1 CESALONAIKA 5

1Kemuni na veiwekani e sega ni yaga me'u vola yani vei kemuni na veigauna kei na veisiga e na vakayacori kina na veika oqo. 2Ni ko ni sa kila vinaka tu ni na lako mai na Siga ni Turaga me vaka e dua na daubutako e na bogi. 3E na gauna era na kaya kina na tamata, “Eda sa qai vakacegu ka tiko vinaka” e na qai yaco vakidacala vei ira na rusa me vaka na kena yaco na mosi ni kete vua e dua na yalewa bukete sa taratara, ka na sega ni dua e dro tani rawa kina. 4Ia ko i kemuni na veiwekani ko ni sega ni tiko e na butobuto me yaco yani kina vakidacala vei kemuni na siga koya me vaka na daubutako. 5Ni ko ni sa gone kece ga ni rarama, ka gone ni siga. Eda sa sega ni gone ni bogi sa butobuto. 6Me da sa kakua gona kina ni moce tiko me vakataki ira na tani; ia me da yadra tiko ga ka yalo matua. 7Ni ko ira era moce era dau moce e na bogi kei ira era mateni era dau mateni e na bogi. 8Ia ko i keda na gone ni siga me da yalo matua ko tokara na vakabauta kei na loloma me i sasabai ni lomasereda kei na noda nuitaka na veivakabulai me i vakaruru ni uluda. 9Ni a sega ni lesi keda na Kalou me da rusa, ia me da taukena ga na veivakabulai e na vuku i Jisu Karisito na noda Turaga. 10Sa i koya ka a mate e na vukuda me rawa ni da na bula vata kaya e na gauna sa na lesu tale mai kina, se da bula tiko se da sa mate e na gauna koya. 11O koya gona mo ni veivakacegui ka veivakatataki cake kina vaka i kemuni me vaka ko ni sa cakava tiko. 12Ia keitou vakamasuti kemuni na veiwekani mo ni dokai ira era cakacaka tiko e na kemuni maliwa, ko ira sa digitaki ira na Turaga me ra liutaki kemuni ka dau vakatavulici kemuni. 13Mo ni vakarokorokotaki ira sara ka lomani ira e na vuku ni cakacaka era sa kitaka tiko. Mo ni veilomani tiko vaka i kemuni. 14Keitou vakamasuti kemuni na veiwekani, mo ni vunauci ira na vucesa, vakayaloqaqataki ira era yalo lailai, vukei ira era malumalumu ka dau vosoti ira na tamata kece ga. 15Raica me kua ni dua me veisausaumitaka na ca vua e dua, ia mo ni qara na caka vinaka vei kemuni vaka i kemuni kei ira na tamata kece ga. 16Ni reki tiko ga. 17Ni masu tiko ga me kakua ni mudu. 18Ni vakavinavinaka e na vuku ni veika kece ga e na veigauna kece ga, ni sa i koya oqo na loma ni Kalou vei kemuni e na vuku i Karisito Jisu. 19Ni kakua ni tarova na cakacaka ni Yalo Tabu; 20ni kakua ni beca na nona i tukutuku mai vei ira na parofita. 21Ia ni vakatovolea na ka kece ga e tukuni; taura matua na ka e vinaka; 22ka tarovi kemuni mai na ka kece ga e ca. 23Me vakasavasavataki kemuni sara na Kalou dau veivakacegui, ka me sa maroroya taucoko, me kakua sara ni cala, na yalomuni, kei na lomamuni kei na yagomuni me yacova na siga e na lako tale mai kina na Turaga ko Jisu Karisito. 24Sa yalo dina ko koya sa kacivi kemuni ka na cakava tale ga na ka oqo. 25Kemuni na veiwekani, ni dau masulaki keitou tale ga. 26Ni kidavaki ira na veiwekani kece ga e na i regu savasava. 27Au sa vakarota vei kemuni, e na yaca ni Turaga, me wili na i vola oqo vei ira kece na veiwekani. 28Me tiko vata ga kei kemuni na loloma ni noda Turaga ko Jisu Karisito.

will be added

X\