1 TIMOCI 3

1Sa dina na i vosavosa oqo: O koya sa gadreva me veiliutaki e na lotu sa gadreva me cakava na cakacaka vinaka. 2Na i liuliu ni lotu me kakua ni vakamelei rawa e na dua na ka. Me dua ga na watina, me yalomalumalumu, me yalomatua, me i tovo vinaka, me dauvakacegui ira na tamata e na nona vale, yalo vinaka ka makutu ni veivakavulici. 3Me kua ni dau mateni se i tovo kaukauwa, ia me yalo malua, ka yalomalumalumu, kakua ni dau kocova na i lavo. 4Me rawa ni lewa vakavinaka na nona vuvale ka me tuberi ira na luvena me ra rogoca na nona vosa e na vakarokoroko. 5Kevaka e dua na tamata e sega ni rawa ni lewa vinaka na nona vuvale e na rawa vakacava me na vakaraica vinaka e dua na i vavakoso tamata ni Kalou. 6Me kakua ni dua e se qai veisau vou wale ga me lotu, ka ni na rawa ni yaco kina me viavialevu ka me na qai cudruvi me vaka ka a cudruvi na tevoro. 7E dodonu me tamata rogo vinaka tale ga vei ira e na taudaku ni lotu me kakua kina ni bale se coko e na dai na tevoro. 8Ko ira tale ga na tuirara sa dodonu me ra tamata i tovo vinaka ka yalodina. Me ra kua ni dau veivosavosayaki, ka kakua ni daumateni vakalevu, ka kakua ni dau kocokoco. 9Ia me ra taura matua na dina titobu ni noda vakabauta e na yalomatua. 10E dodonu me ra vakatovolei mada e liu, ia ke sega na ka era beitaki rawa kina me qai vakatarai me ra cakacaka vakatuirara. 11Na watidra tale ga e dodonu me ra i tovo vinaka na nodra i vakarau; ka me ra kakua ni daukakase, ia me ra yalomalumalumu ga ka yalodina e na ka kece ga. 12Na tuirara yadua me dua ga na watina, ka lewai ira vinaka na luvena kei na nona vuvale. 13Ko ira era qarava na cakacaka vakatuirara e na yalodina era rawata ga vakataki ira me ra toso cake ka na dua na vanua vinaka, ka dodonu me ra rogoci ni ra tukuna na veika baleta na noda vakabauti Karisito Jisu. 14Au nuitaka ni na sega soti ni dede au sa na lako yani vei iko, 15ia au sa vola yani na ka oqo de'u na mani bera yani, me rawa ni ko kila kina na ka e dodonu me ra vakaitovotaki ira kina na tamata e na vuvale ni Kalou. Sa i koya na i soqosoqo lewe ni lotu ni Kalou bula, na duru kei na bai ni vakavuvuli dina. 16Sa levu ka sega ni veiletitaki rawa na ka vuni ni noda lotu:O koya sa vakaraitaki koya e na yago vakatamata, sa vakadinadinataka e na Yalo Tabu, ka laurai mai vei ira na agilosi. Sa vunautaki ko koya vei ira na veimatanitu, ka sa vakabauti e vuravura taucoko, ia sa qai kau cake e na lagilagi ki lomalagi.

will be added

X\