1 TIMOCI 1

1Oqo na i vola i Paula na i apositolo i Karisito Jisu e na lewa ni Kalou na noda i vakabula kei Karisito Jisu o koya na noda i nuinui. 2Ki vei Timoci na luvequ dina e na vakabauta. Me solia vei iko na Kalou na Tamada kei Karisito Jisu na noda Turaga, na loloma na yalo loloma kei na vakacegu. 3Au vinakata mo tiko ga e Efeso me vaka au a kerea mo vakayacora e na gauna au a lako tiko kina ki Masitonia. Au vinakata mo vakarota vei ira na tamata e so me ra kakua ni vakatavuvulitaka na i vakavuvuli lasu, 4ka kakua ni vakaogai ira e na vulica na i tukuni e so kei na i vola ni kawa bababalavu e vuqa. Na veika oqo sa vakavuna na veileti ia sa sega ni vakayacori kina na i naki na Kalou sa kilai e na vakabauta. 5Na i naki ni vakaro oqo sa i koya me vakatubura na loloma sa vu dina mai e na yalosavasava, e na lewa e loma vinaka kei na vakabauta dina. 6E so era sa gole tani mai na veika oqo ka ra goleva na veivosaki wale. 7Era sa gadreva me ra dauvakatavuvulitaka na lawa ni Kalou ia era sa sega mada ga ni kila na ka era vosataka se na veika era sa vosa doudou kina. 8E da sa kila ni sa ka vinaka na lawa ke sa muri vakavinaka, 9ni da sa kila sa sega ni buli na lawa me baleti ira na tamata vinaka, ia me baleti ira ga sa sega ni dau muria na lawa kei ira na dau i tovo ca, na tawa lotu, na i valavala ca, na tawa savasava, na dukadukali; sa baleti ira tale ga era vakamatea na tamadra se na tinadra, ko ira na daulaba, 10ko ira na dauveibutakoci, ko ira na dauveimoceri vakatagane se vakayalewa, ko ira na daubutako tamata, ko ira na lasulasu, ko ira na daububului vakailasu kei ira era dau cakava na veika sa veisaqasaqa kei na i vakavuvuli dina. 11Na i vakavuvuli sa salavata kei na i Tukutuku Vinaka lagilagi ni Kalou cecere sa soli vei au me'u vunautaka. 12Au vakavinavinaka vei Karisito Jisu ko koya sa solia vei au na kaukauwa me baleta na cakacaka oqo, ni sa i koya sa nanuma ni'u sa yalodina ka digitaki au kina ki na cakacaka oqo, 13veitalia ga na noqu a vakasewasewani koya ka vakararawataki koya ka tamata viavialevu vua. Ia sa yalo loloma vei au baleta ni'u sa dua vei ira na sega ni vakabauti e na gauna ko ya, ia au a cakacaka tu e na lecaika. 14Ia sa sovaraka vei au na Turaga na nona loloma soliwale ka solia vei au na vakabauta sa noda e na noda duavata kei Karisito Jisu. 15Sa lako mai ki vuravura ko Karisito Jisu me vakabulai ira na i valavala ca. Sa dina na vosa ko ya ka sa yago me da vakabauta ka kakua tale ni vakatitiqataka, ni ko i au sara mada ga na tamata i valavala ca levu duadua. 16Ia na vuna sa vakaraitaka kina vei au ko Karisito Jisu na nona loloma tawa yalani sa i koya ni sa gadreva me'u i vakaraitaki, me'u i dusidusi vei ira era via lako mai me ra vakabauti koya ni sa sala ki na bula tawa mudu. 17la me ia vua na Tui ni veitaba gauna kece ga, sa sega ni mate rawa, ka sega ni laurai, na Kalou e dua bauga na vakarokoroko kei na veivakalagilagi ka sega ni mudu. Emeni. 18Timoci, na luvequ, e so na vosa ni parofisai e a tukuni makawa me baleti iko ka vakavuna me'u vakataqara kina vei iko na i tavi oqo. Mo yalodina ki na veivosa ni parofisai ko ya ka vala e na i valu vinaka, 19e na vakabauta kei na lewa e loma vinaka. E so era sa biuta tani na ka oqo ka sa voca kina na nodra vakabauta. 20E rau sa vaka kina ko Imeneo kei Alekisada, ko i rau au sa soli rau vei Setani. Sa yaga me rau vakavulici me rau kua kina ni vosa vakacacataka na Kalou.

will be added

X\