2 KORINICA 1

1Oqo na i vola i Paula na i apositolo i Karisito Jisu e na lewa ni Kalou kei Timoci na wekada. Ki vei ira na i soqosoqo lewe ni lotu mai Korinica kei ira tale ga na tamata ni Kalou mai Akaia taucoko. 2Me nomuni na loloma kei na vakacegu mai vua na Kalou ko Tamada kei na Turaga ko Jisu Karisito. 3Me vakavinavinakataki na Kalou na Tama ni noda Turaga ko Jisu Karisito, o koya na Tama dauloloma, na Kalou sa sega ni mudu rawa na nona veivakacegui. 4Sa vakacegui keda ko koya e na noda rarawa kece ga, ka sa rawa kina vei keda me da vakacegui ira era sota kaya na veimataqali leqa kece ga, e na veivakacegui ga e da sa rawata mai vua na Kalou. 5Me vaka ga na noda vakaivotavota e na rarawa i Karisito. 6Ia kevaka keitou sa vakararawataki, sa ka mo ni vakacegui ka vakabulai kina. Kevaka keitou sa vakacegui, sa ka mo ni vakacegui kina e na nomuni vosota tale ga na veika rarawa vata ga keitou a vakararawataki kina. 7Sa tudei na neitou vakanuinui me baleti kemuni, ni keitou sa kila ni ko ni sa vakaivotavota tiko e na vakararawataki, ko ni na vakaivotavota tale ga e na neitou vakacegu. 8Ni keitou sa vinakata mo ni kila na veiwekani na veivakararawataki keitou a sota kaya mai Esia. Sa bibi ka dredre sara vei keitou ka keitou sa sega tale ni nuitaka na bula. 9E vaka sa lewai me keitou mate, me keitou kakua kina ni vakararavi ga vei keitou ia me keitou vakararavi ga vua na Kalou o koya sa vakaturi ira cake tale na mate. 10Sa i koya e a vakabulai keitou tiko ga. Keitou sa vakanuinui tu vua ni na vakabulai keitou tale, 11me vaka ko ni vukei keitou tale ga e na nomuni masu. Sa na qai lewe levu kina era vakavinavinaka vua na Kalou e na vuku ni veivakalougatataki ni Kalou vei keitou. 12Ni sa i koya oqo na ka keitou cibitaka: Sa vakadinadinataka na neitou lewa e loma na neitou i valavala e vuravura oqo ka vakauasivi vei kemuni, ni sa caka e na yalododonu kei na yalodina vua na Kalou. Ia sa sega ni rawa oqo e na vuku vakatamata, sa rawa ga e na loloma soli wale ni Kalou. 13Ni sa sega ni dua na ka tani keitou vola yani vei kemuni, ia na ka ga e rawa ni ko ni wilika ka kila. Au nuitaka ni ko ni na kila vinaka sara, 14na ka ko ni sa kila tu oqo vakatikina ga, ni na rawa mo ni cibitaki keitou me vaka na neitou na cibitaki kemuni e na Siga e na lesu tale mai kina na Turaga ko Jisu. 15E na noqu vakadinata sara na ka oqo, au a lokuca taumada kina me'u lako yani vei kemuni, me vakaruataki kina vei kemuni na veivakalougatataki. 16Ni'u a nakita me'u sikovi kemuni tale ga e na noqu lako ki Masitonia, kei na noqu lesu tale mai kina ka mo ni na qai vukei au me'u lako sara yani ki Jutia. 17Au a lomaloma rua li e na noqu vakotora na noqu i loku? Se au a vakotora na noqu i loku me vaka e dua na tamata vakavuravura, sa rawarawa vua me kaya, “Io, io” ka “Sega, sega” e na duavata tiko ga na gauna? 18Me vaka ga na nona yalodina na Kalou sa sega kina ni “Io”, ka “Sega”, na neitou vosa vei kemuni. 19Ni sa sega ni “Io”, se “Sega” ko Jisu Karisito na Luve ni Kalou o koya keitou sa vunautaka vei kemuni o i keitou ko Sailasa, Timoci vata kei au. Sa i koya na nona “Io” na Kalou, 20ki na nona veivosa ni yalayala kece ga. Sa i koya oqo e da sa kaya kina na Emeni e na vukuna me vakalagilagia na Kalou. 21Ni sa i koya ga na Kalou sa vakataudeitaki keitou vata kei kemuni vei Karisito ka sa lesi keda. 22Sa i koya tale ga na Kalou sa vakatakilakilataki keda me da nona, ka solia mai na Yalona ki na lomada me i vakadei ni veika kece e na solia vei keda. 23Ia au sa kaciva na Kalou me noqu i vakadinadina, oya ni'u a lomani kemuni wale ga, au sega ni lako yani kina ki Korinica. 24Ni kua ni nanuma ni keitou sa vialewa tiko ga yani na nomuni vakabauta, ka ni ko ni sa tudei tu e na nomuni vakabauta. Ia keitou via veivuke ga vei kemuni e na ka mo ni reki kina.

will be added

X\