1 TIMOCI 5

1Kakua ni vosataka vakaukauwa e dua na qase ia mo vosa ga vakamalua vua me vaka vua na tamamu. Okati ira na cauravou me vaka era tacimu, 2kei ira na yalewa qase me vaka era tinamu kei ira na gone yalewa me vaka era ganemu e na yalo savasava sara. 3Vakaraici ira vinaka na yalewa era sa yada dina. 4Ia ke dua na yada e sa vakaluveni se so na makubuna, e dodonu me ra vulica mada e liu na luvena kei na makubuna me ra cakava na nodra i tavi vakalotu ki na nodra vuvale ka sauma lesu na nodra dinau vei ira era susugi ira. Ni sa ka vinaka vua na Kalou. 5Na yalewa e yada dina sa i koya sa tiko taudua voli ga ka sa sega e qaravi koya. Sa vakanuinui ga vua na Kalou ka vakayagataka na nona gauna kece, na siga kei na bogi e na masu kei na kere veivuke. 6Ia na yada sa dau guta na marau sa mate ga ni sa bula voli. 7Dau vakarota na veika oqo me ra kua ni vakalewai kina na yada. 8Ia ke dua e sega ni qaravi ira na wekana, vakauasivi vei ira na nona lewe ni vuvale, sa cakitaka na vakabauta ka sa ca vakalevu cake mai vua e dua ka sega ni vakabauta. 9Me kakua ni volai e na kedra i vola na yada e dua na yada e sa bera ni yacova na yabaki onosagavulu. E dodonu me yalodina ka me a sa vakawati ga vakadua; 10me rogo e na nona cakacaka vinaka me vaka e dua na yalewa sa susugi ira vakavinaka na luvena, me dau dolava na nona vale vei ira na vulagi, savata na yavadra na tamata ni Kalou, vukei ira na leqa ka soli koya ki na vei cakacaka vinaka kece ga. 11Kakua ni vakacuruma na yacadra na yada gone ki na i vola. E baleta ni gauna e na gole tani kina na lomadra mai vei Karisito, era na via vakawati tale; 12ia era na qai vakalewai e na vuku ni nodra voroka na nodra vosa ni yalayala taumada. 13Era na dauveilakoyaki tale ga ki na veivale ka yaco kina me ra vucesa; sega ni vucesa wale ga, era na dauvakaucaca, dauvakavuca ka vosataka na veika tawa kilikili. 14E vinaka cake vei au me ra vakawati na yada gone, me ra vakaluveni ka qarava na nodra vuvale, me kakua ni solia kina vua na meca e dua na gauna me vosa vakaeacataki keda kina. 15E so na yada era sa vuki tani oti ka muri Setani. 16Ia ke so na yalewa vakabauta e tiko e so na wekana yada e na nona vuvale e dodonu me qaravi ira ga ko koya. Me kakua ni vakacolata kina na lotu, ka me rawa ni qaravi ira kina era sa yada dina. 17Ko ira na qase era qarava vinaka na nodra cakacaka e yaga ni vakasamataki me vakaruataki na nodra i votavota vakauasivi ko ira era cakacaka vakaukauwa e na vunau kei na veivakatavulici. 18Ni sa kaya na i Vola Tabu, “Mo kakua ni vesuka na gusu ni bulumakau ni butu raisi tiko” sa dodonu vaka kina me “Soli vua na tamata cakacaka na kena i sau dodonu.” 19Kakua ni vakadinata na ka e beitaki kina e dua na qase ni lotu vakavo ga ke sa rua se tolu na kena i vakadinadina e ratou sa tiko. 20Vunauci ira era cala e na matadra na tamata me ra rere kina na kena vo. 21Au sa vakaroti iko oqo e na mata ni Kalou kei Jisu Karisito kei ira na agilosi digitaki mo muria na veivakaro oqo, me dodonu na nomu lewa ka kakua ni veitotaki. 22Kakua ni vakusakusataka na nona tabaki e dua me la'ki veiqaravi kina e na cakacaka ni Turaga se vakaitavi e na nona ca e dua na tamata; mo maroroi iko mo savasava. 23Kakua ni gunu wai dranu tiko ga; gunuva vakalailai na waini me baleta na ketemu kei na veimate sa dau tauvi iko vakawasoma. 24Sa kune votu na nodra i valavala ca e so na tamata ka sa kauti ira ki na veilewai, ia na nodra i valavala ca e so e na qai kune vakamalua e muri. 25Sa vaka tale ga kina na kena kune votu na cakacaka vinaka; ia kevaka sara mada ga e sega, e na sega ni rawa ni vunitaki me tawa mudu.

will be added

X\