1 TIMOCI 4

1Sa tukuna vakamatata sara na Yalo Tabu ni ra na vuki tani e so e na gauna mai muri mai na vakabauta ka goleva na yalo dauveivakacalai e so kei na veivakavuvuli e taka mai vei ira na tevoro. 2Oqo e vu mai na nodra dauveivakaisini na tamata lasulasu ka sa mate na nodra lewa e loma me vaka e vakamai e na kaukamea katakata. 3Era sa vakatavuvulitaka ni eala na vakawati ka vakatabuya me laukana na kakana e so sa cakava na Kalou me ra vakayagataka e na masu ni vakavinavinaka ko ira era vakabauta ka kila na ka dina. 4Ni sa vinaka na veika kece ga sa bulia na Kalou ka sega na ka me beci ia sa dodonu ga me vakayagataki e na masu ni vakavinavinaka, 5ni sa vakatabui e na vosa ni Kalou kei na masu. 6Kevaka ko solia na veivakaro oqo vei ira na veiwekani ko na qai dauveiqaravi vinaka i Jisu Karisito, ka tubu cake e na vosa ni vakabauta kei na i vakavuvuli vinaka ko sa dau muria. 7Ia kakua ni goleva na veitalanoa tawa vakalotu sa sega ni ganita me talanoataki tiko. Vakarautaki iko mo rawata na lotu dina. 8Sa yaga vakatikina ga na vakaukauwataki ni yago; ia na vakaukauwataki ni yalo sa yaga e na ka keee ga, sa yaga e na veika ni bula oqo kei na bula tale ga sa bera mai. 9Sa dina na vosa ko ya ka sa dodonu me vakadinati. 10Sa i koya oqo keitou sa cakacaka kina ka vosota na veivakalialiai ni keitou sa laiva na neitou vakanuinui vua na Kalou bula, na i vakabula ni tamata kece ga, ka vakauasivi ko ira era vakabauta. 11Na veika oqo mo vakarota ka vakatavuvulitaka. 12Me kakua ni dua me beci iko baleta wale ga ni ko sa cauravou tiko, ia mo yaco mo i vakarau vei ira era sa vakabauta e na nomu vosa, e na nomu i tovo, e na loloma, e na vakabauta kei na yalo savasava. 13Mo gumatua e na wilika na i Vola Tabu vei ira na lewe vuqa, e na vunau kei na veivakavulici me yacova na noqu lako yani. 14Kakua ni weletaka na i solisoli sa tu vei iko, na veika e a soli vei iko e na parofisai kei na veitabaki ni ligadra na qase. 15Dau vakayacora na veika oqo ka soli iko kina ka me ra raica kece kina na nomu tubu cake. 16Qarauni iko vinaka kei na nomu i vakavuvuli. Cakava tiko ga na veika oqo, ni ko sa cakava vakavinaka ko sa vakabulai iko kei ira tale ga era rogoci iko.

will be added

X\