1 CESALONAIKA 3

1Ia ni keitou sa sega ni vosota rawa na neitou via raiei kemuni, keitou sa mani nakita kina me keirau sa tiko ga mai Aceni, 2ka talai Timoci yani na wekada, na i talai ni Kalou ka neirau i tokani e na kena vakatetei na i Tukutuku Vinaka kei Karisito. Keirau talai koya yani me la'ki vakayaloqaqataki kemuni mo ni tu dei e na nomuni vakabauta, 3me kakua kina ni saumaki lesu e dua vei kemuni e na vuku ni veivakararawataki sa yaco tiko vei kemuni. Ko ni sa kila tiko vaka i kemuni ni sa yaco na veivakararawataki vaka oqori me vaka na lewa ni Kalou e na vukuda. 4Keitou a sa tukuna rawa tiko vei kemuni ni keitou a sa tiko kei kemuni ni da na vakararawataki; ia me vaka ko ni sa kila a mani yaco dina me vaka kina. 5Koya gona na vuna, ni'u sa sega tale ni vosota rawa tiko, au sa talai Timoci yani kina. Au talai koya yani me rawa ni'u mai kila na i tuvaki ni nomuni vakabauta ka ni'u taqayataka de lakolako ka veretaki kemuni ko koya na Daunivere, ka sa na qai mate wale ga kina na neitou cakacaka. 6Ia sa lesu tale mai oqo ko Timoci ka sa lako vata mai kei na i tukutuku rogorogo vinaka ni nomuni vakabauta kei na nomuni loloma. Sa mai tukuna vei keitou na nomuni dau nanumi keitou tu ga kei na nomuni gadreva tiko mo ni raici keitou, me vaka sara tale ga na levu ni neitou gadreva me keitou raici kemuni. 7E na vuku gona ni ka oqo kemuni na veiwekani, keitou sa vakacegui kina mai na neitou leqa kei na rarawa kece ga. Sa vakacegui keitou na nomuni vakabauta. 8Ia sa na qai talei cake sara vei keitou na bula kevaka ko ni sa tu dei tiko vua na Turaga. 9A cava me keitou kaya rawa me vakaraitaka vakavinaka na levu ni neitou vakavinavinaka vua na Kalou me baleti kemuni, kei na levu ni reki sa mai yaco vei keitou e na vukumuni, e na neitou tu oqo e na mata ni noda Kalou? 10Keitou sa masulaka sara vagumatua e na siga kei na bogi me da na veirai mata sara ka me keitou na vakatavulica vei kemuni na veika era sa vo tiko e na nomuni vakabauta. 11Me tuberi keitou mada ga na Kalou na Tamada kei na noda Turaga ko Jisu me keitou lako yani vei kemuni; 12ka me vukei kemuni mada ga na Turaga me tubu cake ka vuabale na nomuni veilomani vaka i kemuni kei na nomuni loloma vei ira na tamata kece ga, me vaka na neitou loloma vei kemuni! 13Me vakataudeitaka kina ko koya na lomamuni me tawa cala ka savasava e na mata ni Kalou ko Tamada e na gauna e na lako tale mai kina na noda Turaga ko Jisu Karisito kei ira kece na nona tamata yalo savasava.

will be added

X\