1 CESALONAIKA 2

1Kemuni na veiwekani, ko ni kila vinaka vakai kemuni ni a sega ni maumau wale na neitou a la'ki tiko e na kemuni maliwa. 2Ko ni sa kila na neitou a vakararawataki ka vakamaduataki sara mai Filipai, ni sa bera ni keitou yaco yani vei kemuni. E dina ga ni a levu sara na veivorati, ia e a vakayaloqaqataki keitou na noda Kalou me keitou tukuna vei kemuni na nona i Tukutuku Vinaka. 3E a sega ni caka na neitou veisureti e na dela ni veivakacalai, se e na dua na i naki duka se e na veivakaisini. 4Ia keitou sa dau vunau ga me vaka sa vinakata na Kalou, ka ni sa nanuma ko koya ni sa ganiti keitou me keitou kauta na i Tukutuku Vinaka. Keitou sega gona kina ni saga me ra vinakati keitou kina na tamata, na Kalou ga, o koya sa dau vakatovolea na i naki ni lomada. 5Ni ko ni sa kila ni keitou a sega ni lako yani vei kemuni e na vosa ni veicavilaki wale ga, ka sega tale ga ni tauca e dua na vosa me ubia na yalo kocokoco. Sa neitou i vakadinadina kina na Kalou. 6Keitou a sega tale ga ni qara me ra dokai keitou kina na tamata, se ko i kemuni se ko ira na tani, e dina ga ni a rawa me keitou vakacolati kemuni e na vuqa na ka, ni keitou sa i apositolo i Karisito. 7Ia keitou a dau yalo vinaka ga e na kemuni maliwa me vaka e dua na dauveimei vei ira na gone e susugi ira tiko. 8O koya gona oya e na levu ni neitou taleitaki kemuni keitou a sega ni via solia wale ga kina vei kemuni na i Tukutuku Vinaka ni Kalou, ia keitou a solia sara tale ga na neitou bula; ka ni ko ni sa rui ka lomani dina vei keitou. 9Ko ni na nanuma tiko na veiwekani na neitou cakacaka kei na neitou oga. Keitou a dau cakacaka e na siga kei na bogi me keitou kakua kina ni vakaicolacolataka e dua vei kemuni e na gauna keitou vunautaka tiko kina vei kemuni na i Tukutuku Vinaka ni Kalou. 10Ko ni sa i vakadinadina vata kei na Kalou e na kena savasava, dodonu ka tawa cala na neitou i vakarau e na kemuni maliwa na vakabauta. 11Me vaka ko ni kila ni keitou a vaka na tama vei ira na luvena e na neitou a tuberi kemuni yadudua, 12ka vakacegui kemuni ka vakauqeti kemuni mo ni vakarautaka na i vakarau ni bula sa kilikili vua na Kalou, o koya sa kacivi kemuni tiko ki na nona matanitu lagilagi. 13Keitou dau vakavinavinaka tale tiko ga vua na Kalou e na vuku ni nomuni a ciqoma na vosa ni Kalou ko ni rogoca mai vei keitou. Ko ni a sega ni vakabauta me vaka e a vosa ga ni tamata, ia me vaka ga e vosa ni Kalou. Io e vosa dina ga ni Kalou na vosa koya, ka sa i koya sa cakacaka tiko vei kemuni sa vakabauta. 14Sa mani yaco vei kemuni na wekaqu na ka e a yaco vei ira na veisoqosoqo lewe ni lotu ni Kalou mai Jutia, ko ira era sa nei Karisito Jisu; ko ni sa sota kei na veika rarawa mai vei ira na wekamuni me vaka era a sota kaya mai vei ira na Jiu ko ira koya. 15Sa i ira era a vakamatea na Turaga ko Jisu Karisito kei ira tale ga na parofita; ka sa i ira tale ga era a vakacacani keitou. A ra sa sega ni vinaka vua na Kalou, ka ra sa veicati tale ga kei ira na tamata kece ga! 16Era a tovolea tale ga me ra tarova na neitou vunau vei ira na kai matanitu tani, me ra vakabulai kina. Ia e na nodra kitaka koya era sa qai vakacavara vakavinaka sara kina na i valavala ca era a kitaka tiko mai. Ia oqo sa qai yacovi ira sara na cudru ni Kalou! 17Ia ko i kemuni na veiwekani, e dina ga ni keitou a takali vakalekaleka, mai na matamuni, ia keitou a sega sara ni guilecavi kemuni. Sa dua tani na neitou dau nanumi kemuni kei na neitou dau gadreva me da veirai mata tale! 18Keitou sa gadreva sara vakalevu me keitou lesu yani vei kemuni. Ko i au mada ga, ko Paula, au a tovolea vakavica me'u lesu yani vei kemuni, ia e a vakataotaka na neitou i lakolako ko Setani. 19Ia sa i kemuni ga—sega ni dua tale na neitou i nuinui, neitou i sakisaki ka vu ni neitou vakacibicibitaka na noda qaqa e na mata ni noda Turaga ko Jisu e na nona lako mai. 20Sa i kemuni ga na neitou lagilagi kei na neitou vu ni reki.

will be added

X\