sa i talatala beka li nei Karisito? Au vosa tiko me vaka e dua na lialia, ia au sa uasivi cake vei ira. Au cakacaka vakalevu cake, au biu vakalevu ki vale ni veivesu, au a kanakuita vaka vuqa sara, ka'u voleka ni mate e na vuqa sara na gauna. 24Era a vakanakuitataki au vakalima na Jiu ka tau vaka ya tolusagavulukaciwa. 25Era vakanakuitataki au vakatolu na kai Roma ka bau vakaviriki vakadua e na vatu. Au vosota vakatolu na kasa ni waqa, ka dua na siga ka dua na bogi na noqu ciri voli e na loma ni wasawasa. 26E na vuqa na noqu i lakolako au vakaleqai e na kena waluvu na veiuciwai, au vakaleqai mai vei ira na daubutako, mai vei ira na Jiu kei ira na kai matanitu tani, vakaleqai e na so na koro, e na manumanu kila e so, leqa e wasawasa kei ira na i tokani vakailasu. 27Au cakacaka ka sota kaya na veika dredre; e vuqa na gauna au sega kina ni moce, ka vaka vuqa na noqu via kana, ka viagunu. E vaka vuqa na kena dau sega tu vei au na kakana; vuqa na noqu sota kaya na liliwa kei na luvawale. 28Me kua mada ni wiliki na veika ko ya; e dua na ka sa bikai au e na veisiga sa i koya na noqu lomaleqataka na veisoqosoqo lewe ni lotu kece sara. 29Ke dua sa malumalumu, au sa vakaivotavota tale ga e na nona malumalumu. Ia ni dua sa bale ki na ca, au sa sinai e na rarawa. 30Ke dodonu me'u boletaka e dua na ka, au na boletaka na veika e vakaraitaka na noqu malumalumu. 31Sa kila ni'u sa sega ni lasu na Kalou na tama ni noda Turaga ko Jisu me vakavinavinakataki na yaeana ka sega ni mudu. 32Mai Tamasiko e a via vesuki au kina na kovana nei Arita na tui e yadrava tiko na koro ko Tamasiko. 33Ia au a qai vakatukutukutaki sobu e na dua na sova mai na dua na qara ni bai ni koro ka dro tani yani mai vua.

will be added

X\