1 TIMOCI 2

1Ia na i matai ni ka au kerea sa i koya me caka na masumasu, na masu ni kerekere, na veimasulaki baleti ira na tani kei na vakavinavinaka vua na Kalou e na vukudra na tamata kece ga; 2me ra masulaki na tui kei ira na veiliutaki me da tiko vinaka kina ka tiko veisaututaki, e na veitovo kece vakalou ka kilikili. 3Sa ka vinaka oqo ka vinaka vua na Kalou na noda i Vakabula, 4o koya sa gadreva me ra vakabulai na tamata kece ga, ka me ra kila na ka dina. 5Sa dua bauga na Kalou; ka dua bau tale ga na dauveivakaduavatataki e na kedrau maliwa na Kalou kei na tamata, sa i koya ko Karisito Jisu. 6Sa soli koya vaka i koya me sereki ira na tamata kece ga. Ia sa vakadinadinataka e na gauna sa lokuci na i naki ni veivakabulai ni Kalou. 7Au sa digitaki me'u i apositolo ka qasenivuli me'u vakatavulici ira na lewe ni veimatanitu tani e na vakabauta kei na dina. Au sa tukuna na ka dina ka sega ni lasu. 8Ia e na veivanua kece ga ko ni soqo kina mo ni so-kalou, au vinakata me ra masu na tagane era sa yalodina vua na Kalou ka sa rawa me ra laveta cake na ligadra ni sa sega vei ira na cudru kei na vakatitiqa. 9Me ra vakaisulutaki ira vakavinaka e na i sulu matau ka rakorako na yalewa. Me kakua ni tali na drau ni uludra se tokara na i ukuuku koula, mataniciva se i sulu i sau dredre. 10Me ra vakaitovotaki ira e na veitovo vinaka kece ga me vaka sa kilikili kei ira na yalewa era kaya ni ra sa lotu. 11Me ra vakarorogo na yalewa, e na yalomalumalumu ni ra sa vakatavulici. 12Au sa sega ni vakatara, na yalewa me i vakavuvuli se ma lewa na tagane ia me tiko lo ga, 13ni a buli e liu ko Atama ka qai muri ko Ivi. 14E a sega tale ga ni temaki ko Atama, na yalewa ga, ka mani i valavala ca kina. 15Ia era na vakabulai na yalewa e na gauna ni nodra vakasucu kevaka era tu dei tiko ga e na vakabauta, e na loloma, e na yalosavasava kei na yalomalumalumu.

will be added

X\