1 CESALONAIKA 4

1Keitou a sa vakaraitaka vei kemuni na veiwekani na i tovo ni bula sa vinaka vua na Kalou; sa dina ko ni sa vakayacora tiko, ia keitou kerea ka vakamasuti kemuni mo ni vakayacora vakavinaka cake sara. 2Me vaka ni ko ni sa kila tu na veivakaro keitou a vakarota vei kemuni e na vuku ni Turaga ko Jisu, 3ka ni vinakata na Kalou mo ni savasava vakayalo; ka mo ni kakua ni dau veibutakoci. 4Na tagane yadua me kila na sala savasava ka dokai me taura kina na yalewa me watina. 5Me kakua e na garogaro ca me vakataki ira na tawa lotu, era sega ni kila na Kalou. 6E na vuku ni ka oqo me kakua ni dua na tagane me caka cala kina se via la'ki siova na ka e nona na wekana, ni sa dau veivakatotogitaki na Turaga e na veika oqo. Keitou a sa tukuna oti na ka oqo ka vakaroti kemuni kina vakabibi e liu. 7Ni sa sega ni kacivi keda na Kalou me da vakayacora na veivalavala dukadukali, ia me da yalo savasava ga. 8O koya gona, na tamata yadua e sega ni via muria na i vakavuvuli oqo e sega ni cata na tamata, ia sa cata ga na Kalou, na Kalou ka a solia vei kemuni na Yalona Tabu. 9Ia e na vuku ni veilomani vakaveitacini e sega soti ni yaga me'u volavola yani kina vei kemuni, ni a sa vakavulici kemuni oti na Kalou mo ni veilomalomani. 10Ko ni sa lomani ira sara tiko ga vaka kina na veiwekani kece mai Masitonia taucoko. Ia keitou vakamasuti kemuni na veiwekani mo ni gumatuataka cake sara. 11Me nomuni i naki dei mo ni tiko vinaka kei ira na tani, mo ni dui qarava ga na ka e nomuni yadua ka cakacaka e na ligamuni mo ni rawata kina na nomuni bula me vaka keitou a vakarota vei kemuni. 12E na sala oqo era na vakarokorokotaki kemuni kina na tawa lotu, ka ko ni na sega tale ga ni vakararavi kina vua e dua tale na tamata me baleta na veika mo ni bula kina. 13Ia keitou sega ni vinakata mo ni lecava na veiwekani na ka e baleti ira era sa mate, mo ni kua kina ni yalo bibi me vakataki ira na tani ka sega tu na nodra i nuinui. 14Ia me vaka ga eda sa vakabauta ni a mate ko Jisu ka tu cake tale mai na mate, e na vaka tale ga kina ko ira era sa mate ka ra sa vakabauti Karisito tu; e na kauti ira vata mai kei Jisu na Kalou. 15Keitou sa tukuna vei kemuni na ka oqo me vaka na vosa ni Turaga, oya ni da na sega ni liu vei ira era sa mate ko i keda eda sa bula tiko e na gauna e na lako tale mai kina na Turaga. 16E na kacivaki taumada e dua na i vakaro, ka tarava na domo ni agilosi liu, sa na qai rogo mai na davui ni Kalou, ka sa na qai lako sobu mai lomalagi na Turaga. Era na qai tu cake taumada ko ira na mate era vakabauti Karisito; 17eda na qai kau vata yani kei ira e na o, ko i keda na bula ka da sa vo tiko, me da veitavaki kei na Turaga e na maliwa lala. Eda na qai tiko vata vaka kina kei na Turaga ka sega ni mudu. 18O koya gona mo ni qai veivakacegui vaka i kemuni e na veivosa oqo.

will be added

X\