1 TIMOCI 6

1Ko ira kece era tiko vakabobula e dodonu me ra vakarokorokotaki ira na nodra turaga, me kakua ni vosa vakacacataki kina na yaca ni Kalou kei na i vakavuvuli va-Karisito. 2Ke ra sa lotu na nodra turaga me ra kakua ni ra beci ira ko ira na nodra bobula, baleta ni ra okati me ra tacina e na vuku i Karisito; ia sa dodonu me ra qaravi ira vakavinaka cake baleta ni ko ira e nodra na vinaka ni nodra cakacaka era sa tamata lotu va-Karisito era lomani ira. Oqo na ka mo dau vakatavuvulitaka ka vunautaka. 3Ke dua e vakatavuvulitaka e dua na i vakavuvuli tani ka sega ni muria na i vakavuvuli vinaka ni Turaga ko Jisu Karisito kei na i vakavuvuli vinaka dina vakalotu, 4sa sinai e na qaciqacia ka sega ni kila e dua na ka. Sa tamata tauvi mate vakayalo ko koya ka vinakata wale ga na veileti kei na veibataka na vosa sa tubu kina na vuvu, veivala, dauvakaucaca, na nanuma ca, 5kei na nodra veileti tawa yaga na tamata loma ca ka sega ni kila na ka dina. Era nanuma ni lotu sa sala me da vutuniyau kina. 6Io e dina sa sala ni vutuniyau na lotu, ia vua ga na tamata sa mamau na yalona e na ka sa soli vua. 7Sa sega sara ni dua na ka eda kauta mai ki vuravura ka sega tale ga na ka eda na kauta tani rawa. 8Kevaka e tu wale ga vei keda na i sulu kei na kakana sa rauti keda ko ya. 9Ko ira era gadreva me ra vutuniyau era sa bale e na veitemaki ka tacori e na gagadre ca ka lialia e vuqa sa kuitaki ira na tamata ki na leqa kei na rusa. 10Na dau lomana na i lavo sa i koya na vu ni ka ca kecega.^ ia e so era sa gole tani mai kina mai na vakabauta ka voroka vaka i ira na yalodra e na yaluma. 11Ia ko iko e dua na tamata ni Kalou, mo tarovi iko mai na veika kece sara oqo, mo vakasaqara na ka dodonu, na i tovo vakalotu na yalodina, na loloma, na vosota vakadede kei na yalomalua. 12Mo vala e na i valu vinaka ni vakabauta, ka taura ni cocovi, oya, na bula tawa mudu. Sa kacivi iko na Kalou e na ka oqo e na gauna ko sa vakatusa kina na nomu vakabauta ki na matadra e vuqa na i vakadinadina. 13Au sa vakaroti e na mata ni Kalou o koya sa solia na bula ki na ka kece ga kei na mata i Jisu Karisito o koya sa vakatusa na vakabauta e na mata i Ponitio Pailato. 14Mo muria na i vakaro ka maroroya me savasava ka tawa dukadukali me yacova na siga e na lesu tale mai kina ko Jisu Karisito. 15Na rairai ko ya e na vakayacora na Kalou e na nona gauna ga sa lokuca, ko koya na vu ni veivakalougatataki duadua ga, ka cecere duadua ga. Sa i koya na nodra Tui na tui ka nodra Turaga na turaga. 16Sa i koya taudua ga sa tu vua na bula tawa mudu ka tiko e na rarama e sega ni torovi rawa. Sa sega na tamata e bau raici koya oti se me na raici koya rawa. Me ia vua na vakarokoroko kei na kaukauwa tawa mudu! Emeni. 17Vunauci ira era sa vutuniyau e na veika ni vuravura oqo me ra kakua ni qaciqacia se vakararavi ki na i yau sa sega ni tudei, ia me ra vakararavi ga vua na Kalou o koya sa solia wale ga vakayauyau na veika kece ga vei keda me da marau kina. 18Tukuna vei ira me ra caka vinaka, me ra vutuniyau e na cakacaka vinaka me ra lomasoli ka yalo vinaka ka vakarau tu me ra vota vei ira na tani na ka e tu vei ira, 19e na sala oqo era na maroroya kina na i yau ka sa i koya na yavu e na tudei e na gauna mai muri ka ra na rawata tale ga na bula, sa i koya na bula dina. 20Timoci, qarauna vinaka na ka ko sa nuitaki kina. Gole tani mai na veivosaki macawa ka tawa yaga kei na i vakavuvuli tani sa vakatokai vakailasu me vuku. 21E so era kaya ni tu vei ira na ka oqo ka ra sa gole tani kina mai na vakabauta. Me nomuni kece ga na loloma soli wale ni Kalou.

will be added

X\