2 KORINICA 10

1Au sa vakamamasu yani oqo vei kemuni e na yalomalua kei na yalomalumalumu i Karisito. Ko i au ko Paula o koya ko ni sa kaya, sa dau yalomalua ka yalomalumalumu ni tiko vata kei kemuni, ia sa dau doudou e na gauna sa tiko tani kina mai vei kemuni. 2Au sa vakamasuti kemuni mo ni qarauna me'u kakua ni doudou vakasivia ni'u yaco yani vei kemuni, ni'u sa vakadinata ni sa rawa me'u doudou vei ira era kaya ni keitou sa cakacaka voli e na gagadre vakavuravura. 3E dina ga keitou sa tiko ga e vuravura, ia keitou sa sega ni vala tiko e na dua na i valu vakavuravura. 4Na i yaragi keitou vakayagataka e na vala e sega ni yaragi vakavuravura, ia na i yaragi kaukauwa ni Kalou sa vakarusa na veibasai ni valu. 5Keitou sa vakarusa na veile lasu ka talaraka sobu na veibai cecere ni qaciqacia me voroka na kilai ni Kalou ka vagolea na veivakasama sa vesuki me talairawarawa vei Karisito. 6Ia ni sa ka taucoko na nomuni talairawarawa, keitou sa totogitaka na talaidredre kece ga. 7Ko ni sa raica wale ga na ka e sau. Ke dua sa vakadinata sara ni sa nei Karisito, me kila tale ga ko koya vaka i koya na ka oqo: ko i keitou tale ga keitou sa nei Karisito. 8Ia au sega ni madua kevaka au sa dokadokai au vakalevu e na vuku ni neitou kaukauwa e solia vei keitou na Turaga, mo ni vakatataki cake kina ka sega ni vakarusai. 9Au sega ni vinakata me rairai ni vaka au vakarerei kemuni e na noqu veivola veikemuni. 10E so era na kaya, “Sa rui bibi ka kaukauwa na veivola i Paula, ia ni sa mai tiko sara vei keda sa malumalumu, ka sa sega ni laulau na nona vosa.” 11Na tamata e vaka ko ya na nona vakasama me kila, ni ka keitou kaya e na i vola ni keitou yali e tautauvata ga kei na ka keitou kaya ni keitou tiko kei kemuni, sa i koya tale ga na ka keitou na cakava ni keitou yaco yani vei kemuni. 12E sega ni keitou gadreva me keitou wiliki vata se vakatautauvatataki keitou vata kei ira era dau via tukuni ira vaka i ira. Na tamata era bulia ga na i vakatagedegede me ra vakarautaki rra kina, ka lewa ga vaka i ira na i vakarau me ra lewai kina, era sa tamata lialia. 13Ia ko i keitou, keitou sa sega ni dokadokai keitou me sivia na neitou i yalayala, ia keitou sa cava ga e na i yalayala sa solia vei keitou na Kalou, sa wiliki tale ga kina na cakacaka e na kemuni maliwa. 14Keitou sa sega ni sivia na neitou i yalayala ni keitou sa lako mai vei kemuni; ni sa i keitou sa kauta taumada mai vei kemuni na i Tukutuku Vinaka kei Karisito. 15Ia keitou sa sega ni dokadokataka na cakacaka era sa cakava e so tale e na taudaku ni neitou i yalayala. Ia keitou sa nuitaka ga ni sa tubu cake na nomuni vakabauta, ka vakalevutaka na neitou cakacaka e na kemuni maliwa. 16Ka me keitou na qai la'ki vunautaka na i Tukutuku Vinaka ki na veivanua tani, keitou sa na sega ni qai la'ki dokadokataka na cakacaka sa caka e na nona vanua ni cakacaka e dua tani tale na tamata. 17Ia me vaka sa volai e na i Vola Tabu: “O koya sa vinakata me sakitaki koya, me sakitaki koya e na vuku ni Turaga” 18Ni sa sega ni vinakati ko koya sa tukuni koya vaka i koya, ia ko koya ga sa tukuni koya na Turaga.

will be added

X\